Бұл шығармашылық жобаны Қазақстан Республикасының Тұңғыш Президенті – Елбасы Кеңсесінің басшысы Махмұт Базарқұлұлы Қасымбеков бастаған бір топ авторлар ұжымы ұсынды. Олардың қатарында Асқар Молдағаринов, Әділ Тұрсынов, Нұрлан Ыбырайым, Нұрлан Жұмабеков және Әлібек Қуантыров бар.
Онлайн-таныстырылымға белгілі ғалым-сарапшылар қатысты, олар: Қазақстан Республикасының Президенті жанындағы Қазақстанның стратегиялық зерттеулер институтының директоры, әлеуметтік ғылымдар докторы, ҚР ҰҒА академигі Зарема Шәукенова, ҚР Конституциялық кеңесінің бұрынғы төрағасы, заң ғылымдарының докторы, профессор Игорь Рогов, Л.Н.Гумилев атындағы Еуразия ұлттық университетінің ректоры, тарих ғылымдарының докторы, ҚР ҰҒА академигі Ерлан Сыдықов, ҚР Тұңғыш Президенті – Елбасы қоры жанындағы Әлемдік экономика және саясат институты директоры Ержан Салтыбаев және тағы басқалар.
Ой-пікірлерін ортаға салғандар арасында алыс және таяу шетелдердің сарапшылары да болды, мәселен: Мичиган университетінің профессоры, Еуропа, Ресей, Еуразия зерттеулері орталығы директорының орынбасары Тимур Кожаоглу (АҚШ), ғылым докторы, Еуразия жазушылары одағының төрағасы Иакуб Өмероглу (Түркия), Әзербайжан Республикасы Милли Меджлисі депутаты, Әзербайжан Президенті жанындағы Мемлекеттік басқару академиясы Саяси зерттеулер институтының директоры, саяси ғылымдар докторы, профессор Эльман Насиров, М.Ломоносов атындағы Мәскеу мемлекеттік университетінің Қазақстандағы филиалының директоры, экономика ғылымдарының докторы, профессор Александр Сидорович (Ресей), түрколог, тарих ғылымдарының докторы, профессор Қадыралы Қоңқабаев (Қырғызстан).
Онлайн-таныстырылымды Елбасы Кеңсесінің басшысы Махмұт Қасымбеков бастап берді.
– Мемлекет құрудың халықаралық тәжірибесінде Тұңғыш Президенттің басшылығымен Қазақстан жүзеге асыра алғандай қоғамды түбірімен және тиімді өзгертудің мысалдары қазір аса көп емес. Сондықтан Қазақстан мемлекеттілігінің негізін қалаушы, көрнекті реформатор-стратег, жаһандық ауқымдағы саясаткер ретіндегі Нұрсұлтан Назарбаевтың бірегей тұлғасының феномені бірнеше ондаған жыл бойы өз елімізде де, сыртта да қоғамның зор қызығушылығын тудырып келе жатуы әбден заңды, – деді Махмұт Базарқұлұлы.
– Мыңжылдықтар тоғысында, Кеңес Одағы құлаған қиын кезеңде Елбасы бастамашылық еткен осы тарихи үдерісті тұжырымдамалық тұрғыдан бөле-жармай тұтас күйінде қабылдау идеясы «Жасампаздық дәуірі» кітабының басты өзегіне айналды. Кітапта Нұрсұлтан Әбішұлы саяси басшылық жасаған жылдарда еліміз жеткен басты жетістіктерге, Елбасының мемлекеттік және қоғамдық көпқырлы қызметіне жан-жақты және терең зерттеу арқылы талдау жасалған, – деді спикер.
