Шынын айту керек, осынау қуанышты жаңалық жұрттың үмітін оятып, сенімін бекіте түсті. Бұл мәселеде әсіресе ақ желеңді жандардың еңбегі ерен екені белгілі. Қазірдің өзінде 18 адам бұл дерттен айығып, ауруханадан шықты.
«Дәрігерлерге алғысымды білдіремін. Күндіз-түні тыным таппастан еңбек етуде. Ал бүкіл қазақстандықтарды карантиннің талаптарын қатаң сақтауға шақырамын. Коронавируспен ойнауға болмайды. Жаңалықтарда айтылып жатқан ресми ақпараттардың барлығы рас. Инфекция қарым-қатынас жасау арқылы жұғады. Барлық адамның отбасы, жақын араласатын кісілері бар. Алғашқы кезде аурудың белгілері білінбеуі де мүмкін. Сондықтан әрдайым сақ болған жөн» дейді ауруханадан жазылып шыққан бойжеткен.
«Мен шетелден ұшып келгендіктен бірден карантинге жатқызды. Құдайға шүкір, қан талдамасы теріс нәтиже көрсетті. Карантин кезінде дәрігерлер үнемі қасымда болып, қызуымды өлшеп, психологиялық түрде қолдау көрсетіп, барлық көмектерін аямады. Ауруханада науқастарға жақсы жағдай жасалған. Күніне бес мәрте тамақ береді. Қазақстанда осындай кәсіби дәрігерлердің бар екені мені қатты қуантты» дейді тағы бір жас жігіт ағынан жарылып.
Шынында коронавирусты анықтау, науқастарды емдеу және вирустың одан әрі таралмауы үшін аянбай еңбек етіп жатқан ақ желеңді жандарға қандай алғыс айтса да жарасады.