Осы сөзіміздің бір дәлелі ретінде таяуда облыстық тарихи-өлкетану мұражайында «Қазыналы, кенді қала» атты көрменің ұйымдастырылғанын айтуға болады. Мәдени шара аясында кеншілер астанасының қатпарлы тарихынан мол мағлұмат беретін жәдігерлер көрме сөрелерінен көрініс тапты.
Қала тұрғындары мен қонақтарының назарына ұсынылған елуден астам экспонаттың ішінде шахтер жабдықтары, кеншілердің жұмыс киімдері, геологиялық құрал-саймандар және алғашқы құрылысшылар мен қоныс аударушылардың тұрмыстық заттары бар.
Көрменің Қарағанды қаласының өңірдегі көп салалы және индустриялық орталық ретінде қалыптасуын көрсетуді мақсат еткенін айтады аталған музейдің аға ғылыми қызметкері Гүлмира Қонақбаева.
– Экспозиция қаланың қалыптасуы мен дамуының барлық тарихи кезеңдерін қамтиды. Мұнда мұражай қорының жәдігерлері мен қала тұрғындары тапсырған заттар жинақталған, – дейді ол.
Сонымен қатар көрме аясында «Қайда, қайда? Қарағандыда!» атты дөңгелек үстел отырысы ұйымдастырылды. Ардагер кеншілер, алғашқы құрылысшылар, ғалымдар, өлкетанушылар және жоғары оқу орындары мен колледж студенттері қатысқан бұл тағылымды шарада спикерлер қазыналы Қарағандының арғы-бергі тарихы мен тыныс-тіршілігін әңгіме өзегіне айналдырды.
Қарағанды тарихын құрметтің төріне шығарған көрменің есігі ақпан айының соңына дейін келушілерге ашық болады.
ҚАРАҒАНДЫ