– Басылым атауы Елбасының іргелі идеялары мен ой-толғамдарының жүзеге асқан көрінісіндей белсенді, қажырлы еңбекке, барлық ортақ ресурстар мен жұмылдырылған күштерге, тынымсыз ізденіс пен жаңалыққа, маңызды ашылымдар мен серпінге толы сол заманның биік рухын дәл танытады. Кітапта Тұңғыш Президенттің алдағы ондаған жылдағы еліміздің дамуының басты бағыттарын анықтап берген, өзара қисынды байланысқан және стратегиялық маңызы зор шешімдерінің толық сипаты көрініс тапқан. Авторлар ұжымы түрлі сала бойынша тақырыптық материалдар мен фактологиялық базаны жинақтау, жүйелеу бағытында зор жұмыс атқарып шықты, – деп жалғастырды сөзін жоба жетекшісі.
– Тұңғыш Президенттің Қазақстан халқына арнаған жолдауларына, сол кезеңдердегі бағдарламалық, нормативтік және құқықтық құжаттарға, статистикалық деректерге талдау жасау арқылы жүргізілген зерттеу тақырыбының өзегін мемлекет құру, әлеуметтік-экономикалық және қоғамдық-саяси даму, сыртқы саясат, Қазақстанның болашақтағы перспективалары сияқты маңызды салалар құрайды, – деді М.Қасымбеков.
– Елбасының кітапта айтылған шығармашылық-жасампаздық идеялары мен істері қазақстандықтардың бүгінгі және болашақ ұрпағы үшін ешқашан құнын жоғалтпайды. «Жасампаздық дәуірі» кітабы тәуелсіз Қазақстан тарихының мемлекетіміз үшін айрықша маңызды кезеңінің құнды дереккөзі ретінде ғалымдар мен сарапшылар қауымының, қалың жұртшылықтың зор қызығушылығын тудырады деп ойлаймын, – деп түйіндеді сөзін жоба жетекшісі.
Мичиган университетінің профессоры, Еуропа, Ресей, Еуразия зерттеулері орталығы директорының орынбасары Тимур Кожаоглу былай деді:
– Ұсынылып отырған еңбекте Н.Ә.Назарбаев негізін қалаған Қазақстанның стратегиялық даму бағытының айқын ерекшелігі болып саналатын, Елбасы жүзеге асырған өзгерістердің қисындылығы, жүйелілігі, тұтастығы, ауқымдылығы атап көрсетілген. Елбасының мемлекеттік идеологемасының экономикалық даму доминанттылығы, жаңғырулардың эволюциялық сипаты, экономикалық және саяси реформалардың жүйелі үндестігі, прагматизм мен сыртқы саясаттағы көпвекторлылық, қоғамдық сананың жаңғыруы сияқты негізгі қағидаттарына айрықша көңіл бөлінген.
Өткен ғасырдың 90-жылдарының басындағы нақты жағдай бұрынғы Одақтың барлық республикасын ауыр қиындыққа ұшыратты.
Қазақстан үшін «уақыттың сын-талабын жіті сезініп, республикада және сыртта болып жатқан қоғамдық-саяси үдерістер сипатына дұрыс баға бере алатын жаңа буынның көшбасшысы ауадай қажет болды», деді сөйлеуші.
АҚШ профессорының пікірінше, орын алған жаппай дағдарыстың қиын түйінін батыл шешудің қажеттігі айқын көрініп тұрды. «Мемлекетті жаңғырту, егемендікті нақты іс жүзіне асыру, түбірімен өзгеріп кеткен геосаяси жағдайлар кезіндегі елдің лайықты орнын айқындау» сияқты күн тәртібіндегі міндеттер шынымен аса ауқымды еді.
– «Жасампаздық дәуірі» кітабының өзіндік ерекшелігі – Қазақстан Республикасының Тұңғыш Президенті – Елбасы Н.Ә.Назарбаевтың саяси философиясы мен мемлекеттік стратегиясын тарихи-саяси ретроспектива арқылы шебер астастыра алуы. Авторлар Елбасының елді таныту жолындағы мемлекеттік және қоғамдық көпқырлы қызметінің негізгі қырларын жүйелі қарастырған. Басылымның зерттеушілік және дүниетанымдық тұрғысындағы маңыздылығы, міне, осында, – деп түйіндеді сөзін Т.Кожаоглу.
