Жасөспірімдер арасындағы құқық бұзушылық артуда

Аймақтар • 03 Шілде, 2020

Жасөспірімдер арасындағы құқық бұзушылық артқан

96 рет көрсетілді

Солтүстік Қазақстан полициясы жасөспірімдер арасындағы қылмыс 30%-ға азайды деп ақпарат бергенімен бұл істе үлкен табыс жоқ. Бар болғаны былтыр осы кезеңде 16 қылмыс фактысы болса, биыл оның саны 11 болып отыр, деп хабарлайды Egemen.kz

Жақсыбай САМРАТ

Қазір жасөспірімдер арасындағы құқық бұзушылықты шектеу қиынға соғуда. Бұрын мұндай мезгілде демалыс лагерлерінде жүретін олар карантиннің кесірінен көше кезіп, өздерін қоярға жер таппай жүр. Тәртіп сақшаларды ондайларды түнгі мезгілдерде жиі ұстайды. Мұндайлар әсіресе ата-анасы араққа салынған отбасыларынан көп шығуда. "Түнгі сағат 23.00 мен таңғы 06.00 арасында жасөспірімдердің заңды өкілсіз (ата-анасыз) көшеде жүруіне болмайды. Жыл басынан бері баласын түнгі "серуенге" қоя берген осындай 1085 ата-анаға жауапкершілік жүктелді", дейді полиция ДП басқарма бастығының орынбасары, полиция майоры Александр Розбах.

Сонымен қатар түнгі сағат 23.00-ден кейін өздеріне жасөспірімдерді кіргізген 12 көңіл-көтеру орындарының қожайындарына айыппұл салынған. Түрлі құқық бұзушылықтары үшін жасөспірімдерге барлығы 1734 рет әкімшілік хаттама да толтырылған. Соның ішінде 399 ата-анаға балаларына қарамағандығы үшін жауапкершілік жүктелген. Ал 152 жасөспірім ювеналдық полицияның есебіне алынған.

Жасөспірімдер арасында алкогольдік ішімдіктер ішу фактілері де көп. Жыл басынан бері ондай 141 факті тіркелген. Соның соңғыларының бірі «Уют» дүкенінің маңында удай мас болып жүрген 16 жастағы қыз болды. Қазір оны полицияның есебіне алу бойынша материалдар жиналуда.

ПЕТРОПАВЛ

Күннің маңызды және өзекті жаңалықтарын «Егемен Қазақстан» телеграм каналынан оқыңыз