Руханият • 17 Маусым, 2020

Карантин: Оқырман талғамы қалай өзгерді?

30 рет көрсетілді

Әдетте адам баласы кітап оқиын десе, я уақыты болмайды, я құлқы болмайды. Әгәрәки, қым-қуыт тіршіліктен мойны жар бермей жүрген адам болса (бірақ, оқуға деген ниеті түзу), кешірімді. Ал кітап оқитын уақыты да, құлқы да жоқтық – қасірет. Қоғамға бір уақыт үнсіздік әкелген пандемияның іліп-алар жалғыз игілігі – бос уақыт болғаны рас. Кітапсүйер оқырман осы мүмкіндікті молынан пайдаланған секілді. Мәселен, соңғы айларда Сингапур мен Италияда балалар кітаптарына сұраныс көбейсе, Бразилияда экономикаға, ал іргеміздегі Ресей фантастиканы, Исландия ғашықтық романдарды оқуды құп көріпті.

Коллажды жасаған Амангелді Қияс, «EQ»

Орыс оқырмандарының талғамы фантастика мен фэнтези жанрларына ауғаны – бүгінде қатты қарқын алып жатқанын байқадық. Тіпті бұл тақырыптағы шығармаларды ондағы әр төртінші адам оқиды. Ал Сингапурда балаларға арналған аудиокітаптар жиі тыңдалған. Барша аудиокітаптардың ішінде балалар әдебиетінің оқылуы бұған дейін 15 пайызды құраса, карантин уақы­тында 24 пайызға өскен.

Швециялықтар қандай кітап оқуда десеңіз, олар детектив пен триллерден бас алмай отыр. 45 пайыз оқырман, салыстырмалы түрде, үлкен көрсеткіш. Қызығы сол, Мексикада бұл жанрды 11 па­йыз ғана оқырман таңдаған. Ондағы жұрт детективті емес, беллетристика мен психологиялық кітап­тарды оқығанды жөн санайды.

Байқауымызша, Үндістан барынша кон­сервативті ел екен. Олар әлі де классиканы оқудан жалықпапты. Бұған қоса махаббат романдарын көп оқитын (16 пайыз) Исландия да көзге ерек түсті. Статистикаға сенсек, ғашықтық шығармаларға қызығатын ешбір елдің көрсеткіші исландиялық оқырмандардан аса алмаған.

Шведтің Storytel атты аудио­кітапханасы бар. Орыс тілін­де кең таралған бағдарламаны қол­дану­шылар саны өте көп. Қазіргі таңда осы аудио­кітапхана алаңында детектив пен триллер бірінші орында тұр. Одан кейін романдар мен беллетристиканы жұрт жиі тыңдайды екен. Және нақ карантин кезінде биографиялар мен өзін өзі дамытатын шығармалар да сұранысқа ие болыпты.

Түрлі ұлттардың тілі мен түсі­нігіне һәм оқырмандық талғамына қарамастан, әлемде елдің бәрі сүйсіне оқитын бір автор бар. Гарри Поттердің қилы оқиғаларын жазатын Джоан Роулинг қай рейтингте де көш бастап тұр. Айта кетейік, жыл басында Гарри Поттердің кітабы «Steppe & WORLD Publishing» баспасынан қазақ тілінде жарық көрген болатын. Сатылым жағынан бұрын-соңды болмаған рекорд орнатқан жеті томдық шығар­малар жинағы бүгінге дейін әлемнің сексеннен астам тіліне аударылып, 500 млн данамен басылып шы­ғыпты. Миллиондаған баланың қолы­нан түспеген сол шығарма қазақ оқыр­мандары арасында да көп оқылып жүр.

Соңғы жаңалықтар

Жамбыл жылы жырлайды

Руханият • Кеше

Қай салада жалақы өсті?

Экономика • 27 Ақпан, 2021

Ресей азаматтары алғыс айтты

Аймақтар • 26 Ақпан, 2021

Ұқсас жаңалықтар