Мәскеу қалалық сайлау комиссиясы қала басшысы қызметіне үміткерлердің жинаған дауыстары бойынша алдын-ала санақ жүргізді. Бұл туралы РИА «Новости» хабарлады.
Алдын-ала жүргізген санақтың нәтижелері бойынша, Сергей Собянин – 51,37, Алексей Навальный – 27,24, коммунист Иван Мельников – 10,69, «Яблоко» партиясының көшбасшысы Сергей Митрохин – 3,51, Ресей либералды-демократиялық партиясының өкілі Михаил Дегтярев – 2,86, Әділетті Ресей партиясының өкілі Николай Левичев – 2,79 пайыз дауыс жинаған көрінеді.
Мәскеу қалалық сайлау комиссиясының мәлімдеуіне қарағанда, қала басшысын таңдауға сайлаушылардың 32,07 пайызы қатысқан.
«Алдын-ала белгілі болған нәтижелерге қарағанда, сайлау бір айналыммен аяқталып отыр. Сайлаудың екінші айналымы болмайды», – деп хабарлады Мәскеу қалалық сайлау комиссиясының басшысы Валентин Горбунов.
«Біз сайлаудың нәтижесімен келіспейміз. Сайлау екі айналымнан тұруы керек», – деп мәлімдеді Алексей Навальный.
Өз кезегінде Сергей Собянин көпшілік алдында жеңісіне сенімді екенін айтты. «Қорытынды нәтиже бойынша біз бәрібір жеңіске жетеміз», – деді ол.
Айдар Өрісбаев.
