Жамбылдықтарды толғандыратын мәселелер

 

Бүгінгі таңда әкімдердің халық­пен қарым-қатынасы үшін барлық мүмкіндіктер қарас­ты­рыл­ған. Халық үшін де тиімді мүм­кіндіктер көп. Қазіргі кезде түрлі деңгейдегі әкімдерге тұр­ғындардың әлеуметтік желі арқылы шығып, түрлі сауалдарын қоюына, мәселесін айтуына болады. Енді оларға қалай жа­уап беру, мәселесінің шешілуіне қа­лай ықпал ету әкімдердің өзі­не байланысты. Бұл орайда Қа­зақстан Республикасының Пре­зиденті Қасым-Жомарт Тоқаев «Сындарлы қоғамдық диа­лог – Қазақстанның тұрақ­ты­лығы мен өркендеуінің не­гі­зі» атты Жолдауында «Аза­мат­тардың барлық сындарлы өтініш-тілектерін жедел әрі тиімді қарастыратын «Халық үніне құлақ асатын мемлекет» тұжы­рымдамасын іске асыру – бәрі­мізге ортақ міндет», деген бола­тын.

Президенттің «Халық үні­не құлақ асатын мемле­кет» тұжырымдамасы облыс әкім­де­рінің жұмысын көр­се­те­тін құ­жат. Әрі әкімдердің жұрт­шылықпен байланысуының тетігі. Халық болған соң, олар­дың мәселесі де болмай тұр­май­ды. Көптің бәрі бірдей емес. Мә­се­лен, кейбір тұрғындар өзінің әлдебір мәселесінің шешімі табылмауын әкімнен көруі мүмкін. Керісінше, кейде біраз азаматтар өткір мәселесін айту үшін әкімдіктің есігін тоздырып, әкім­мен жолыға алмай әуреге түсіп жатады. Ал Жамбыл облы­сы­ның тұрғындарын бүгінде қан­дай мәсе­лелер толғандырады?

Әрине, өзге өңірлердегідей Жамбыл өңірінде де жол, ауызсу, көгілдір отын, апатты мектеп сияқты бірқатар мәсе­ле бар. Енді олардың шешілу мәсе­ле­ле­рін қала, аудан әкімдері түрлі жиындарда айтып та жүр. Кейде біраз мәселелер оң шешімін тапса, кейбірі сол күйі шешілмей қалып қояды. Бірақ ел Президенті Қасым-Жомарт Тоқаевтың «Халық үніне құлақ асатын мем­лекет» тұжырымдамасына көшу­де­гі міндеттерді жүзеге асыру ая­сында Жамбыл облысының әкі­мі Асқар Мырзахметовтың өңір тұр­ғындарымен кездесуінен көп­ші­ліктің пәтер мәселесіне алаң­даулы екенін байқадық. Әкімнің қоғам­дық қабылдауына алдын ала 64 адам жазылса, оның 55-і қабыл­дауға қатысты.

Мәселен, Тараз қаласының тұрғыны, зейнеткер Сейсекүл Төленова өзінің жалғызбасты ана екенін, өзімен бірге жесір қалған қызы мен немересінің бірге тұратынын айта келіп, енді жатақханадан уақытша тұратын бөлме берілсе деген тілегін жеткізді. Ол пәтер жалдап әзер күн көріп жүргенін алға тартты. Алайда тұрғынның өті­ні­­ші қанағаттандырылды ма? Облыс бойынша пәтерге мұқтаж тұр­ғындар қаншама. «Бүгін біз сияқты қарапайым тұрғындарға үлкен мүмкіндік туып отыр. Мен облыс әкіміне тікелей жолығып, өзімнің мәселемді айттым. Уа­қыт­ша тұратын жатақхана болса де­ген тілегім ескеріліп, мәсе­лем қаралатын болды», дейді Сейсекүл Төленова.

Бір қуанарлығы, бүгінде Тараз қаласында көп балалы және аз қамтылған отбасылар үшін 612 пәтерлі 12 жатақхана салынуда. Оның ішінде 9 жатақхана биыл тапсырылса, қалған 3 жатақхана келесі жылы пайдалануға бері­ле­ді. Аталған жатақханаларды көп­ балалы және аз қамтылған отба­сылар тұрғын үй кезегі келген­ше сатып алу құқығынсыз уа­қыт­ша паналай алады. Бұл да болса баспана мәселесімен басы қатқан көптеген тұрғын үшін үлкен көмек. Алайда бұл барша жамбыл­дықтардың тұрғын үйге деген мұқтаждықтарын өтей алмайтыны түсінікті.

