Саясат • 04 Маусым, 2020

Көк Туды көрсеткен сәт

255 рет көрсетілді

Бұрынғы Жоғарғы Кеңестің баспасөз қызметі тәуелсіз еліміздің мемлекеттік рәміздерін әзірлейтін комиссияның тұрақты істейтін жұмыс тобы болып белгіленген соң, осы жерде кәсіби қызметімізді атқарып жүргендіктен, тәуелсіз еліміздің қасиетті таңбаларының әзірлену процесінің тікелей қатысушысы һәм қабылдану тарихының куәгері болуға тура келгенін газет өтінішіне сай қайта еске алуды жөн көрдік.

Тәуелсіз Қазақстанның бола­шақ жалауын, Мемлекеттің Ел­таң­басын көз алдына елес­тет­кен қа­лың көпшілік ма­ман­­дығына, жа­­сына, қызме­тіне қарамастан, осы тұста әр­түр­лі нысандағы жо­ба­ларын жұ­мыс тобына жолдап жатты. Жұмыс тобы бұл жоба­­ларды рет-ретімен комиссия от­ыр­ыс­тарында қарауға дайын­дап, қарау нәтижелері бойынша ірік­теп, қазылардың тал­қы­сына қай­та ұсынып отырды.

Осындай жан-жақты және сарабдал саралаудың нәтижесінде барып ақырғы жоба пайда болды. Қазір Қазақстанның әлемге әйгілі Көк Туы мен Мемле­кет­­тік Елтаңбасын көр­генде, бұ­лар­дың бас­тап­қы нұсқаларын, алғаш түс­кен басқа да жүздеген «аталас аға­йын­дарын» жоба күйінде өзі­міз авторларынан қабылдап алып, бөлмеден бөлмеге тасып, комиссияның қарауы үшін орын-орнына қойып орна­лас­ты­рып дегендей, сол кезде ат­қа­рыл­ған ұйымдастыру жұ­мыс­­тары көзге елестеп өтеді...

Еліміздің рәміздері туралы сөз болғанда, қоғам қайраткері, бел­­гілі қаламгер марқұм Ербол Шай­мерденұлының есімі ерекше һәм құрметпен аталуға тиіс. Сол кезеңде Жоғары Кеңестің бас­пасөз хатшысы болып істеген Ербол Шаймерденұлы жаңа қазақ рәміздері пайда бо­­л­уының бастауында жүріп, оның тарихи, ғылыми және пр­ак­­тикалық негіздерін зерделеп, өзінің білімі мен білігін ар­нап, ұйымдастырушылық қа­бі­летін айрықша көрсетті. Оның 1993 жылы ардақты Әбіш аға Кекілбайұлының алғы­сө­зі­мен жедел басылып шық­қан тұңғыш кі­та­бы тәуелсіз ел рә­міз­дерін та­нытуға бірінші болып жол ашты.

Жоғарғы Кеңестің бас­па­сөз қызметінде Ербол Шай­мер­ден­ұлымен бірге қызметтес бол­ған журналист Еркін Зікі­ба­ев екеу­міз сол кезде Жан­дар­бек Мәлібеков пен Шота Уә­ли­ханов­тың шығармашылық-авторлық бірлігінен туған мемлекеттік Елтаңба бейнесін Жоғарғы Кеңес сессиясының сахнасына алып шыққан суретіміз соңынан ақпарат құралдарында жарияланды, бірқатар кітапта да жарық көрді.

Соның бірі – Елбасы Нұр­сұл­тан Әбішұлы Назар­баев­тың мемлекеттік ту бекі­ті­ле­тін кезде суретші, Қазақ­с­тан­­ның еңбек сіңірген қай­рат­­кері Шәкен Оңласынұлы Ни­яз­­беков әзірлеген, осы күнгі ту жобасының әр бөлшегін депутат­тарға түсіндіріп отыр­­ған сәті еді. Бұл – «Егемен Қазақстан» газетінің фото­тіл­шісі Шүкір Шахай 1992 жылы түсірген, мем­лекеттік рәміз­дер­дің қа­был­дану шежіресін баяндайтын ең­бектерге, авторлық жи­нақ­тар­ға енген сурет. Кө­гіл­дір аспан төсінде, алтын күн­нің аясында еркін қа­лық­та­ған қыран бейнелі Қазақ елінің бе­ре­келі болашағын осы кездің өзінде айқын елестете алған Елба­сымыз сол күні көк түстің, «көк» сөзінің халық санасында сақталған қа­сиет­­терінен бастап, ел туының ерекше белгілерін ізеуіртті баян­­дап, байыпты ұғ­ын­­дырғаны ұмы­тыл­мас­тай есте қал­ды.

Тәуелсіз еліміздің мем­ле­кет­­тік рәміздерінің әзірлену және қабылдану процесін бас­тан кешіру бақыты бұйырғаны әлбетте көңілді әркез марқайтып оты­рады. Тарихтың осынау бір сәтінде – жас тәуелсіз Қа­зақ мемлекетінің негізін қа­лау­­шы Тұңғыш Президент – Елбасымыздың жанында мем­лекеттік тудың суретін ал­ғаш көрсетіп тұрған, отыздың бел ортасындағы бұйра шашы бұр­қы­раған жігітіңіз біз боламыз десек, әрине сенерсіздер.

 

Серікқали БАЙМЕНШЕ,

Еуразиялық экономикалық комиссияның бөлім бастығы,

филология ғылымдарының докторы, Қазақстанның құрметті журналисі

 

МӘСКЕУ

 

Соңғы жаңалықтар

Ұлттың батыр ұланы

Қазақстан • Кеше

Шекарада шектеу бар

Қазақстан • Кеше

Ұқсас жаңалықтар