О, жалған дүние-ай! Әбдеш өмірден өткелі де жылға таяпты. Көңіл жетсе де, көз жетпес зулаған өмір! Қатар жүрген қаншама азамат ортаңды ойсыратып, табиғат тылсымына біржолата сіңіп, көзден ғайып, көңілден тысқары күйге айналғаны ма?! Жүрек сыздайды, көңіл құлазиды. Мұндайда Алланың әмірі дегеннен басқа қолдан келер амал бар ма, адам пендеге. Тек өзек өртеп өмірден өткендерді ұмыта алмай бірауық сағыныш әлеміне бойлайтының бар. Өйткені, өмірден өткендер арасында ой арқалатып кететіндер көп. Олардың қоғамдағы орны, іс-әрекеті, жора-жолдас арасындағы қарым-қатынасы сені ойландырмай қоймайды.
О, жалған дүние-ай! Әбдеш өмірден өткелі де жылға таяпты. Көңіл жетсе де, көз жетпес зулаған өмір! Қатар жүрген қаншама азамат ортаңды ойсыратып, табиғат тылсымына біржолата сіңіп, көзден ғайып, көңілден тысқары күйге айналғаны ма?! Жүрек сыздайды, көңіл құлазиды. Мұндайда Алланың әмірі дегеннен басқа қолдан келер амал бар ма, адам пендеге. Тек өзек өртеп өмірден өткендерді ұмыта алмай бірауық сағыныш әлеміне бойлайтының бар. Өйткені, өмірден өткендер арасында ой арқалатып кететіндер көп. Олардың қоғамдағы орны, іс-әрекеті, жора-жолдас арасындағы қарым-қатынасы сені ойландырмай қоймайды.
Өзінің өмірдегі орнықты ісімен, ойшылдығымен, кейінгілерге ой тастап кеткен жанның бірі – Әбдеш Қалмырзаев еді. Адам пенде тірі кезінде бірімен бірі сыйлас, тіпті сырлас болып жүрсе де, күндердің күні болғанда мына жарық дүниені тастап, қоштаса да алмай жүре беретінін ойлап бас ауырта бермейді. Бәлкім, сол да дұрыс шығар. Дегенмен, саған уақытша берілген мына өмірде қадамыңды абайлап басып, өзіңе, ортаңа, қоғамға тигізер пайдаң мен қызметіңді дұрыстап жасау үшін де алды-артыңды тиянақтап, бір-біріңе қарайласа, бейіл білдіре жүргенге не жетеді. Міне, кезінде осылай ойлай білмегендіктен де Әбдеш дүниеден өткен соң, ол туралы нені, қалай жазарымды білмей, тосылыңқырап отырғандаймын. Әйтпесе, ол туралы айтарым бар сияқты еді. Миға салмақ салуға тура келді.
Біздің жолымыз ең алғаш рет Алматыда қазақ білімінің бас ордасы – Әл-Фараби атындағы университетте (бұрынғы С.М.Киров атындағы) түйіскен еді. Республиканың түкпір-түкпірінен оқу іздеп келіп жатқан жас өскіннің басы көбінесе осы жалғыз университетте тоқайласатын. Әбдеш университеттің филология факультеті журналистика бөліміне оқуға түсті. Менің бұл факультетте оқып жүргеніме екі жылдан асқан. Бір заманның түлектері болған соң ол кезде студенттер арасында бес-он жас айырма ескеріле бермейтін. Жоғары-төменгі курстың балалары бірімен-бірі араласа беретін.
Ол әуелі бізбен бірге оқитын Илья Жақановқа келді, жерлес екен. Екеуі де Жамбыл облысы Сарысу ауданынан. Шашы толқын атқан, орта бойлы, ақ сары әдемі жігіт. Аңғарымпаз, жан-жағына байыппен байқастап қарайтын, елгезек жан. Содан былай қарай біздің қарым-қатынасымыз жиілей бастады. Ол кезде қазақ жастарының оқу-білімге ұмтыла жүріп, халықтың байырғы өнеріне (ән, күй, домбыра, қобыз, жыр, терме, т.т.) деген құштарлығы ерен еді. Басымыз қосыла қалса, қазақтың әні мен күйі, композиторлардың жаңа туындылары, ақындардың өлеңдері жайлы пікір қозғап, дуылдасып жататынбыз.
