Аймақтар • 11 Сәуір, 2020

Алакөлдік кәсіпкер коронавирусті анықтайтын экспресс тесті тегін таратты

223 рет
көрсетілді
1 мин
оқу үшін

Төтенше жағдай кезінде жұқпалы індеттің алдын алу мен сақтық шараларының күшеюі ауыл-аймақтағы ағайынға  салмақ түсіруде. Әсіресе, дәрі-дәрмек пен қажетті керек-жарақтың жеткілікті болуы күн тәртібіне шықты. Осы тұста атқарушы билікке тұрғындарды медициналық маска, басқа да індеттен сақтау құрылғыларымен қамтуға кәсіпкерлер қол ұшын созды.

Алакөлдік кәсіпкер коронавирусті анықтайтын экспресс тесті тегін таратты

Алматы облысында бұл іске барлық деңгейдегі кәсіпкерлер үлес қосып жатыр. «Біз біргеміз» акциясы арасында мұқтаж отбасыларға тегін азық-түлік  тарату шарасы барлық аудандарда, күн сайын өткізілуде. Бұдан бөлек қалталы азаматтар өз қаржысына адам бойындағы дерт белгісін жылдам анықтайтын медициналық тест құрылғысын да сатып алып, тегін таратып отыр екен. Мысалға, бұл сантта алдымен Алакөл ауданының кәсіпкерлерін айтуға болады. Аудандағы  белсенді іскердің бірі Нұрлан Белгібаев аудан тұрғындарының денсаулығын тексеруге қажетті экспресс тест сатып алып, аудан әкімдігіне сыйға тартты. Ол бұл мақсатқа 1 млн 100 мың теңге жұмсапты.

Осындай қиын-қыстау кезеңде қол ұшын созған  жомарт жанға аудан әкімі Әлібек Жақанбаев аудан тұрғындарының қамы үшін жасалған көмекке шексіз ризашылығын білдіріп, аталған экспресс тест қорабын аудандық орталық ауруханаға қолданысқа тапсырды. Жалпы бұған дейін де кәсіпкер өз қаражысына дене қызуын өлшеуге арналған  30 пирометр аппаратын сатып алып, оны да аудандық аурухана берген болатын.

Алматы облысы