Құлсары қаласындағы жұмысшыларға жасалған тесттік сынақтың қорытындысы бойынша 12 мамырда кешкі сағат 21:45-те «Жылыоймұнайгаз» МГӨБ-ның бір қызметкерінен коронавирус инфекциясының белгісі анықталды. Жылыой аудандық тауарлар мен көрсетілетін қызметтердің сапасы мен қауіпсіздігін бақылау басқармасына хабарланды. Сол күні сағат түнгі 24:00-де науқас мамандырылған стационарға карантинге жатқызылды. Онымен байланыста болған адамдардың барлығы анықталуда. Жылыой аудандық тауарлар мен көрсетілетін қызметтердің сапасы мен қауіпсіздігін бақылау басқарманың келісімімен «Жылыоймұанйгаз» МГӨБ-да вахта ауысымы жалғасатын болады.
Қазір «Ембімұнайгаз» АҚ-ның 1 120 қызметкері ПТР-тест сынағынан өтті. Сонымен қатар, вахталық кенттердің қызметін қамтамасыз ететін мердігер мен сервистік мекемелердің қызметкерлері де міндетті түрде тест сынағынан өтуде. Мамандарды тесттік сынақтан өткізу шарасы кестеге сай Атырау қаласы мен Жылыой ауданының Құлсары қаласындағы «Олимп» диагностикалық зертханасында дистанциондық талапқа сай жүргізілуде. Өндірістік құрылымдық бөлімшелердің жұмысшыларын тесттен өткізу үшін жылжымалы зертхана Аққыстау ауылы, Мақат, Доссор кенттерінде, сондай-ақ, Жамансор стансасында ұйымдастырылуда.