Еуразия жазушылары одағының төрағасы Иакуб Өмероглу өз баяндамасында «Назарбаев феноменінің» талданған ерекшеліктеріне тоқталды.
– Кітапта Елбасы феноменінің маңызды сипаттамалары мен қырларын айшықтап көрсететін аргумент-уәждемелер келтірілген. Мені Н.Ә.Назарбаевтың прагматикасы мен логикасының қуаты таңғалдырады. Әлемдік тәжірибеде берік орныққан Нұрсұлтан Назарбаев феномені кітап мазмұнының бүкіл өн бойынан көрініс тауып отырады. Түрлі мінберлерден сан рет айтылған «тәуелсіз Қазақстанның негізін қалаушы, дана стратег, ұлы реформатор, қазіргі заманның көрнекті саяси көшбасшысы» деген саяси сипаттамалар – Елбасы қайраткерлігінің көпқырлылығы мен белсенділігінің айқын дәлелі, – деді баяндамашы.
– Ұсынылып отырған талдау, – деп сабақтады сөзін түрік сарапшысы, – шын мәнінде, әрдайым «жүйелі де ауқымды ойлай отырып, уақыт көкжиегінің арғы жағына көз салуға ұмтылған, оқиғалар мен үдерістер барысынан тұтас жылдар мен онжылдықтарға алға озып кетуге тырысқан» Елбасының саяси ұстанымының органикасын нақты көрсетеді.
Басқосудағы сөзді жалғастырған Әзербайжан Милли Меджлисінің депутаты, профессор Эльман Насиров:
– Қазақстан мен Әзербайжан – тамыры, түбі бір, тарихы ортақ, бүгіні де ұқсас түркі мемлекеттері. Екі елдің тарихы дәстүр сабақтастығы, толеранттылық пен әлемге ашықтық тұрғысынан да, Каспий жағалауына қатысты мүдделерінің ортақтығы мен тығыз экономикалық байланысы жағынан да көбінесе үндесіп жатады, – деді.
Дипломатиялық қатынас орнатқан кезден бері Қазақстан мен Әзербайжан егемендіктің нығаюының, ауыр дағдарыс жағдайындағы өтпелі кезеңнің күрделі тұстарынан абыроймен өте алғанына тоқталған спикер қазіргі таңда ынтымақтастықтың стратегиялық сипат алып, орнықты дамып келе жатқанын айтты.
Бұл ретте Э.Насиров кітапта Каспий жағалауына қатысты ынтымақтастық мәселелері, Елбасының интеграциялық идеялары шынайы көрініс тапқанын атап өтті. Ол сондай-ақ түркі интеграциясы мәселелеріне ерекше тоқталып, Нұрсұлтан Назарбаев түркі бірлігі саласының көрнекті идеологінің бірі екенін айтты.
– Түркішілдікке деген өзге көзқарастардан Нұрсұлтан Назарбаевты ерекшелендіріп тұратын негізгі сипат – сезімге берілу мен популизмнен алыс, Түркі әлемінің интеграциясы арқылы ортақ пайда мен жете ойластырылған байыпты ұстанымға негізделген айқын стратегияның әзірленуі.
Бір сөзбен айтқанда, Нұрсұлтан Назарбаев – бір өзі бір дәуірдің бейнесіндей адам. Осы екі компонент бұл кітапта мінсіз, үйлесімді қабыстырылған. Түркі әлемінің өкілі болып саналатын бәріміздің Елбасы көшбасшылығы феноменінен үйренеріміз көп, мақтан тұтарымыз мол, – деп қорытты өз сөзін Әзербайжан сарапшысы.
