Қырғызстанда әл-Фараби пәнін оқыту ұсынылды

Іс-шараны жүргізген кі­тапха­на директоры Жылдыз Бака­шова ұлы оқымысты әл-Фа­рабидің өмір жолына, еңбектеріне қысқаша шолу жасап, сөз кезегін Қазақстан Республикасының Қырғыз Респуб­ликасындағы Төтенше және өкі­летті елшісі Қайрат Нұрпейісовке берді.

– Әл-Фарабидің мерейтойы Қазақстанда мем­лекеттік деңгей­де өтіп жатыр. ЮНЕСКО ғұ­ла­ма ғалымды «Атаулы дата­лар­­­дың және оқи­ға­лардың күн­па­рағына» кіргізді. Сондай-ақ ме­рей­той Ислам ынтымақтастығы ұйымы, Түркі мәдениетінің ха­лық­­аралық ұйымы, Білім беру, ғылым және мәдениет мәселелері бо­йынша исламдық ұйымның және басқа халықаралық мекеме­лер­дің қолдауымен кең аяда, әлемнің түкпір-түкпірінде аталып өтуде. Президент Қасым-Жомарт Тоқаев ғұлама ойшыл туралы: «Мәдениеттің, бірін­ші кезекте Шығыс, Орталық Азия халықтарының, түркі, оның ішінде қазақ елінің мәдение­тінің одан әрі дамуына әл-Фа­ра­­бидің ықпалы әр тарапты және ұзақ мезгілді қам­ты­ды» деп айтқанындай, ұлы ой­шылдың еңбектері бүгінгі күн­де де маңызды», деген елші әл-Фа­рабидің қайырымды қала тұр­ғындарының көзқарастары жайындағы трактатынан «Ба­қытқа жету жолында адамдар бір-біріне жәрдем беретін болса, жер жүзі ізгілікті болады» деген сөзін мы­салға тартты.

Ғұламаның осы сөзі онлайн-конференцияның өзегіне арқау болғандай. Пікір бөліскендер әл-Фарабидің гуманистік кө­з­­қа­­растарына баса назар ауда­рып, оны әр қырынан баян­дады. Іс-ша­раға тікелей қа­тыс­қан Ишеналы Арабаев атын­дағы Қырғыз мемле­кет­тік университетінің профессоры, тарих ғылымдарының док­торы Назира Усупова «Мен әл-Фара­бидің еңбектерін оқыту Қыр­ғызстанның жо­ғарғы оқу орын­дарының, мектептер­дің, тіпті бала­бақшалардың бағ­дар­ламаларына кіргізілсе тура болар еді деп есептеймін» деген ұсы­нысын айтты. Конференцияда әріптесінің ұсынысын қуаттаған осы университеттің тарих және әлеу­меттік-құқықтық білім фа­куль­­тетінің деканы, тарих ­ғы­­­­­­­­­­­лы­м­­­­­­дарының докторы, профес­сор Назира Құрбанова «Әл-Фара­би және Жүсіп Баласағұн адамның әдеп-ақлақтық жетілуі жөнінде» атты баяндамасында әл-Фараби мен ортағасырлық түр­кі ғалымының еңбектеріндегі са­бақтастыққа талдау жасады.  

Онлайн-конференцияға қа­шық­тан қатысқан Л.Н.Гумилев атын­дағы Еуразия ұлттық уни­верси­тетінің проректоры, саяси ғылымдар кандидаты, профессор Ақбота Жолдасбекова, осы оқу орнының шығыстану кафе­­­д­ра­сының профессоры, фи­лология ғылымдарының док­торы Самал Тү­леу­баева, М.Х.Ду­лати атындағы Та­раз мем­ле­кеттік университетінің фи­ло­софия және саясаттану ка­фед­­ра­сының аға оқытушысы Режеп Баярисов, Қырғыз ұлттық ғылым академиясының филосо­фия, құқық және әлеуметтік-сая­си зерттеулер институтының дирек­торы, философия докторы Нұр Са­ралаев, Бішкектегі Еңбек акаде­мия­сының ректоры, философия докторы Асқарбек Бекбоев ұлы оқымыстының еңбектері, оның өміршеңдігі туралы ойларын ортаға салды.

Кітапхана залында кітапхана қорында сақ­талған әл-Фарабидің әр жылдары жарық көрген кі­тап­тары, ол туралы ғылыми ең­бек­тердің және мақалалардың көрмесі ұйымдастырылды, әл-Фараби туралы фильм көрсетілді.

Назарбек БАЙЖІГІТОВ,

Қырғыз Республикасының үкіметтік «Қырғыз Туы» газетінің жауапты хатшысы,

арнайы «Egemen Qazaqstan» үшін