Инфекция анықталған жағдайда пайдаланылатын 945 төсек-орын дайын. Қосымша 480 төсек-орын коронавируспен ауыру мен өлім-жітім деңгейі жоғары елдерден келген адамдарға арналған карантиндік орталық үшін қарастырылған.
– Аудан орталықтарындағы барлық төсектер жиылып, Павлодар, Ақсу, Екібастұз қалаларында орналасады. Яғни егер ауылдарда немесе шекара маңында адамдар инфекция күдігіне іліксе, осы қалалардың біріне жеткізіледі, – деді облыс әкімнің орынбасары Асхат Оралов.
Өңірдегі барлық медициналық қызметкерлер жеке қорғану құралдарымен және медициналық препараттармен толық қамтамасыз етілген. Мамандардың айтуынша, COVID-19 вирусы тіркелген жағдайдағы іс-әрекет барысы дайын. Қажетті бетперде санын арттыру мақсатында «Мерусар» ЖШС және басқа да тігін ісімен айналысатын желілерімен келісімшарттарға отыру жоспарлануда.
Аймақтық жедел штаб тәулік бойы жұмыс істейді. Облыс тұрғындары мен қонақтары
67-52-08 нөміріне және 103 жедел жәрдем стансасы желісіне, 1406 ортақ республикалық нөміріне хабарласа алады.
ПАВЛОДАР
