Бьёрн Дели 1967 жылдың 19 маусымында Норвегияның Хедмарк өңірінде дүниеге келді. Бозбала шағынан шаңғы спортын серік еткен ол уақыт оза өз дәуірінің теңдессіз тұлғаларының біріне айналды. Скандинавиялық саңлақ өзінің спорттық карьерасында Олимпиаданың 8 алтыны мен 4 күмісіне иеленді. Әлем чемпионатында 9 алтын, 5 күміс және 3 қола медальді олжалады. Одан бөлек, көптеген аса ірі халықаралық жарыстардың жеңімпазы атанып, сан мәрте рекордтық көрсеткіштерді жаңартты. Қысқы спорт түрлері тарихында жеңіп алған атақ-даңқы жағынан Делимен теңесе алатын саңлақтар кемде-кем.
2001 жылы спорттық мансабын аяқтағаннан кейін Бьёрн кәсіпкерлікпен айналысты. Құрылыс пен тұрғын үй және сән бизнесін дөңгелетіп әкетті. Сонымен қатар, шаңғы спортына арналған брендтік кимідер шығарып, норвегиялық телеарналарда шоу-бағдарламалар ұйымдастырды.
Қазақстандық жанкүйерлерге де Бьёрн Делидің есімі етене таныс. Себебі ол ұзақ жылдар бойы Олимпия ойындары мен әлем чемпионаттарында сан мәрте атой салған біздің әйгілі шаңғышымыз Владимир Смирновтың дүбірлі додалардағы басты қарсыластарының бірі болды.
