Абайдың шығармаларын жастар арасында кеңінен насихаттап, жас талант иелерінің өнеріне қолдау білдіруді мақсат еткен байқау 25 жылдан бері дәстүрлі түрде өткізіліп келеді. Бұл жолы қазылық етуге халықаралық және республикалық театр фестивальдерінің жүлдегері, мемлекеттік «Дарын» сыйлығының иегері, Астана жастар театрының актері Әділ Ахметов пен облыстық «Арай» жас ән орындаушылар байқауының 1996 жылғы гран-при иегері, халықаралық «Азия дауысы» фестивалінің жеңімпазы, әнші Бауыржан Исаев шақырылыпты. Абай әндерімен қатар халық композиторларының да шығармалары орындалған байқаудың ашылу салтанатында облыстық мәдениет басқармасы басшысының міндетін атқарушы Асылхан Темірхан өнер додасы соңғы төрт жылдан бері екі жылда бір рет өткізіліп жүргенін айтып өтті. Облыстағы имидждік конкурс болғандықтан, мұнда топ жарғандар республикалық байқауда бақ сынайды.
Сонымен ән байқауының бас жүлдесіне Аплатон Рақымжан лайық деп танылса, «Алтын жұлдыз» дуэті жүлделі бірінші орынды иеленді. Ал Жайна Әпсаттар екінші орынға, Ардақ Ысқақова мен Сәтдәулет Сүлейменов үшінші орынға лайықты деп танылды. Мәдени іс-шара жүргізушілер сайысында бас жүлдені Инабат Абытханқызы жеңіп алды, ал бірінші орынға Нұ-райым Төлебек, екінші орынға Жасмина Анарбек лайық деп танылды. Дастан Әлжанов пен Нұркен Абдрахман үшінші орынды иеленді.
Бұдан бөлек, облыстық мәдениет басқармасының арнайы жүлделері де өз иелеріне табыс етілді. Өнер додасының соңы гала-концертке ұласты.
Түркістан облысы