Экономика ғылымдарының докторы, профессор Александр Сидорович өз сөзінде былай деді:
– Н.Ә.Назарбаев дәуірі – жасампаздық дәуірі. Ол – бұл сөздің кең әрі ең терең мағынасындағы жасампаздық. Елбасының басшылығымен мемлекет құру ісіндегі, экономикадағы, демократиялық қағидалар негізінде саяси дамудағы, экономиканың әлеуметтік бағытындағы жетістіктері әлемге кең танылған тәуелсіз Қазақстан мемлекеті бекем орнығып, дамып келеді. Н.Ә.Назарбаевтың көптеген халықаралық бастамасы халықаралық ұйымдардың, өңірлік интеграциялық бірлестіктердің құрылуы, бейбіт бастамалардың орындалуы, өзара сенім шараларының қабылдануы арқылы нақты жүзеге асты.
«Посткеңестік кеңістіктегі түбірлі өзгерістердің қиын кезеңінде мемлекеттің басында тұрған Нұрсұлтан Әбішұлы еңсе көтертпестей ауыртпалықтарға қарамастан, басты мұрат – мемлекетті құру міндетін орындағанын» айтқан спикер «оның қызметі – халықтың тағдырынан бөлек емес, керісінше жұрттың даму жолындағы талап-сұранысының, өз рөлі мен құндылықтарын сезінуінің көрінісі» екенін атап өтті.
Елбасының Мәскеу университетінде сөйлеген сөзін еске алған Александр Владимирович «Еуразия одағын құру идеясы Еуразия кеңістігіндегі елдер халқының мұң-мұқтажын тап басып, жаңа қағидаттар бойынша бірлесуге деген үмітін жаңғыртқанын» айтты.
– Кеңес Одағы күйрегеннен кейінгі кезеңде ортаға тасталған бұл күтпеген ұсыныс-үндеу ең әуелі тәуелсіздік идеясына қайшы сияқты көрініп, жас мемлекеттер тарапынан түсінбеушілік тудырғаны да рас, алайда тарих Елбасының тікелей атсалысуымен Еуразия экономикалық одағын құру арқылы әр мемлекет үшін, соның ішінде Қазақстан үшін де өз тәуелсіздігін сақтау және нығайтумен бірге жаңа мүмкіндіктерге жол ашылғанын көрсетіп берді, – деді баяндамашы.
Өзгеріс жасау міндетін орындау бағытындағы ұстанымның бірегейлігін Н.Ә.Назарбаевтың басқа да шешімдерінен көруге болатынын айтқан спикер сондай-ақ ХХІ ғасырда елдің жаңа астанасының бой көтеруі феноменін атап өтті. Н.Ә.Назарбаевтың табыс стратегиясы өз халқының тарихына және ел ішінде де, мемлекетаралық қарым-қатынаста да құнын жоймайтын достық, ынтымақтастық, өзара түсіністік сияқты баға жетпес құндылықтарға негізделгені айтылды.
Қырғызстандық профессор, түрколог, тарих ғылымдарының докторы Қадыралы Қоңқабаев жарық көріп отырған «Жасампаздық дәуірі» кітабы Қазақстан Республикасының Тұңғыш Президенті – Елбасы Нұрсұлтан Назарбаев феномені зерттелген еңбектер қатарынан лайықты орын алатынына сенімді екенін айтты.
Спикер өз сөзінде Тұңғыш Президент – Елбасы Нұрсұлтан Назарбаев феноменінің сыртқы саясаттағы қырына тоқталып өтті.
– Тарихи тұлғаның стратегиясы жас мемлекеттің қалыптасуы мен әрі қарай дамуы барысында алдына қойған барлық басты мақсатына табысты қол жеткізуін қамтамасыз етті. Осы уақыт ішінде сыртқы саясатта жасалған барлық қолайлы жағдайлар әлемдегі көлемі жөнінен тоғызыншы елдің егемендігін, қауіпсіздігін және аумақтық тұтастығын айтарлықтай нығайтуға мүмкіндік берді. Сондай-ақ бай мәдени-гуманитарлық жылнаманы ашып көрсету, Ұлы дала елін жаңғырту және көршілес мемлекеттермен өзара тиімді байланыс орнату барысында халықаралық ынтымақтастық айрықша рөл атқарды, – деді ол.
