– Еңбек Кодексіне 131 өзгерістер мен толықтырулар енгізілді. Атап айтсақ, 67 бап өзгертіліп, 41 талап жаңарды. Осы өзгерістерді халыққа түсіндіру мақсатында Еңбек инспекциясы және көші-қон басқармасы, «Шымкент қаласы кәсіподақтар орталығы» аумақтық кәсіподақтар бірлестігі және Шымкент қаласының кәсіпкерлік палатасымен бірлесе жұмыстар жүргізілуде. Осыған байланысты 140 ірі мекемеге, оның ішінде 65 мемлекеттік мекемеге және 75 жеке мекемеге хат жолданды. Қазіргі таңда кәсіпорын басшылықтары түсіндіру жұмыстарына дайын екендіктерін хабарлап, соған сәйкес мекемелердің кестесі жасақталуда. Ал карантин аяқталғаннан соң, басқарманың мемлекеттік еңбек инспекторлары тарапынан ақпараттық-түсіндіру жұмыстары жүргізіледі, – деді Бауыржан Ахметәліұлы.
Айта кетсек, аталған Заң еңбек шарттарын түзу және есепке алу процесін автоматтандырады. Осыған байланысты «еңбек шарттарын есепке алудың бірыңғай жүйесін» және еңбек саласында жұмысшылардың құқықтары мен бостандықтарына шектеу жасау фактілер бойынша жұмысшыларды жауапкершілікке тарту нормасы енгізілген. Сондай-ақ бұрын жұмысшыны әскери қызметте борышын өтеуге шақыртулар еңбек шартын тоқтатуға негіз болған болса, қазір жұмыс берушіге азаматтың жұмыс орнын сақтауды міндеттеуді қарастырады.
Оған қоса, еңбек шартында жұмысшымен келісім бойынша хабарлама бермей-ақ, өтемақы төлемін жүргізіп, жұмыс берушіге еңбек шартын тоқтатуға мүмкіндік берген 50-баптың 3-тармағы алынып тасталған. Бұл ретте еңбек қауіпсіздігі және еңбекті қорғау жөнінде әлеуметтік әріптестік саласында нақтылау сипатына өзгеріс енгізілген.
