Коронавирус • 18 Мамыр, 2020

Қазақстан COVID-19 вакцинасын әзірлеуші елдердің қатарына қосылды

89 реткөрсетілді

Дүниежүзілік денсаулық сақтау ұйымы қазақстандық ғалымдардың әзірлемесін тіркеуге алды және клиникаға дейінгі сынақтан өткізуге рұқсат берілген кандидаттық вакциналардың тізіміне қосып, ресми сайтында жариялады. Бұл туралы Білім және ғылым министрлігі хабарлады. 

Бұған дейін коронавирусқа қарсы вакцинаны Биологиялық қауіпсіздік проблемалары ғылыми-зерттеу институтының әзірлегені және оның дайындалу барысы жөнінде кеңірек тарқатып жазғанбыз. Аталған отандық өнім Қазақстан аумағында COVID-19 инфекциясын жұқтырған адамдардан бөлінген вирус штаммының негізінде жасалды.

Білім және ғылым министрі Асхат Аймағамбетов осындай нәтижеге қол жеткізген ғылыми-зерттеу институтының қызметкерлерін құттықтады. Министр жолдаған жеделхатта:

«Бұл – қазақстандық ғылымның мемлекетіміздің биологиялық қауіпсіздігін қамтамасыз етуге қосқан елеулі үлесі, сондай-ақ елдің мықты ғылыми әлеуетінің дәлелі. Институт ұжымы қауіпті және аса қауіпті ауруларға қарсы вакциналардың жаңа түрлерін әзірлеуде өз маңыздылығын тағы бір мәрте дәлелдеді», делінген.

Мінекей, енді Қазақстан ресми түрде COVID-19 вирусына қарсы инактивтендірілген вакцинаны әзірлеуші елдердің қатарына қосылды. Демек, институт ғалымдары клиникаға дейінгі сынақ жүргізуді бастайды.  

Айта кетейік, Биологиялық қауіпсіздік проблемалары ғылыми-зерттеу институты қауіпті және аса қауіпті ауруларға қарсы вакциналардың 67 түрін, 15 тест-жүйе мен 30-дан астам биопрепараттарды әзірлеп, өндіріске енгізгенін естеріңізге сала кетейік. Олардың арасында құстардың жоғары патогенді тұмауы мен жоғары патогенді шошқа тұмауына, нодулярлық дерматитке қарсы вакциналар, сондай-ақ бруцеллезге қарсы жаңа векторлық вакцина да бар.

 

 

Соңғы жаңалықтар

Ұқсас жаңалықтар