Аманбала әже Сарысу ауданы, Жайлаукөл ауылының тұрғыны. Ғасырдан астам өмір сүрген кейуана тірлікте талай қиындықты көрсе де, мойымаған жан. Талай жыл тылда еңбек етеді. Совхозда сақманшы болып, қой қырқып, мал шаруашылығына араласады. Соғыс жылдары соқа айдап, бидай орып, шөп шауып, бейнетті тірлік кешеді. Сол бір қиын күндерді тебіреніспен еске алған Аманбала әже енді соғыстың болмауын тілейді. Бүгінгі жастарға еңбек етуді, адал мал табуды өсиет етеді. «Құдайдың берген бақыты – жүз оныншы көктемімді қарсы алып отырмын. Осы күніме шүкір. Адам баласының басты арманы – ұрпақ өсіру ғой. Ата-аналық парызымызды адал атқардық деп ойлаймын», дейді кейуана.
Аманбала әже 1910 жылы қаңтар айында Сарыарқа жерінде дүниеге келіпті. Сонау қиын-қыстау жылдары Арқадан Әулиеата жеріне қарай ағылған халықтың арасында қаршадай қыз Аманбала да болады. Содан көппен бірге бүгінгі Сарысу ауданының аумағына тұрақтайды. 1928 жылы осы ауданның құрылуына атсалысады. «Тарихымыздағы сол бір қаралы күндерді дұшпаныма да тілемеймін. Аштықтан бұратылған ел не көрмеді? Жол бойы талай адам аштықтан көз жұмды. Бәрін көзіміз көрді», дейді Аманбала әже. Тағдырдың жазуымен 1926 жылы Балтабай Аманжолов екеуі шаңырақ көтереді. Жаңадан отау құрған жас жұбайлар сол кезеңдегі ашаршылық, қызыл қырғын, соғыс сияқты ауыртпалықтарды бірге көріп, бастан өткереді. Жолдасы майданға аттанады. Тағдыр салған ауыртпалықтың бәрін сабырмен жеңіп, еңбекпен есейген ардақты әже 11 баланы дүниеге әкеліпті. Бүгінде жарық дүниеде қалған 5 баласынан өрген немере, шөберелерінің амандығын тілеп отырған өнегелі жан. Аманбала Аманжоловаға тылдағы, совхоздағы ұзақ жылғы еңбегі үшін Сарысу ауданының Құрметті азаматы атағы берілген екен. Тағдырға да, елге де риза кейуана тәуелсіздіктің мәңгілік болуын, жастардың амандығын тілейді.
Жамбыл облысы
