Кеше Қоршаған ортаны қорғау министрі Нұрлан Қаппаров жұмыс бабымен Қызылорда облысында болды.
Кеше Қоршаған ортаны қорғау министрі Нұрлан Қаппаров жұмыс бабымен Қызылорда облысында болды.
Байқоңыр қаласында Премьер-Министр Серік Ахметовтің өкімімен құрылған ресейлік «Протон-М» зымыран тасығышының құлау салдарының экологиялық зардаптарын жою жөніндегі іс-шаралардың өткізілуін бақылау жөніндегі комиссияның басшысы болып табылатын Нұрлан Қаппаров Қызылорда облысының әкімі Қырымбек Көшербаевтың, «Роскосмос» басшыларының, сондай-ақ, орталық және жергілікті атқарушы органдар өкілдерінің қатысуымен көшпелі кеңес отырысын өткізді.
Гептилмен ластанған жерлерді залалсыздандыру бойынша қазақстандық және ресейлік мамандардың бірлесіп өткізген жұмыстарының барысы туралы «Роскосмос» агенттігінің Байқоңыр ғарыш айлағындағы басқарма бастығы Анатолий Белоконь және ҚР Ұлттық ғарыш агенттігінің «Ғарыш экология ҒЗО» РМК директоры Жайлаубай Жұбатов баяндады.
Н.Қаппаров аумақты залалсыздандыру жұмыстарының қарқыны мен нәтижелеріне риза еместігін білдірді. Роскосмостың өкілі детоксикациялауды аяқтауға 15 күн сұрады.
Сонымен қатар министр зымыран тасығыштарының құлауы салдарының экологияға және Байқоңыр мен ғарыш айлағына таяу орналасқан елді мекендер тұрғындарының денсаулығына келтірілген зиянның әсерін анықтау шараларының жалғастырылатындығын айтты. Осыған орай ол Байқоңырда Қазақстанның экологиялық кодексінің қолданылуы мәселелері жөніндегі келіссөздерді үдету қажеттігін атап өтті.
Отырыс барысында Қызылорда әкімшілігі тарапынан «Протон-М» зымыран тасығыштарын ұшыруға байланысты мәселелерді қарастыруға бағытталған конференция (дөңгелек үстел) өткізу туралы ұсыныс жасалды. Н.Қаппаров бұл бастаманы қолдап, Роскосмос өкілдерін екі тарап үшін маңызы зор мәселелерді жан-жақты талқылауға қатысуға шақырды.
«Егемен-ақпарат».
