Қоғам • 18 Ақпан, 2020

Жұрт көңілі билікке қайтсе толады?

902 реткөрсетілді

Ұлы ойшыл Абай атамыздың елге ба­рын­ша танымал «Біріңді қазақ, бірің дос, көрмесең – істің бәрі бос» деген өсиет сөзі­нің мәнісіне ой жүгіртсек, одан ұлт болып ұйысуда, халқымыздың мүддесі үшін күрес­те достық, татулық, бірлік ауадай қажет екендігі айқын көрінеді. Ал еліміздің бір­лік пен ынтымақты ту етіп, алға басуы үшін бірінші кезекте атқарушы билік өзіне жүк­тел­ген міндетті абыроймен атқаруы тиіс.

Осы орайда, биліктің халқымыздың әлеуе­тін арттыру, елімізді нығайту жолындағы жауап­­кершілігіне Президент Қасым-Жомарт Тоқаев «Абай және XХI ғасырдағы Қазақстан» атты мақаласында кеңінен тоқталып өткен. Мем­лекет басшысы аталған мақаласында: «Біз егемен ел ретінде өсіп-өркендеуіміз үшін мем­ле­кет­тілігімізді нығайтуымыз керек. Заң үс­тем­дігін және қоғамдық тәртіпті сақтау баршаға ортақ міндет екенін ұғынған жөн. Халықтың билікке деген құрметі болмаса – елдігімізге сын...

Үкімет мүшелері, соның ішінде министр­лер мен әкімдер мемлекеттік және қоғамдық маңызы бар мәселелерге қатыс­ты шешім қабыл­даған кезде азаматтардың ұсыныс­тары мен тілектерін ескеруі керек. Мұны Абай мең­зеген әділетті қоғам қалыптастырудың бір­ден-бір шарты деп білемін. Ұлы ақын «Келелі кеңес жоғалды, Ел сыбырды қолға алды» дегенді бе­кер айтқан жоқ. Елге билік жүргізетіндерге жұрт­тың көңілі толмайтынын да аңғартады», дейді.

Расында, билік халқының жағдайын жайласа, сол билік тұрған жерден артық жайлы жер болмасы анық. Бірде Конфуций кезекті сапары­нан келе жатқанда жолдан аулақта жылап отыр­ған бір әйелді көреді. Анықтап қараса, әлгі әйел біреулердің зираты алдында бүк түсіп еңіреп, бірдеңе айтып отыр екен. Бірақ оның не айтып отырғанын ұға алмайды. Содан қасындағы шәкіртін қайғырып отырған әйелге жібереді.

Қайғырып отырған әйелдің қасына келген шәкірт:

– Жалғыз өзіңіз соншама қайғырып жылап отырғаныңызға қарағанда, сіз нағыз қимас жандарыңыздың бәрінен айырылған секілдісіз, – дейді. Сонда әйел:

– Иә, айтып тұрғаның рас, жақында қайын атам­ды жолбарыс талап өлтірді. Сондай бір аң енді күйеуім мен ұлымды да мерт қылды, – дейді.

– Онда сіз неге қауіпсіз басқа жаққа кет­пейсіз? – деп сұрайды әңгімеге араласқан Кон­фу­цийдің өзі. Сонда ауыр қайғыдан қан жұтқан әйел басын көтеріп:

– Мен нақ осы жерде ғана өмір сүргім келеді, өйткені бұл аймақта билік, салыстырмалы түрде айтқанда, қатал емес, – деп жауап қайтарады.

Біраздан кейін Конфуций шәкіртіне бұрылып:

– Есіңде болсын шәкіртім, билік – ең үрейлі күш, тіпті, ол қаhарлы аңның өзінен де үрейлі, – деген екен.

Әрине, әлемде үрейлі де, өте қатал билік жоқ деп ешкім айта алмас. Әрі-беріден кейін билік те халықтың өз «өнімі» екені белгілі. Дегенмен, биліктің де билігі бар...

Бүгінде көзі ашық, білімді де білікті жастарымыздың арасында шетел асып жатқандар аз емес. Осындайда «Арқада қыс жайлы болса, арқар ауып несі бар» деген сөз санада жаңғырады да, «жайлы жер іздеп кеткендерді» жазғырғың келмейді.

Жалпы, мемлекеттің негізгі міндеті – халықтың әлеуметтік жағдайын көтеру, әсіресе жастардың өсіп-өнуіне, білім алып елге қызмет етуіне мүмкіндік беру. Әрине, біздің мемлекетіміз бұл бағытта нақты шараларды қолға алып, шама-шарқынша жұмыс істеуде. Десек те, кейбір көңілді төмен тартар деректер мемлекеттің, атқарушы биліктің уақыт талабына сай нақты істерді өз деңгейінде жүзеге асыра алмай отырғанын көрсетеді. Мәселен, жастардың әртүрлі діни ағымдардың жетегінде жүруі, Үкімет пен әкімдердің жастар мәселесіне тиісті көңіл бөлмеуі, елде жастар саясатының жүйелі жүргізілмеуі, талантты азаматтарымыз бен білімді мамандарымыздың елден көптеп кетуі, мектеп бітірушілердің, әсіресе солтүстік облыстардағы мектептердің озат түлектерінің 75-80 пайызы Ресейге оқуға кетіп, сонда қалуы және басқа да түйткілдер атқарушы билікті ойландыруы тиіс. Жастардың көпшілігі материалдық жетіспеушіліктен уақтылы отбасын құра алмай жүргені, шаңырақ көтергендерінің 40-50 пайызға жуығы ажырасып кететіні, соның кесірінен еліміздің демографиялық ахуалы мәз болмай тұрғаны да баршамыздың көңілімізді түсіретін жағдаяттар.

Азаматтардың бостандығын құрметтейтін, қоғамдық жарастыққа негізделген, игілігі мол, әділ, әр адамға көмек қолын созар мемлекетті қалыптастыру өз қолымызда. Ол үшін Абайдың жоғарыда айтылып өткен өсиет сөзіне құлақ асып отырған, татулық пен бірлікті басты байлығы санайтын халқымыздың ақ ниетіне билік тарапы лайықты жауап беруі тиіс. Бұл өз кезегінде билікке жұрттың көңілін толтыратын қадам болар еді.

Соңғы жаңалықтар

Бензин бағасы арзандады

Экономика • Кеше

14 отбасыға қол ұшын созды

Қазақстан • Кеше

Ұқсас жаңалықтар