Аймақтар • 09 Сәуір, 2020

Дәрігерлердің жақсы күнге деген сенімі мол

98 реткөрсетілді

Бүгінде атышулы індет ғаламды ауыр күйге түсіріп, қоғамның қос өкпесін қысып барады. Әлем бойынша сәт санап өршіген қауіпті құбылыс қазақ даласына да жетті. Елімізде індеттің алдын алу мақсатында тиісті шаралар да қабылданды. Өңір-өңірлердегі жағдай да жұртшылықтың алаңдаушылығын тудыруда. Расында бас ауырып, балтыр сыздай қалса, адам бірден дәрігердің көмегіне жүгінеді. Ал бүгінгідей жағдайда әрбір тұрғынға ақ халатты абзал жандардың көмегі тіпті қажет. Науқас жандарды емдеу үшін басын қатерге тіккен барша дәрігерлердің ерлігі бүгінде мемлекет тарапынан лайықты бағалануда.

Мемлекет басшысы Қасым-Жомарт Тоқаев өзінің мәлімдемесінде «Коронавирус – батпандап кіріп, мысқалдап шығатын қауіпті дерт. Дегенмен, біз індетке шалдыққан адамдарға барлық қажетті көмекті көрсетеміз. Бүгінде бүкіл еліміз дәрігерлер мен медицина қызметкерлерінің қайсарлығына тәнті болуда. Олар – адам өміріне араша түсіп жатқан бүгінгі күннің батырлары», деген болатын. Сонымен қатар, Президент пандемияға қарсы күрестің алдыңғы легінде жүргендерге қосымша қолдау көрсету жөнінде шешім қабылдағанын, дәрігерлерге және медицина қызметкерлеріне 3 ай бойы қосымша үстеме ақы төленетінін жеткізген еді. Мемлекеттің бұл қолдауы ақ халатты абзал жандарға артылған үлкен сенім болып отыр. Шынында да бүгінде еліміз бойынша коронавирус инфекциясын жұқтыру дерегі күн сайын өсуде. Бүгінде Жамбыл облысында індет жұқтырудың 45 жағдайы тіркелген. Індет белгілері Қырғыз, Ресей, Үндістан мемлекеттерінен және Нұр-Сұлтан, Қостанай өңірлерінен келген азаматтардан анықталған. Облыстық әкімдіктің мәліметінше, қазір науқастардың жағдайы жақсы, шағымдары жоқ. Ал, қауіпті індетті жұқтырған азаматтарды емдеу, сауықтыру жолында қызмет атқарып жүрген дәрігерлердің еңбегі орасан. Өзі де дәрігерлермен бірге науқастарды емдеп жүрген облыстық көпбейінді балалар ауруханасы бас дәрігерінің инфекциялық жұмыс бойынша орынбасары Серік Жетібаев өңірдегі ақ халатты абзал жандардың табанды жұмысы жөнінде әңгімелеп берді. «Облыс орталығында науқастарға арналған арнайы бокстар бар. Індет жұқтырғандар сол жерде жатыр. Дәрігерлер мен медицина қызметкерлері жеткілікті. Олардың бәрі де оқыған мамандар. Мемлекет басшысы Қасым-Жомарт Тоқаевтың тапсырмасымен, облыс әкімі Бердібек Сапарбаевтың қолдауымен барлық мәселе реттелген. Барлық жағдай облыстық

Жалпы, Серік Жетібаевтың айтуынша, жамбылдық дәрігерлер бүгінде қауіпті індеттің алдын алу мақсатында жұмыс атқаруда. Науқастарды емдеп жатқан 55 дәрігер мен медицина қызметкерлері бүгінде Тараз қаласындағы «Інжу» қонақүйінде орналасыпты. Олар бірнеше күннен бері үйіне бармай, осында тұрып жатыр екен. Медицина қызметкерлерін қауіпсіздік үшін аурухана мен қонақүй арасына арнайы автобустар тасымалдайды. Егер індет жұқтырған науқастар қатары көбейген жағдайда оларға көмек көрсетуге тағы 255 дәрігер мен медицина қызметкерлері дайын отыр. Негізі коронавирус індетінің байланыс арқылы жұғатынын мамандар жиі айтуда. Бұл салмағы ауыр вирус болғандықтан, ол адамның қолына, ұстаған заттарына жабысып қалуы мүмкін екен. Ал, өзінің қауіпсіздігінен гөрі өзгенің жайын көп ойлаған дәрігерлер індеттің қауіптілігіне қарамай, басын бәйгеге тігуде. Медицина қызметкерлері адамның түрлі ағзалары арқылы жұғуы мүмкін індеттен барынша қорғанса да, індеттің аты індет. Өзі де науқастарды емдеу ісіне белсене кірісіп жүрген дәрігер Серік Жетібаевтан біз індет жұқтырған адамдарды емдеу кезінде медицина қызметкерлерінің қалай сақтанатынын сұрап көрдік. Арнайы костюм, көзілдірік, ауызға тағатын респиратор, арнайы аяқ киімдер – олардың басты қорғанысы екен. Әрі бұларды 3 сағат сайын ауыстырып тұру керек. Бірақ, бұл киімдерді кию кезінде де дәрігер қателік жіберіп қойса, яғни сәл ғана ауа кіретін орын қалса, онда індеттің жұғып кету қаупі жоғары. Дәрігерлердің өз өмірін қатерге тіге отырып, өзгенің өмірін сақтап қалу кезіндегі ерлікпен бірдей ерен еңбегі көпке үлгі.

Қуанышқа қарай, әзірге Жамбыл облысынан коронавирус індетіне байланысты адам өлімі тіркелген жоқ. Өңірде мейлінше қауіпсіздік шаралары күшейтілген. Серік Жетібаев әулиеаталық дәрігерлердің жақсы күнге деген сенімінің жоғары екенін айтты. Тіпті науқастардың ауруы асқынған жағдайда да тыныс алу аппараттарының дайын, орындардың жеткілікті екенін жеткізді. Бірақ, дәрігерлердің індет жұқтырғандарды барынша емдеп, жазуға кіріскендігін айта кеткен жөн.

 

Жамбыл облысы

Соңғы жаңалықтар

Қыршын кеткен саңлақ

Спорт • Бүгін, 17:35

Ұқсас жаңалықтар