Тұрғын үй мәселесімен қайы­рыл­ған азаматтың бірі, Тараз қаласының тұрғыны Рах­мет­жан Бекжанов. Зейнеткер әкім­ге баспана мәселесімен келген. Дегенмен, тұрғынға әкім бұл мәселені заң аясында қарас­тырып шешу керектігін айт­қан. Осы сияқты бірқатар қала тұр­ғыны тұрғын үй мәселесі бойынша қабылдауға жазылыпты. Оның ішінде Ұлы Отан соғысының ардагері, зейнеткерлер, көп балалы және аз қамтылған отбасылар мен жалғызбасты аналар да бар екен. Бүгінде қоғамда көп балалы және аз қамтылған отбасылардың мәселелері өзекті. Әрине, бәрі үшін де бірінші кезекте баспана маңызды.

Мәселен, Жамбыл облысы бойынша тұрғын үй кезегіне 1800-ге жуық көп балалы отбасы тіркеліпті. Қоғамдық қабылдауға жазылған Гауһар Шакибасова – Тараз қаласының тұрғыны, жалғыз­басты ана. Бүгінде ата-анасымен бірге тұратын Гауһар 4 жастағы қызының бар екенін, осыдан 5 жыл бұрын тұрғын үй кезегіне тіркелгенін айтады. Біз Гауһар Шакибасованың өзімен хабарласқанымызда, ол бұл мәселе бойынша облыс әкімінің қабыл­да­уына жазылғанын, алайда әкім тұр­ғындарды қабылдаған кезінде шақы­рылмағанын айтады. «Мені ешкім қабылдауға шақырған жоқ. Осыдан 5 жыл бұрын тұрғын үй кезе­гіне тұрғанмын. Жеке бас­панам жоқ. Енді қарасам содан бері 200-дей ғана кезек алға жыл­жыған екенмін», дейді ол. Әкім­нің қоғамдық қабылдауына шақы­рыл­ма­ған тұрғын бұл мәселе бойынша тиісті басшылардан көмек күтуде. Тұр­ғы­ндардың­ арыз-шағымдарына, ұсыныс-пікір­леріне құлақ түріп, оның шешімін табу жолдарын қарастыру бүгінгі күннің талабы. Әрине, әкімнің алдына келген барлық тұрғынның баспана сұрай беруі мүмкін емес. Көп жағдайда азаматтарды ауылдың мәселелері де ойландырады. Мәселен, Жуалы ауданы, Қайрат ауылының тұрғыны Кәрібай Құрмашев аудандағы 19 елді мекенді газдандыру мәселесін көтерген болатын. Ал Жамбыл облыстық энергетика және тұрғын үй-коммуналдық шаруашылық басқармасының басшысы Нұрлан Алдамжаров бұл бағытта тиісті қаражаттар қарастырылып, жобалық-сме­та­лық құжаттардың жасалып қойғанын айтады. Оның айтуынша, бұл елді мекендер кө­гіл­дір отынға кезең-кезеңімен қосылады. Сонымен қатар Теріс ауылының тұрғыны Оралбек Махашов ауылды жерлердегі малдәрігерлік жұмыстарының ойдағыдай емес екенін мәселе ретінде көтерді. Осы сияқты мәселелер облыс орталығынан бастап, аудан, ауылдарға дейін бар. Тек олардың оң шешілуіне уақыт пен әкімдердің іскерлігі керек.

Жалпы, Президенттің «Халық үніне құлақ асатын мемлекет» тұжырымдамасы негізінде облыс бойынша 976 азаматқа нақты жауап беріліпті. Бұл қоғамдық қабылдауға облыс әкімінен бас­тап, қала, аудан әкімдері де қатысқан. Енді көтерілген тұрғын үй, инфрақұрылым, қала көркі сияқ­ты мәселелер қаншалықты ше­шімін табады, оны уақыт көр­се­теді.

 

Жамбыл облысы