Бірлескен қызмет мемлекеттік және банк секторларының, ірі кәсіпорындардың цифрлық трансформациясына ықпал етіп, елімізде IT-таланттарды дамытуға қолдау көрсетіп, халықтың цифрлы қауіпсіздігін арттыратын болады. Сонымен қатар бұл ынтымақтастық цифрлы бизнес-стратегияларға көшу арқылы кәсіпкерлерге өз компанияларын басқарудың оңтайлы моделін құруға, деректер қоры, «бұлтты» шешімдер, IoT, Big Data, Blockchain басқару жүйесін енгізу саласында жаңа қосымшалар мен әзірлемелерді қолдануға, сондай-ақ барлық бизнес-үдерістерді жақсарту үшін ІТ-инфрақұрылымға шығындарды азайтуға мүмкіндік береді.
«Қазақтелеком» АҚ басқарма төрағасы Қуанышбек Есекеевтің айтуынша, ұлттық байланыс операторы Қазақстандағы цифрлы қызметтердің ірі провайдері ретінде деректерді сақтау және өңдеу, LoRa, «ақылды үй», блокчейн, Е-commerce және сол секілді жаңа бизнестерді құру, үдерістерді оңтайландыру үшін деректерді орталықтандырумен жұмыс жасайды.
– «Қазақтелеком» Big Data бағытында барлық мүмкіндіктерге ие. Атап айтқанда, бақылау-касса машиналарынан тіркелген деректерді беру, тіркелген және мобильді абоненттер бойынша клиенттік базаны сегменттеу, сондай-ақ клиенттердің қозғалысы туралы ақпарат та қамтылған. Әр тұтынушыға мейлінше релевантты ұсыныстар жасау үшін деректерге талдау жасап, абоненттердің бейінін анықтап аламыз, – деді Қ.Есекеев.
Ұлттық компания Big Data-ны ішкі және сыртқы деректер сараптамасын басқару, SMS хабарламаны таргеттеу, желілік инфрақұрылымды оңтайландыру, тасымалдауды жоспарлау, тұрғындардың көші-қонын талдау, туризмді дамыту және тағы басқа бағыттар да үшін пайдаланбақ. Сондай-ақ «Үлкен деректердің» көмегімен «Бұлтты бейнебақылау» қызметін іске қосу көзделген. Тың қызмет конференция барысында интерактивті трансляцияда көрсетілді.
Ресейлік «ИКС Холдинг» көпбейінді IT-құрылымы Үлкен деректер бағытында отандық нарықта қазақстандық компаниялармен «ИКС Холдинг Қазақстан» бірлескен кәсіпорны құрылатынын жариялады және жергілікті нарықта «ИКС Холдинг» экожүйесінің барлық компанияларының шешімдері мен өнімдерін ұсынуды жоспарлауда.
– Жекелеген компанияларымыз көп уақыттан бері Африка, Таяу Шығыс және Орталық Азия елдерінде табысты жұмыс істеп келеді. Алайда қазір біз активтерімізді шоғырландырып, олардың арасында өнімді бірлесіп қалыптастыруға ықпал етеміз. Қазақстандық әріптестермен тығыз байланыста жұмыс жасап, компанияларға жоғары технологиялы өнімдер мен шешімдерді қуана ұсынып, сараптамалармен және жинақталған тәжірибемізбен алмасамыз. Бұл ынтымақтастық ұзақмерзімді табысты қарым-қатынастарға негіз болады, – деді «ИКС Холдинг» вице-президенті Э.Антонян.
Іс-шара барысында заманауи коммуникациялық технологиялар, Қазақстандағы IT-нарықтың ахуалы, ақылды қалаларды дамытудағы үлкен деректер сараптамасының рөлі сынды маңызды мәселелер талқыланды.
