Балқашты қоқыстан кім құтқарады?

Аймақтар • 01 Шілде, 2020

Балқашты қоқыстан кім құтқарады?

40 рет көрсетілді

Туризмнің ордасына айналады деген Балқаштың маңайы күл-қоқыстан көз ашпай-ақ қойды. Қаланы айтпағанның өзінде, жағажайлар мен көрші елді мекендерді қоқыстан тазарту кәдімгідей үлкен проблемаға айналған, – деп хабарлайды Egemen.kz.

Қайрат Әбілда

Дегенмен, сең енді қозғалып, бұл салада баяу болса да іс-әрекеттің нышаны байқала бастады. Мысалы, қазіргі уақытта қала маңындағы Техснаб кентіндегі тау болып үйілген қоқысты тысқа шығару қол алынған. Бұған дейін мұндағы тұрғындар қоқыс шығаруға келісім-шарт болмағандықтан, тұрмыстық қалдықтарды әр жерге тастай берген екен.

Балқаш қалалық тұрғын үй-коммуналдық шаруашылық бөлімінің сектор меңгерушісі Асылмұрат Түсіпов кенттегі бірнеше жылдан бері жатқан 400 текше метр қалдықтың тысқа шығарылғанын айтады.

"Біз рұқсат етілмеген қоқыстарды жоюмен айналысамыз. Қазір барлық жерді тазалаймыз. Жеке сектор тұрғындарымен қатты тұрмыстық қалдықтарды шығаруға келісім-шарттар жасасу үшін түсіндіру жұмыстарын жүргізетін боламыз. Бұған қоса, қоқыс төгетін орындарға бейне камералар орнатамыз, содан кейін қоқысты ретсіз төгетіндерге айыппұл салынады бастайды", – дейді ол.

Бұл жерде жергілікті атқарушы билік пен коммуналдық қызмет өкілдерінің тұрғындарға өкпелейтін жөні бар. Олардың көбі салақтық танытып, үйінен шыққан күл-қоқысты көрінген жерге төге салуды әбден әдетке айналдырып алған.

"Қоқыс шығару туралы өтінішпен бізге ешкім келген жоқ. Әзірге ешқандай келісім жоқ. Ол үшін Техснаб кентінің тұрғындары бізге келіп, келісім шарт рәсімдеулері керек. Бізде техника жеткілікті", – дейді "Балқаш Универсал" ЖШС-нің учаске бастығы Манат Ділдашев.

Бүгінгі күнде кенттегі әрбір үй үшін ай сайынғы тариф орнатылып, экономист мамандар нақты есептеулер жасау үстінде. Осындай қадамдардан кейін санасы ояна бастаған кент тұрғындары бұл бастамаға қолдау білдіре бастаған.

"Біз төлеуге дайынбыз, – дейді олар. – Кентіміздің көптеген тұрғындары да мұнымен келіседі. Бұрын біз қалдықтарды қайда тастайтынымызды білмейтінбіз".

Коммуналдық қызметтің өкілдері алдағы уақытта Техснаб кентін ғана емес, ЖБИ ықшам ауданын, Шұбартүбек және Жұмысшы елді мекендерін, саяжайлар мен жағажайларды да күл-қоқыстан тазартуды жоспарлап отыр.

Бұдан бөлек, "Балқаш Универсал" кәсіпорны Балқаш қаласының контейнерлік алаңдарын ретке келтірумен айналыспақшы. Бұл жұмыс аяқталған соң, 190-ға жуық қоқыс жәшіктері алаңдармен бірге сенімді басқаруға беріледі.

Қарағанды облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз