Өндірістік экология өзектілігін жоймай тұр

Экология • 05 Маусым, 2020

Өндірістік экология өзектілігін жоймай тұр

25 рет көрсетілді

Өскеменнің экологиялық жағдайы баршаға мәлім. Шаһарда қоршаған ортаны ластайтын өндіріс орындары аз емес. Жұмыстан қолымыз қалт еткенде осы тараптағы мәселелермен шұғылдануға тура келеді.

Egemen Qazaqstan

Мәселен, былтыр облыстық қоғамдық кеңестің сарапшылар тобы Үлбі металлургия зауыты қала шетінде өздерінің қалдық қоймасын заңсыз кеңейтіп жатқанын анықтады. Осы жағдайға байланысты әсіресе жобаның жер асты суларына үлкен зиян келтіретінін айтып, өзімнің Instagram және Facebook парақшамда жазба жарияладым. Бұл тақырып қоғамда резонанс тудырғаннан кейін «Қазатомөндіріс» ұлттық компаниясы мен Экология, геология және табиғи ресурстар министрлігі 2020 жылы ақпанда қоршаған ортаны бірлесе қорғау жөніндегі меморандумға қол қойды. Осы келісімшарт аясында енді ҮМЗ-нің радиоактивті қалдықтары бұрынғы Семей полигонының аумағына көміледі деп күтілуде. Бұл – қала тұрғындары үшін жағымды жаңалық.

Жуықта Өскемен қалалық әкімдігі қызметкерлері шаһардың Ушанов алаңындағы ағаштарды кеспек болғанда әзер дегенде тоқтаттық. Жолға орташа жөндеу жұмыстарын жүргізбек болған әкімдік өкілдері тұрғындардың келісімінсіз және ешқандай қоғамдық тыңдау өткізбестен 28 шыршаны алып тастамақ болған. Бұл Экологиялық кодекс талаптарына қайшы келеді. Абырой болғанда, 2016 жылы өткен қоғамдық тыңдаудың хаттамасының көшірмесін тауып алып, әлеуметтік желіде пост жарияладым. Ол жиында жасыл алқаптарды сақтау мәселесі көтерілген еді. Нәтижесінде әкімдіктің жоспарына өзгеріс енгізіп, ағаштарды кесуге жол бермедік.

Біздің ұсыныс-бастамамызды Экология министрлігі үнемі құптап, қолдап отырады. Ал жергілікті жерде бұл тарапта біршама қиындық бар. Көбі қолдау таппай жатады. Өскеменде қоршаған ортаның ластану мәселесі әлі де өзекті. Кәсіпорындар ауаға тарайтын шығарындыларын азайтқанның орнына көбейтіп жатыр. Зауыттар бұл тарапта жүйелі жұмыс жүргізбейді. Менің көңіліме жақпайтын бір дүние, жергілікті әкімдік өкілдері халықтың емес, кәсіпорындардың қамын көп ойлайды. Шара қолданып, халықтың денсаулығын ойлағанның орнына керісінше оларды қолдайды. Қала тұрғындары да экологиялық мәселелерге селқос қарайды. Мәселені ашық айтқаннан гөрі сырттай бақылағанды жақсы көреді. Сондықтан алдағы уақытта осы бағыттағы ойға алған жұмыстарымды жандандыра берсем деген ойым бар.

Дәулет АСАНОВ,

Шығыс Қазақстан облысы бойынша эко-амбассадор

ӨСКЕМЕН