Оқырман назарына ұсынылған тарихи маңызы зор журналдар мен кітап мазмұны тәуелсіз Қазақстанның қалыптасуымен қатар келген Елбасының саяси өмірі мен рөліне арналған. Елбасы кітапханасының директоры, профессор Әмірхан Рахымжановтың модераторлығымен өткен шараға Тұңғыш Президент – Елбасы Н.Ә.Назарбаевтың замандастары мен депутаттар, кітапханашылар мен елорда жастары қатысты.
– Тарихи мазмұндық тұрғыдан құнды болып табылатын бұл кітаптардың барлығы да бір арнаға тоғысады. Бұл кітаптар Қазақстан Республикасының Тұңғыш Президенті – Елбасы Н.Ә.Назарбаевтың мемлекеттің қалыптасуы мен нығаюы, көпұлтты Қазақстан халқының ынтымақ-бірлігі, қоғамдағы тұрақтылық пен елдің рухани гүлденуі, дүние жүзінің алдыңғы қатарлы державаларымен әріптестік пен ынтымақтастық орнату және бейбіт ғалам жолындағы көпқырлы саяси қызметінің аса бай тәжірибесін көрсетуге арналған. Бұл басылымдар Тұңғыш Президенттің серіктесі, Елбасы Кеңсесінің басшысы, саяси ғылымдар докторы, профессор Махмұт Базарқұлұлы Қасымбековтің идеясымен және жетекшілігімен «Қазақстан Республикасының Тұңғыш Президенті – Елбасы Н.Ә.Назарбаев: мемлекеттік басқару стратегиясы және көшбасшы феномені» ғылыми бағдарламасы аясында дайындалды, – деп атап өтті Әмірхан Мұратбекұлы.
Сөз кезегін алған Парламент Мәжілісінің депутаты Қуаныш Сұлтанов «Нұрсұлтан Назарбаев: көшбасшылық стратегиясы» атты екі бөлімнен тұратын кітап туралы өз ойын ортаға салды. «Жастардың алдыңғы ұрпақтың көрген қиындығын басынан өткізуі міндетті емес. Кеңес Одағы құрамында Мәскеуге бағынышты болған кезеңді ендігі ұрпақ көрмесін. Жастар тек бостандықта өмір сүрсін. Жастарымыздың мемлекетшіл болып өсуі, елімізді қорғау мен сақтаудың, ұлттық қауіпсіздіктің мағынасын түсінуі – мемлекеттің тұлғасына байланысты. Бүгін оқырмандарына жол тартқалы отырған кітаптардағы деректер тәуелсіздіктің қасиеттілігін көрсетіп, оның бағасы мен қадірін білдіреді. Бұл жинақтарға енген барлық шығармада Елбасының естеліктері мен сөздері мемлекетшілдік қасиетті жоғары көтереді. Сондықтан бүгін біздің рухани өмірімізде үлкен жаңалық болды деп есептеймін. Осындай шығармаларды кеңінен насихаттау – баршамыздың міндетіміз», деді Мәжіліс депутаты.
Тұсауы кесілген жинақтардың бірі – «Н.Ә.Назарбаевтың еуразиялық бастамалары: тарихы, қазіргі жағдайы және болашағы» – еуразиялық интеграция идеясының 25 жылдығына және Еуразиялық Экономикалық Одақ туралы шартқа қол қойылуының 5 жылдығына арналған. Мәскеу мемлекеттік университетінің қазақстандық филиалының директоры, экономика ғылымдарының докторы Александр Сидорович Еуразиялық одақ шеңберінде барлық елдердің бекітілген міндеттемесінің құндылығы келісілген саясатта екенін айтты.
«Еуразиялық қағидаттарды жариялау, бұл – тәуелсіз мемлекет Қазақстанның жаңа әлемге ену концепциясы. Н.Ә.Назарбаев конфронтация емес, өзара түсіністіктің және өз елінің ұлттық құндылықтарына деген құрметі мен сыйластықтың жаңа қағидалары негізінде ашықтық жолын таңдады. Н.Ә.Назарбаевтың аса көрнекті ақылымен құрылған Еуразиялық идея мағынасы мен мүмкіндігі жағынан осындай тәсілмен үндеседі», деп атап өтті А.Сидорович.
«Біз білетін Елбасы» – тәуелсіздіктің алғашқы жылдарында егемен мемлекетті дамытудың жаңа жолы мен үлгісін іздеген тұста Тұңғыш Президенттің жанынан табылған, қол жеткізген әр жетістігіне бірге қуанып, қолдау көрсеткен Елбасының замандастарының естеліктер жинағы. 1960 жылдары Теміртау қаласында қызмет еткен Елбасының еңбек жолы туралы естеліктерімен Қазақстанның алғашқы Сыртқы істер министрі, академик Төлеутай Сүлейменов ой бөлісті:
«Бүкілодақтық «Правда» газетінде еңбек жолын металлургиялық комбинатта горновойдан бастаған, партком хатшысы болған Нұрсұлтан Назарбаевтың сынап айтылған отты мақаласы жарық көрді. Ол газет бетінен комбинаттың қызметі, металлургтердің, Теміртау қаласы тұрғындарының қажеттіліктер туралы айтты. Кеңес кезеңінде бұлай жасау өте қиын еді, осындай қадам жасау үшін аса батыл болу керек еді».
Сонымен қатар жаңа басылымдар қатарында «Ядролық қарусыз әлемге бетбұрыс: Елбасы бастамалары» – Қазақстанның Тұңғыш Президентінің бітімгерлік бастамаларына және оның барша адамзаттың мүддесі үшін ядролық қарудан азат әлемді құру жөніндегі саясатына арналған жинақ және «Мәңгілік Ел» идеясы: кеше, бүгін, ертең» атты ұжымдық монография бар.
