Жоба 2017 жылы іске асырыла бастады. Бүгінгі таңда ондағы жұмыстар 90% аяқталған. Келісім-шарттың жалпы құны 9 223,8 млн теңгені құрады. Атап айтқанда, жер жұмыстарының 85% орындалды. Жолдың 34,6 мың шаршы метрі аумағында негіздеменің жоғарғы қабаты, 32,1 мың шаршы метрінде негіздеменің төменгі қабаты төселді. «Таға» типіндегі эстакада құрылысының 78%, басты магистраль арқылы өтетін эстакада құрылысының 35% аяқталды. Сондай-ақ Ақсай өзені арқылы өтетін көпірдегі жұмыстар 90% орындалса, жаяу жүргіншілерге арналған жерүсті өтпелерінің 30% салынды.
Еске сала кетейік, жоба аясында жол 10 жолаққа кеңейтіледі. Дәлірек айтқанда, нысан қоғамдық, жергілікті және транзиттік көліктер үшін 2 бағытта 5 жолаққа ұлғайтылады. Жобаның бас мердігері – «Дәулет-Дорстрой» ЖШС. Авторлық қадағалауды «АстанаСтройПроектСервис-М» компаниясы жүзеге асырса, инженерлік қызметті «ИПЦ «Альянс» ЖШС атқарады. «Алматы- Бішкек» жолының 16-19 шақырымын күрделі жөндеу Алматыдан «Алтын Орда» базарына дейінгі жолдағы көлік кептелісі мәселесін шешуге мүмкіндік бермек.
Мұнымен қоса, «Асыл Арман» ауданында көліктік жол айырығының құрылысы басталғандығын айту керек. Конкурстың жалпы құны 2 097,7 млн теңгені құрады. Бүгінгі таңда «ДәулетДорСтрой» және «Қостанай жолдары» компаниялары желілерді қайта құру және шығару жұмыстарына дайындалып жатыр. Сонымен қатар эстакаданың екі тірегінде бұрғылау жұмыстары жүргізілуде. Жалпы, жоба аясында түрлі деңгейде «Құбыр» түрінде ұзындығы 550 метрді құрайтын 4 жолақты қозғалысты қамтамасыз ететін жол айрығы мен жаяу жүргіншілерге арналған 1 жерүсті көпірінің құрылысы қарастырылған. Нысан 2021 жылдың қаңтарында пайдалануға беріледі деп жоспарланған.