Сондай-ақ Қазақстанның және оның Тұңғыш Президентінің ядролық қарудан, ядролық сынақтар өткізуден бас тартуға негізделген, елді ядролық қарусыз әлем қалыптастыру жолындағы қозғалыстың алғы шебіне алып шыққан қауіпсіздік мәселелеріне деген жаһандық ұстанымына кітап авторлары тарапынан жан-жақты талдау жасалғанын айтты.
Елбасының бейбітшілік бағытындағы бастамалары республиканы әлемдік діндер мен конфессиялар өкілдерінің ашық диалогінің, бітімгершілік үдерістерін талқылаудың тиімді алаңына, Еуразия экономикалық кеңістігіндегі мегаөңірлік интеграциялық үрдістер Орталық Азия елдері мен түркітілдес мемлекеттер ынтымақтастығы мүддесін өзара жақындастыру генераторына айналдырғанын атап өтті.
– Нұрсұлтан Назарбаевтың халықаралық аренадағы аса белсенді, көпвекторлы және бейбітсүйгіш саясаты Қазақстан Республикасының Біріккен Ұлттар Ұйымына мүше, мейлінше беделді, салмақты және жауапты елдердің қатарынан өзінің лайықты орнын алуына септігін тигізді, – деп аяқтады сөзін Қ.Қоңқабаев.
Онлайн-таныстырылымда одан кейін сөз алған ғалымдар мен сарапшылар көтерілген мәселелердегі ойшылдық бастауларының қуаттылығын, талдаулардың жүйелілігі мен нақтылығын, фактологиялық тұрғыдан бай да мазмұнды екенін, стилистика жағынан сан алуандығын атап өтті. Олардың ортақ пікірінше, баяндалу мәнерінде кезек алмасып отыратын өткірлік пен философиялық сипат кітаптың зияткерлік деңгейін биіктетіп, оқырманды ұдайы ширыққан көңіл күйде ұстап отыратыны бұл еңбектің табысты, оқылымды боларына еш күмән қалдырмайды.
Қазақстанның стратегиялық зерттеулер институтының директоры, академик Зарема Шәукенова былай деді:
– Елбасының отыз жылға жуық уақыт дана басшылығы кезінде Қазақстан үлкен биіктерді бағындырып, шын мәнінде әлемдегі беделді мемлекетке – Орталық Азия көшбасшысына айналды. Сондықтан «Жасампаздық дәуірі» ұжымдық монографиясының жарық көруі – дер кезінде іске асқан маңызды оқиға.
Осы жылдар ішінде ел дамуының мемлекеттік тәуелсіздік алуы, ауқымды жаңғырудың жүзеге асырылуы мен қоғам өмірінің барлық саласының реформалануы, орнықты билік құрылымының қалыптасуы тәрізді елеулі белестері артта қалды. Бейбітсүйгіш сыртқы саясат пен Тұңғыш Президенттің халықаралық бастамалары баршаның қолдауына ие болды. Елбасының жоспарлы ісі мен күш-жігері арқасында Қазақстанның барлық этносы мен конфессия өкілдерінің арасындағы татулық, достық, бірлік пен келісім мемлекетіміз табысының маңызды факторының біріне айналды, – деді Зарема Кәукенқызы.
– Елбасының ішкі саясатты іске асыру бағытында жете ойластырылған прагматикалық қадамдары егемендіктің қалыптасуының күрделі кезеңдерінде қоғамдық құрылыстың бір түрінен мүлде өзге екіншісіне көшудің қиын белесінен ешқандай катаклизм, сілкініс, азаматтық текетірестерсіз өтуге мүмкіндік туғызды, – деді З.Шәукенова.
Оның пікірінше, авторлар ұжымы «Тұңғыш Президенттің басшылығымен осы жылдары елде жаңа саяси модель қалыптасқанын айшықтап көрсете алған».
