Алматылық ғалымдар адам ағзасындағы қатерлі ісіктің бар-жоғын анықтайтын тың тәсіл ойлап тапты. Оның көмегімен обыр сырқатын бар болғаны он минөт ішінде анықтауға болады. Бұл туралы «Жетінші» телеарна хабарлады.
Алматы қаласында орналасқан Қазақстан-Жапон инновациялық орталығының қызметкерлері қан құрамындағы сары суды жақыннан сәулелендіру арқылы қай мүшенің обырға шалдыққанын дөп басып айта алады екен. Үш жыл бұрын қолға алынған бұл істің нәтижесі бар секілді. Осы уақыт аралығына дейін ғалымдар жеке клиникалармен бірлесіп, мың жарымға тарта азаматтың қан құрамын тексерген. Ал оның қорытындысы іс жүзінде дәлелденген. Қазақстан-Жапон инновациялық орталығының директоры Диас Мырзақожаның айтуынша, қатерлі ісікті жедел анықтайтын тың тәсіл әлі медицина саласына толық енгізілмеген. Себебі, оны іске асыруға қаржы тапшылығы кедергі келтіріп тұр.
Данияр Түймебай.
