Бірлескен күрес әлемінің (UWW) басшылары Аспанасты елінде коронавирус дертінің өршуіне байланысты осындай қадамға баруға мәжбүр болғандарын мәлімдеді.
Көпшілік алдында сөз алған айтулы ұйымның президенті Ненад Лалович: «Азия құрлығында орналасқан мемлекеттердің ұлттық құрама командаларының қатысуымен өтетін жарысты Бішкек қаласына ауыстыруды құп көрдік. Олимпиада жолдамалары сарапқа салынатын дүбірлі дода 27-29 наурыз аралығында өтеді. Сөз орайы келгенде, осындай қысылтаяң жағдайда бізге қолдау көрсетіп, іріктеу бәсекесін өткізге ерекше құлшыныс танытқан Қырғызстан күрес федерациясына шексіз алғысымызды білдіреміз», – деп тіл қатты.
Естеріңізге сала кетейік, Олимпия ойындарының алғашқы жолдамалары былтыр Нұр-Сұлтанда өткен әлем чемпионатында сарапқа салынған еді. Алайда өз елімізде өткен жарыста біздің балуандардың біразы көздеген мақсатына қол жеткізе алмады. Міне, енді сол олқылықтың орнын іргеміздегі қырғыз елінде толтыруға тиіспіз.