Л.Н.Гумилев атындағы Еуразия ұлттық университетінің ректоры, академик Ерлан Сыдықов басылымның негізгі контексіне тоқтала келе, оның басты құндылықтарын атап өтті:
– Біріншіден, Қазақстан Республикасының татулықты, келісімді, өркендеу мен адами құндылықтарға деген ілтипатты қарым-қатынасты сақтау идеясына адалдығы, «бұл кезеңнің ең ұтымды да дәл сипаттамасы – «Жасампаздық дәуірі» образ-метафорасы».
Екіншіден, кітаптың мерейтой жылында шығып отырғаны: биыл тәуелсіздігіміздің және оның көшін бастаушы – Елбасы Нұрсұлтан Әбішұлы Назарбаевтың мерейлі белесі.
Үшіншіден, жас мемлекетімізде болып өткен оқиғалардың барлығының бел ортасында тұрған, алдымен кез келген ахуалды болжап-жобалап, артынан өзінің көздегеніне іс жүзінде қол жеткізе алған ең білікті әрі құзыретті сарапшы Нұрсұлтан Әбішұлы Назарбаев тұлғасының және оның дәуірінің синхронды баяндалуы.
Төртіншіден, бұл басылымның өркендеген Қазақстанды құрып, дамытып, онда өмір сүретін, еңбек ететін барша қазақстандықтарға, әсіресе жастарға – студенттерге, мектеп оқушыларына – тәуелсіздік алған Қазақстанда туып-өскен, 1986 жылдан бергі тарихи кезеңнің көптеген тарихи өзгерістерінің қыр-сырын біле бермейтін ұрпаққа арналғандығы.
Академик Е.Сыдықовтың пікірінше, Қазақстан тарихының ресми оқулықтарында кездеспейтін, қалтарыста қалған көптеген жайттың жазылғаны басылымның басты ерекшелігі болып саналады.
Бесіншіден, ел тағдыры үшін зор жауапкершілік жүктеліп, билік тізгіні берілген Елбасының рухани жағынан және тікелей өз өмірі тұрғысынан кітапта айтылғанның бәріне тікелей қатыстылығы көрініс тауып, оның басынан өткерген күрделі сезімдерінің кейбір сәттері бедерлі түрде берілгені.
Соңғысы – авторлар ұжымы жүйелеп, оқырманға ұсынған тарихи-саяси, әлеуметтік-экономикалық дереккөз ретіндегі жобаның баға жетпес маңызы.
Конституциялық кеңестің бұрынғы төрағасы, профессор Игорь Иванович Рогов конституциялық құрылыстың тарихын, 1993, 1995 жылдардағы Конституцияның әзірленіп, қабылдануы үдерістерін жариялап-көрсету мәселелеріне егжей-тегжейлі тоқталды.
– Артта қалған ауқымды жолдың, алынған асулардың биігі тұрғысынан бүгін бізге сол белестерді тәуелсіз Қазақстанның қалыптасуы мен дамуында баға жетпес рөл атқарған Нұрсұлтан Назарбаевтың жеке тұлғасы арқылы терең байыптап, баға беру және жүйелеу – айрықша маңызды. Осы орайда Елбасы Кеңсесінің басшысы, саяси ғылымдар докторы, профессор М.Қасымбековтің басшылығымен бұл ұжымдық монографияның жарыққа шығуы – аса елеулі оқиға, – деді ол.
– Елдің Ата заңы – Қазақстанның Тұңғыш Президенті бастамашы болған, ұзақ жылдық ұжымдық еңбектің нәтижесі. Кітапта тәуелсіз, экономикасы дамыған, әлемдік қоғамдастыққа кіріккен мемлекет құру жолындағы біздің ілгері басқан жолымызды регламенттейтін негізгі құжат ретіндегі Конституцияның қалыптасу үдерістері өте айшықты көрсетілген.
