Жақында ойылдықтар қос бірдей қуанышқа кенелді. Бұл ауданда екі жаңа мектептің ашылуына байланысты болды. Ақшатау ауылында пайдалануға берілген жаңа мектептің ашылу салтанатына ауылдықтар тайлы-тұяғы қалмай жиналды десе де болғандай. Мұның себебі де бар. Аудандық білім бөлімінің басшысы Саян Сүлейменовтің айтуынша, ақшатаулық балалар бұған дейін апатты жағдайдағы 9 жылдық мектепте оқып келіпті. Енді, міне, кең де жарық жаңа мектеп пайдалануға беріліп,10-сынып ашылып, білім ұясы орта мектеп мәртебесіне ие болып отыр. Жаңа мектептің құрылысымен «Бөбек құрылыс» жауапкершілігі шектеулі серіктестігі айналысқан.
Жақында ойылдықтар қос бірдей қуанышқа кенелді. Бұл ауданда екі жаңа мектептің ашылуына байланысты болды. Ақшатау ауылында пайдалануға берілген жаңа мектептің ашылу салтанатына ауылдықтар тайлы-тұяғы қалмай жиналды десе де болғандай. Мұның себебі де бар. Аудандық білім бөлімінің басшысы Саян Сүлейменовтің айтуынша, ақшатаулық балалар бұған дейін апатты жағдайдағы 9 жылдық мектепте оқып келіпті. Енді, міне, кең де жарық жаңа мектеп пайдалануға беріліп,10-сынып ашылып, білім ұясы орта мектеп мәртебесіне ие болып отыр. Жаңа мектептің құрылысымен «Бөбек құрылыс» жауапкершілігі шектеулі серіктестігі айналысқан.
Жаңа мектептің ашылу салтанатына облыстан арнайы келген осы өңірдің тумасы, ардагер дәрігер Тұрар Шериязданов «Көркейе бер, туған жер» акциясы аясында мектепке компьютер сыйлады.
Құмжарған ауылындағы Соркөл орта мектебінің ашылу салтанатында сөз алған облыс әкімінің орынбасары Сара Нұрқатова: – Ауылдарыңызда сәулетті де еңселі білім ұясы бой көтерді. Жаңа мектеп құтты болсын! Ақтөбе облысында соңғы он жылда 51 жаңа мектеп салынды. 43 апатты жағдайдағы білім ғимараттары күрделі жөндеуден өткізілді. Ал Ойыл ауданында өткен жылы 4 мектеп ашылса, биыл екі бірдей білім шаңырағы бой көтеріп отыр. Ендігі мақсат – оқушылардың сапалы білім алуына қол жеткізу болмақ – деді.
Жаңа мектептің лентасы қиылғаннан кейін, әжелер шашу шашты. Қонақтар жаңа мектепті аралап көрді. Мектеп ғимаратының құрылысына 170 миллион теңге жұмсалған.
Сатыбалды СӘУІРБАЙ,
«Егемен Қазақстан».
Ақтөбе облысы.