Біздің ортамызға Шәмші жиірек келетін болды. Жас атаулының бәрі оның әніне ғашық. Илья да одан қалыспай, өз әндерін шығара бастаған. Екеуінің бір-біріне деген ықыласы бөлек. Әйтеуір бұл ортада ешқайсымыз бейжай отыра алмайтынбыз. Бұл тұстағы Әбдештің қылығы қызық. Әңгімеге көп араласа қоймайды. Бірақ көкейіне көп дүние түйіп, болған әңгімелерді ықыласпен тыңдайды. Оның ешнәрсені елеусіз қалдырмайтынына, естігенін ұмытпайтынына таң қалатынмын. Мәселен, сол студент кезінің өзінде ол Жамбыл облысының көзге көрініп жүрген ауыл, аудан, облыс көлеміндегі барлық қызметкерлерінің аты-жөндерін, кімнің қандай жұмыс атқаратынын жатқа білетін. Ол осылайша жадын жаттықтырып жүргендей еді. Және қатар жүрген жолдастарының болар-болмас табысының өзін елеусіз, ескерусіз қалдырмай жақсы ниетін білдіріп отыратын. Мәселен, өз басыма байланысты бір оқиғаны еске алғым келіп отыр. Жастықтың алауымен жалындап жүріп, көзіміз түскен қыздарға сағынышты хаттар жазып, өлең арнап жүретін кезіміз. Менің де сондай бір сезім әлдиінде бір ән шығарып, шалқып жүрген шағым еді. Болашақ жарыма деген алабұртқан осы көңіл-күйімді Жұмағали Сайнның «Жар сәлемі» деген өлеңі дөп жеткізгендей екен. Сол өлеңді өз әуеніммен айтып жүретінмін. Міне, соны естіп алған Әбдеш 1959 жылы «Лениншіл жас» газетіне жариялап жіберді. Бұл кезде ол осы газетте тәжірибеден (практикадан) өтіп жүрген студент еді. Бір-бірімізге деген ықылас, сыйластық осылай жалғаса берді.
Мен 1959 жылы оқуды бітіріп, «Социалистік Қазақстан» газетіне әдеби қызметкер болып орналастым. Әбдеш бұл жерге де келгіштеп жүретін. Азулы қаламгерлер Б.Қыдырбекұлы, Ж.Жұмаханов, Қ.Ұябаев, Ұ.Бағаев, Ә.Жұмабаев, Б.Абдуллин, Н.Шәкеев, Б.Дәуренбеков, М.Машақов тәрізді ағалармен емен-жарқын сәлемдесіп, олардың жазғандарын оқып жүретіндігін білдіріп кететін. Сөйтіп жүріп ол бұл газетте де тәжірибеден өтті. Әр нәрседен хабары мол, қаламының қарымы байқала бастаған жас жорналшы Әбдеш ақыры осы республикалық аға газетке келіп жайғасты. Ол ардақты аға Ұзақ Бағаев басқарып отырған ауылшаруашылық бөлімінің дүрдей қызметкері болып шыға келді. Осы бөлімде жүріп, қаламын шыңдады. Өз ісіне өте ұқыпты Әбдеш ұжымға тез сіңіп кетті.
Әбдештің келелі мәселелерді көре білетін, көргенін көсілтіп жаза білетін қабілетін қаламдастары да, Қазақстан Компартиясы Орталық Комитетінде отырған байыпты азаматтар да байқаған болулары керек. 1969 жылы Қазақстан Компартиясы Орталық Комитетінің үгіт және насихат бөліміне нұсқаушылық қызметке шақырылды. Бұл жерде ол шетелдермен байланыс секторына, баспасөз бөліміне жетекшілік жасап, бөлім меңгерушісінің орынбасары қызметіне дейін көтерілді. Кейінірек Көкшетау облыстық партия комитетінің хатшысы болды.
Азаматты орта өсіреді деген сөздің жөні бар. «Социалистік Қазақстан» газетінде қаламгерлігі мен азаматтығы шыңдалған Әбдеш Сәрсенұлы біртіндеп ел, халық мүддесі үшін еңбек етіп, күресе алатын саяси қайраткер дәрежесіне көтеріле бастады. Осы бағытта тынбай еңбектенді. Алайда, ол өзінің журналистік шеберлігі жетіле бастағанмен, жазу-сызуының ғылыми-теориялық негіздемелерінің әлі де олқылау түсіп жататынын байқайтын. «Құланның қасуына...» дегендей, оның көкейінде жүрген бұл игі мақсатын орындаудың сәті түсті. Ол 1976 жылы КОКП Орталық Комитеті жанындағы қоғамдық ғылымдар академиясының аспирантурасына оқуға жіберілді. Онда ол оқу бағдарламасын қанағат етіп қоймай, ғылыми ізденіспен, әсіресе, пәлсапалық қисындармен түбегейлі айналыса бастайды. Нәтижесінде сол оқуды бітірген 1981 жылы философия ғылымдарының кандидаты дәрежесін қорғап шығады. Табиғат, қоғам құбылыстарына, жалпы, өзі өсіп-жетілген айналасына ойлы көзбен қызыға қарау, шамасы оның бала күнінен бойына сіңген қасиет болса керек. Өсіп-жетіле келе ұлы ойшылдар әлеміне тереңдеу арманы осылайша орындала бастаған еді. 1992 жылы сол Мәскеу қаласындағы аталған оқу орнында философия ғылымдарының докторы дәрежесін қорғады. Сол жылы профессор атағын да алды. Міне, бұл толассыз еңбек пен талапшылдықтың үлкен нәтижесі болатын.