1993 жылғы Конституцияның және қолданыстағы қазіргі Конституцияның жобасын әзірлеу ісінің басында үнемі Елбасы тұрды. Бұл ретте, көріп отырғанымыздай, ол тек жұмысқа жетекшілік жасап қана қойған жоқ, Конституция әзірлеудің халықаралық тәжірибесін шұқшия зерттеп, Конституция мәтінімен тікелей өзі де жұмыс істеді, – деп жалғастырды Игорь Иванович.
Сөз сөйлеушінің пікірінше, авторлар конституциялық құндылықтарды қалыптастыру үдерісіне өте сауатты түрде талдау жасаған. Аталған іске Конституция әлеуетінің жан-жақты жүзеге асырылуын қамтамасыз ету жөніндегі Елбасының қатаң нұсқауы септігін тигізді.
– Н.Ә.Назарбаевтың: «Конституция мен заңдарды мүлтіксіз орындағанда ғана мемлекет тәуелсіздігі мызғымайды», деген сөзі Тұңғыш Президенттің стратегиялық бағытының әрқашанғы айнымас ақиқаты болды,– деді спикер.
Тұңғыш Президент – Елбасы қоры жанындағы Әлемдік экономика және саясат институтының директоры Ержан Салтыбаев былай деді:
– Бұл – аса маңызды мәселе жөніндегі, бас кейіпкері Елбасы мен оған шынайы сенім артқан Қазақстан халқы бірлесе, ауыр ізденіс, қажымас еңбек арқылы аталған дәуірді сомдағаны туралы кітап. Авторлар Тұңғыш Президенттің қызметі арқылы елдің қазіргі келбеті оның көшбасшылық шешімімен қалай қалыптасқанын көрсете алған. Әңгіме тек ұлттық мемлекеттіліктің жаңғыруы мен қуатты институттардың құрылуы туралы ғана емес, сонымен бірге күрделі геосаяси жағдайдағы бірегей сыртқы саясат стратегиясының қалыптасуы жөнінде де болып отыр. Қазақстанға әлемдік аренадан лайықты орнын алуына мүмкіндік туғызған көшбасшының стратегиялық ұстанымының маңыздылығы Елбасының халықаралық бастамаларының мысалы арқылы көрсетілген.
Сарапшының пікірінше, авторлар Елбасы айқындаған «дамудың қазақстандық жолына» терең талдау жасаған, аталған жол болашақ ұрпақ үшін тек мұра ғана емес, елдің алдағы ондаған жылдағы орнықты өркендеуінің берік негізі бола бермек.
Іс-шараға қатысушылар «Жасампаздық дәуірі» кітабы көптеген ғылыми зерттеу мен көркем шығарма үшін дерек алынып, сілтеме жасалатын баға жетпес мол фактология, зерттеушілік мәлімет көзі екенін бірауыздан құптасты. Кітап өз оқушысын тауып, «Назарбаев феномені» деген ұғымның, Елбасы қызметінің тарихи реформаторлық ауқымының және «дамудың қазақстандық жолының» жете түсінілуіне жол ашады. Сарапшылар бұл кітап оқырман кітапханасынан лайықты орнын аларына сенім білдірді.
Онлайн-таныстырылым кітап соңындағы мына сөздермен түйінделді: «Кейінгі ұрпаққа Елбасы Орталық Азия көшін бастаған табысты, қалыптасқан мемлекетті – бүкіл әлемге сыйлы, қуатты экономикасы мен мүмкіндігі тең ашық қоғамы бар елді мұраға қалдырды. Мемлекетіміздің келесі даму кезеңдері үшін идеялық іргетас бола алатын оның зияткерлік бай жәдігерінің маңызына баға жетпейді. Нұрсұлтан Назарбаев – уақыттан озып кеткен, Қазақстанның болашақ ұрпағы үшін ой-толғамдары мен іс-әрекеті ешқашан құнын жоғалтпайтын жаһандық деңгейдегі аса көрнекті мемлекет қайраткері».
