«Құрамына 200-ден астам студентті біріктірген мектеп сабақтастық, саулық, таза әлем, асыл мұра, қамқор, білім, үміт секілді жеті бағыт бойынша 19 ақпаннан 19 мамырға дейін жұмыс істейді. Аталған бағыттар бойынша Еріктілер мектебінде дәріс оқылып, семинар-тренингтер мен шеберлік сабақтар ұйымдастыру жоспарда бар» дейді университет ректоры Мұхтар Төлеген.
Жалпы, қазіргі уақытта бұл оқу орнында 2 мыңнан астам студент еріктілер құрамында жұмыс істейді екен. Ал жаңадан ашылған Еріктілер мектебі 3 ай көлемінде 200 студентті оқытып, дайындап шығармақ. «Білім және ғылым министрлігінің тапсырысына сәйкес біз 240 еріктіні дайындап шығаруға тиіспіз. Бұдан бөлек облыс әкімдігі де өздерінің өтініш-тілектерін білдіріп отыр. Еріктілер мектебінде студенттерді Абай шығармашылығымен, Қазақстанның тарихымен, жетістіктерімен, Елбасының қайраткерлік қырларымен, Шығыс Қазақстан жайындағы мағлұматтармен жан-жақты таныстырамыз. Биыл еліміздегі ең мерейлі дата Абай тойы болғандықтан бұл ауқымды шараға волонтерлер жіберу ойымызда бар. Екі жүз студенттің ішінен 80-ін іріктеп, таңдап аламыз. Олар Абай тойына келген қонақтарға қызмет көрсетеді. Еріктілерге абайтанушы, филология ғылымдарының докторы Айжан Қартаева, Люция Абдуллина, «2019 жылдың үздік оқытушысы» атанған Жанна Әубәкірова, Раушан Нұрбекова, Президент жанындағы мемлекеттік басқару академиясының аға оқытушысы Гүлфия Берікболова сынды білікті ұстаздар сабақ береді», дейді аталған оқу орнының кәсіптік даярлау және біліктілікті арттыру ресурстық орталығының директоры Бақытжан Келгенбаева.
ӨСКЕМЕН