Енді оған ойшыл ғалым ретінде өзін толғандырып келе жатқан келелі мәселелерді қалың жұртшылыққа ұсынатын кезең келген еді. Міне, сол мақсаттың үдесінен шыға бастады. Ол ең алдымен, қазақ ойшылдарымен тілдесе бастағандай мінез танытады. Әсіресе, ұлы Абайдың эстетикалық көзқарастарына ой жүгіртіп, өзін толғандырған сауалдарға жауап алады. Сондай ізденістер нәтижесі жинақтала келе «Эстетическое в творчестве Абая» (1974) деген кітапқа айналды. Әбдеш ұлт және қоғамдық сана туралы толғанды. Оны сол ұлттың негізін қалайтын адамның болмыс-бітімі де неше алуан ойға жетелейді. 1984 жылы жарық көрген «Нация и общественное сознание» кітабы осы мәселелерді қозғайды. Әбдештің тағы бір ерекшелігі, оның қазақ, орыс тілінде бірдей сөйлеп, бірдей жазатыны.
Әбдеш Қалмырзаевтың философ ретінде кемеліне келе бастаған кезі еліміздің тәуелсіздік алуымен тікелей байланысты. Ол әрі журналист, әрі философ ғалым ретінде Қазақстан баспасөзіне мемлекетіміздің қалыптасу дәуіріне ауадай қажет ойларын жаза бастады. Сөйтіп, ойшыл қаламгер тәуелсіздіктің патриот жыршысына айналды. Газет, журнал беттерінде жарияланып жатқан мақала-толғауларымен қатар «Абай шығармаларының эстетикасы», «Ұлт және адам», «Ұлт және қоғамдық сана», «Біз қазақ, ежелден еркіндік аңсаған», «Қазақстан патриоттығы», «Заман және біз», «Уақытпен сырласу», «Ұлттық идея», «Уақыт және адамдар», «Санқырлы демократия» атты кітаптары бірінен соң бірі жұртшылық қолына тиіп жатты. Көпшілік сұранысын қамтамасыз етті.
Қаламгердің бұл туындыларын саралай келе оның өзегін тәуелсіздік тағдыры мен ұлттық идея, идеология мәселелері құрайтынын байқайсыз. Ол жалаң ой қуалап, ескі сарынмен отырмайды. Айтар ойын нақты дерек, дәйектермен тұздықтап, ғылыми түйсігінің мығымдығын айғақтайды. Осы ретте, қазақ халқы әлі ұлт тұтастығына жеткен жоқ дейтін жаңсақ пікірлерді жоққа шығаруға тырысқан мына бір түйіндеуін еске ала кетсек дейміз. Ол «өз территориясы, өз Конституциясы, өзінің ішкі тұтастығы бар халықты неге ұлт болып қалыптаспады дейміз. Бұл жаңсақ пікір!» деп өз ойын бұлталақтатпай кесіп айтады. Осыдан келіп ұлттық идея мен идеология деген ұғымдар табиғатын талдап, оның әрқайсысына анықтама беруге тырысады. Бұл біздіңше пәлсапалық түйіндеулердегі жаңаша бастама дерлік қисын.
Әбдеш еңбектерінің жас ұрпаққа берері мол деп ойлаймын. Ол осыншама дүниелерін жауапты мемлекеттік және қоғамдық қызметтер атқара жүріп жазды, ел жағдайы, ұлт тағдыры туралы тынбай еңбектеніп, көсемсөздің өзіндік үлгісін де жасады.
Әбдеш үздіксіз ізденіс жолында жүрді. Соның арқасында өте білімдар азаматтар қатарына қосылды. Үлкен қызметтер атқарып жүрген тұсында біздің аралас-құраластығымыз сирей бастады. Бұған уақыт тапшы болатын, соған қарамастан мен оның қазақ қамын терең ойлайтын биік парасат иесі болып қалыптасқанын көріп сырттай сүйсініп жүрдім. Ол өмірінің соңғы жылдарында сүйген жары Үрзада екеуі азамат болған ұлдарынан айырылып, қайғы шекті. Бұл олар үшін оңай болған жоқ. Қайғыны көтеруге тырысты, алайда, Әбдештің денсаулығы сыр бере бастады. Осындай сәттерде Алматыдағы орталық ауруханада қатар жатып емделіп, егде тартқан кезімізде Алла бұйыртқан өмірдің ауыр жүгін арқалап жүрген халімізді айтысып, сырласатынбыз. Ол сырқаттанып жүрсе де, үлгеріп қалайын дегендей, толғандырған ойларын бұрқыратып қағазға түсіріп жататын. Соңғы жылдары ол өте өнімді жұмыс істеді. Оның елді толғандырған мақалалары газеттерде бірінен соң бірі жарияланып жатты. Кездесіп қалғанда не телефонмен «қалай үлгересің?» деп сүйсінгенімді айтып жатушы едім. Өмірдің қайсыбір тұстары жайында ықыластана сыр шертісіп отырушы едік. Осындай мүмкіндіктерден де біртіндеп адаланып келеміз. О Жаратқан, бірімізді бірімізге жоқтатып қойған тағдыр-ай!
Мен таныған Әбдеш міне, осындай еді!
Өмірзақ АЙТБАЙҰЛЫ,
академик.