Аймақтар • 03 Маусым, 2020

Қарағандының барлық мектептері мен балабақшаларына жөндеу жүргізіледі

63 рет көрсетілді

Қарағанды облысында мектеп бітірген түлектер аттестат алып жатқанда, өңір басшысы кеншілер астанасындағы жөндеу жүргізіліп жатқан білім ошақтары мен балабақшаларды аралап шықты.

Жеңіс Қасымбек «Жұмыспен қамтудың жол картасы» бағдарламасы аясында істелініп жатқан жұмыстардың барысымен танысып, мердігер компаниялардың міндеттерін қалай атқарып жатқанын тексерді.

Ең бірінші аялдаған нысан қаладағы №2 музыка мектебі болды. Қабырғасы 1948 жылы қаланған білім ордасында күрделі жөндеу деген өмірі жүргізілмеген екен. Бұл турасында аталған мектептің директоры Марат Мәжитов айтып берді.

1

– Мектепте соңғы рет ағымдағы жөндеу 29 жыл бұрын болған. Жылда бөлінетін қаржы тек майда-шүйде жұмыстарға ғана жетуші еді. Қазір күрделі жөндеу басталды. Бәрін де жаңасына ауыстырамыз. Енді бізде жаңа жылу және электр жүйесі, сантехника болады. Біз үшін бұл үлкен қуаныш. Жазғы демалыстан соң балаларды жаңартылған мектеп күтіп алатын болады, – дейді мектеп басшысы қуанышын жасыра алмай.

Оқушыларының саны 650 бала болатын бұл мектептің жөндеуіне бюджеттен 78 миллион теңге бөлінген.

2

Бұдан кейін облыс басшысы Майқұдық елді мекеніндегі №13 мектепке ат басын тіреді. Осыдан 34 жыл бұрын салынған мектепте күрделі жөндеу бірінші рет жүргізіліп жатыр екен. Ғимараттың шатыры ауыстырылып, қасбеті жаңартылады. Жаңа терезелер, жылу жүйесі орнатылып, электр монтаждау жұмыстары жүргізіледі. Сондай-ақ, мектеп аумағы көркейтіліп және жаңа шарбақпен қоршалмақшы.

– Мектеп қаладағы белгілі нысандардың бірі. Жөндеу жұмысына қомақты қаржы бөлінді. Бәрін де балалар үшін жасап жатырсыздар, сондықтан жұмыстың сапасын мұқият қадағалаңыздар. Сіздерге үлкен жауапкершілік артылып отыр. Жұмыс біткен соң, өзім келіп тексеретін боламын, – деді  Жеңіс Қасымбек жөндеу жұмыстарымен айналысып жатқан құрылыс компаниясының басшысына қарата.

Жалпы, Қарағанды қаласында барлығы 133 білім беру нысаны бар. Биыл бұлардың бәріне де жөндеу жүргізіледі. Мұның ішінде 29 мектепте күрделі жөндеу, ал  41 білім ошағында ағымдағы жөндеу жұмыстары қолға алынады. Сонымен қатар,  95 мектептің аулалары абаттандырылады.

7

Қарағанды қалалық білім бөлімінің басшысы Гүлсім Қожахметова бұрын  мектеп аулаларын абаттандыруға ақша ешқашан бөлінбегенін және білім мекемелерінің аумақтарын директорлар күні кешегіге дейін өз күштерімен реттеп келгендерін айтты. Ал күрделі жөндеуден жыл сайын тек екі мектепті өткізуге ғана мүмкіндік болған.

– Биыл жөндеу жұмыстарына мол қаражат бөлінгеніне өте қуаныштымыз.  Енді барлық нысандарды толықтай ретке келтіруге мүмкіндік туды, – дейді ол.

Облыс басшысы мектептер мен балабақшалардан басқа Майқұдықтағы мәдениет үйінде, «Нұрби» аула клубында және «Литейщик» стадионында болып, ондағы жөндеу жұмыстардың қалай атқарылып жатқанын тексерді. Қазіргі таңда жұрттың салматты өмір салтына деген көзқарасы жақсы жағына қарай өзгерген. Сол себепті де аталған спорт нысаны жергілікті тұрғындардың жіті назарында. Жергілікті халықтың өтінішін жерге тастамаған облыс әкімінің тапсырмасынан кейін, қаржыландыру көзі табылып, қазіргі уақытта аталған  стадионда жөндеу жұмыстары жүріп жатыр.

Жөндеу жүргізіп жатқан «Дорстройтрест» ЖШС директорының құрылыс жөніндегі орынбасары Максим Воробьев жұмыстың тамыз айында аяқталатынын мәлімдеді. Стадионда жасанды көгал алаңы, тартан төселген жүгіру жолдары, қоршау, жарықтандыру тіректері, киім шешетін орындар, дәретхана, әкімшілік және күзет блоктары болады.

Жеңіс Қасымбек Майқұдықтағы аулаларды абаттандыруға, ол жерлерде спорттық нысандардың болғанына айрқыша назар аударылатынын атап өтті. Өңір басшысы сол жерде Октябрь ауданының әкімі  Мейрам Кожуховқа 150 мыңға жуық халық тұратын Майқұдық елді мекенінде тағы да он жаңа футбол алаңын салуды тапсырды.

Сондай-ақ, ол мердігер компания өкіліне стадиондағы жөндеу жұмыстарын уақытында және сапалы етіп бітіру керектігін ескертті.

Жұмыс сапарының соңында облыс әкімі  «Жұмыспен қамтудың жол картасы» бағдарламасын жүзеге асырудың маңызы мен жауапкершілігін тағы бір мәрте еске салды. «Барлық жұмыс кестедегі мерзімнен ауытқымауы керек.  Жергілікті әкімдер жұмыс сапасын ұдайы бақылап отыруы тиіс», деп қорытты Жеңіс Қасымбек. 

 

Қарағанды облысы

Соңғы жаңалықтар

COVID-19-дан барлығы 375 адам қайтыс болды

Коронавирус • Бүгін, 08:54

Жауапкершілік танытайық

Пікір • Бүгін, 07:35

Табиғатты аялауға үйретейік

Экология • Бүгін, 07:30

Отандық өндіріс көлемі артады

Медицина • Бүгін, 07:19

Атырауға жедел жәрдем керек

Аймақтар • Бүгін, 07:13

Қарға адым жер мұң болған...

Қоғам • Бүгін, 06:40

Айя Софияда азан шақырылады

Руханият • Бүгін, 06:35

Салмағы 92 грамдық принтер

Технология • Кеше

Қашықтан оқып, тіл үйрен!

Білім • 11 Шілде, 2020

Ұқсас жаңалықтар