Тараз маңындағы тұрғын алқаптарының мәселелерін шешу жолдары қандай?

Аймақтар • 12 Наурыз, 2020

Тараз маңындағы тұрғын алқаптарының мәселелерін шешу жолдары қандай?

31 рет көрсетілді

Тараз қаласындағы кейбір шеткі аудандар мен саяжай алқаптарының қордаланған мәселелерін шешу – бүгінгі мәселенің бірі. Бұл ретте Жамбыл облысының әкімі Бердібек Сапарбаев мұндағы тұрғындармен кездесулер өткізіп, оларға түйінді мәселелердің жергілікті бюджеттің мүмкіншілігіне қарай кезең-кезеңімен шешілетіндігін ашық түсіндірудің маңыздылығын баса айтқан болатын. Сонымен қатар әкім әлеуметтік мекемелер мен қажетті инфрақұрылымдардың құрылысы қомақты қаржыны талап ететінін, дегенмен өзекті мәселелерді шешу үшін кез-келген жағдайда тиісті шараларды қабылдау керектігіне де назар аударған.

Хамит ЕСАМАН

Тараз қаласының әкімі Айтқазы Қарабалаевтың айтуынша, Шалғай Қарасу тұрғын алқабында 25 келушіге арналған дәрігерлік амбулаторияның құрылысын жүргізуді кәсіпкердің бірі өз мойнына алып отыр екен. Ол үшін арнайы жер телімі де бөлінген. Емдеу мекемесінің құрылысы ағымдағы жылы басталып, аяқталады деп күтілуде. Амбулатория келісім-шартқа сәйкес сенімгерлік басқаруға беріледі. Сондай-ақ қазіргі таңда аталған алқапта тұратын 2 388 бала қаланың түрлі білім ошақтарына қатынап оқиды. Сондықтан да жаңа мектеп салу қажеттігі бар. Қала әкімдігінің мәліметінше, алдын-ала есепке сәйкес жоба құны 2,1 миллиард теңгені құрап отыр екен. Дегенмен, Бердібек Сапарбаев 600 орындық мектеп үшін бұл өте жоғары баға екенін, жоба құнын қайта қарау керектігін ескертті. Бұл орайда әкім құрылыс тек келесі жылы, құжаттамалар мен мемлекеттік сараптаманың қорытындысы дайындалғаннан кейін басталуы мүмкін екендігін алға тартып, әзірге балаларды тасымалдау ісін дұрыс ұйымдастыру қажеттігіне көңіл бөлді. Сонымен қатар Шалғай Қарасудың жеті жаңа тұрғын алқабына ауыз су мен электр желілерін тарту да үлкен мәселенің бірі. Бұл жұмыстарға бюджеттен бірінші кезеңде 570 миллион теңге, екінші кезеңде 450 миллион теңге қарастыру керек екен. Бүгінде тиісті құжаттары дайындалу үстінде. Жобаларды жүзеге асыру келесі жылдың жоспарында. Сондай-ақ барлық жолдарды бірден асфальттау мүмкін емес болғандықтан, бірқатар көшелерге қиыршық тас төселсе, кейбір жолдар ағымдағы жылы жөндеуден өтпек.

Сонымен қатар Тараз қаласының әкімі Айтқазы Қарабалаев жеке автобус парктерінің қоғамдық көліктері шеткі аудандарға қатынай бермейтінін атап өтіп, келесі конкурс талаптарында осындай тиімділіктерді ескеру керектігін айтады. Аталған тұрғын алқаптағы тағы бір мәселе – жергілікті көшелердің тарылуы. Ондағы көптеген тұрғындардың рұқсатсыз әр түрлі шаруашылық құрылыстарын жүргізуі қоғамдық көліктердің қозғалысы үшін ыңғайсыздық туғызуда. Жалпы, бұл мәселелер қаланың барлық саяжай алқаптарына ортақ.

Алқаптарды электр желілерімен қамтуға 1,5 миллиард теңге, ауыз сумен қамтамасыз етуге 2 миллиард теңге қажет. «Тараздықтар қоғамдық көліктердің жағдайына және олардың жұмыс кестесіне шағымдануда. Шағын автобустарды ыңғайлы отандық көліктермен ауыстыру керек. Қоғамдық көлік кемінде 22:00 сағатқа дейін жұмыс істеуге міндетті. Бұл талап келісім шартта нақты жазылуы тиіс. Бюджеттік бағдарламалар әкімшілері осы шарттың орындалуын қатаң бақылауда ұстағаны абзал», деді жиында Бердібек Сапарбаев. Сонымен қатар осы мәселені Тараз қаласы әкімінің тиісті орынбасарына тапсырды. Жиында облыс әкімі саябақтарды, скверлер мен аллеяларды облыстық басқармаларға бекіту, Тараз тұрғындарын тарта отырып, ауқымды сенбіліктер өткізуді бастау туралы тапсырмасын қайта нықтады.

Жамбыл облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз