Қызылорда: «Абай жолымен» республикалық ақындар айтысы өтті

Абай • 28 Ақпан, 2020

Қызылорда: «Абай жолымен» республикалық ақындар айтысы өтті

264 рет көрсетілді

Қызылордада Абай Құнанбайұлының 175 жылдығына орай «Абай жолымен» атты республикалық ақындар айтысы ұйымдастырылды.

Сөз додасының ашылуына осы өңірде сапармен жүрген Nur Otan партиясы Төрағасының бірінші орынбасары Бауыржан Байбек пен облыс әкімі Қуанышбек Ысқақов қатысты. Бауыржан Қыдырғалиұлы жетекші партияның төл өнерімізге жасап жатқан қолдауы жайлы тарата айтып, еліміздің әр түкпірінен жиналған айтыскерлерге сәттілік тіледі. Облыс басшысы Қуанышбек Досмайылұлы хакім Абайды ұлықтау шаралары алда да жалғасатынын жеткізді.

Қазақстанның еңбек сіңірген қайраткері Жүрсін Ерман жүргізген сөз додасына Серік Құсанбаев (Шығыс Қазақстан облысы), Айбек Қалиев (Арқалық қаласы), Аспанбек Шұғатаев (Павлодар қаласы), Әсем Ережеқызы (Нұр-Сұлтан қаласы), Аруна Керімбек (Ақтөбе облысы), Жансая Мусина (Батыс Қазақстан облысы) Аян Ниязбек (Шымкент қаласы), Сұлужан Тауболды (Алматы қаласы), Кенжебай Жүсіпов, Мұхтар Ниязов, Мейірбек Сұлтанхан, Бексұлтан Орынбасаров (Қызылорда облысы) қатысты. Қазақстанның халық ақыны Әсия Беркенова бастаған қазылар алқасының құрамында белгілі жырау Алмас Алматов пен ақындар Ғалым Жайлыбай, Жанарбек Әшімжан болды.

Көрермендер тартқан жеребе арқылы сахнаға шығатын жұптар анықталған айтысты алғашқы болып шымкенттік Аян Ниязбек пен жергілікті ақын Кенжебай Жүсіпов бастады. Ә дегеннен арындаған Аянды сақа Кенжебай тез-ақ сабасына түсірді. Одан кейінгі Мұхтар Ниязов пен Айбек Қалиев, Мейірбек Сұлтанхан – Аруна Керімбек, Серік Құсанбаев – Сұлужан Тауболды, Жансая Мусина – Бексұлтан Орынбасаров, Аспанбек Шұғатаев – Әсем Ережеқызы айтыстарында да көрерменнің көңіліне қона қалар орамды ой, кестелі сөз айтылды.

Қазылар алқасының шешімімен бес сағатқа созылған айтыстың бас жүлдесі Мұхтар Ниязовқа бұйырды. Ал І орынды Жансая Мусина иеленсе, ІІ орынды Әсем Ережеқызы, ІІІ орынды Мейірбек Сұлтанхан мен Айбек Қалиев еншіледі.

Күннің маңызды және өзекті жаңалықтарын «Егемен Қазақстан» телеграм каналынан оқыңыз