Қазақстан • 03 Шілде, 2020

KTZ Express рекордтық мерзімде контейнерлік пойыз жөнелтілімін ұйымдастырды

26 рет көрсетілді

KTZ Express ационерлік қоғамы ADY Container (Әзірбайжан), GR Logistics (Грузия) және Pasifik Eurasia Logistics (Түркия) компанияларымен бірлесіп, Қазақстан арқылы Транскаспий бағыты бойынша Қытайдан Түркия бағытында кезекті контейнердің жөнелтілімін ұйымдастырды. Бұл туралы ҚТЖ баспасөз қызметіне сілтеме жасай отырып Egemen.kz хабарлайды.

Әр түрлі жүктер қатары тиелген 43 қырықфуттық контейнерлерден тұратын пойыз Қазақстанға Алтынкөл стансасы арқылы келді. Әрі қарай, Бекет-Ата фидер кемесімен жүк Ақтау портынан Әзірбайжанның Алят портына жеткізіліп, ол жерден Грузияның Ахалкалаки стансасы арқылы Түркияның Измит қаласына жетті.

Пойыздың жалпы жол жүру уақыты 14 күнді құрады. Бір қызығы, Алтынкөл стансасынан шыққан пойыз Ахалкалаки стансасына 10 күнде жетіп, рекордтық нәтиже көрсетті. 

Айта кетерлік жайт, эпидемиологиялық жағдайға байланысты туындаған кейбір шектеулерге қарамастан, Транскаспий халықаралық көлік маршруты (ТХКМ) бойымен жүк тасымалдау барлық санитарлық-эпидемиологиялық стандарттарға сәйкес кедергісіз жүзеге асырылады.

Жүк жөнелтілімін ұйымдастырушылар бұл контейнерлік пойыздың жеткізілімі бірнеше елдің теміржол әкімшіліктері арасындағы стратегиялық ынтымақтастықтың мысалы екенін атап өтті.

Соңғы жаңалықтар

Ұқсас жаңалықтар