Дүйсенбіде қала әкімі Бақытжан Сағынтаев Алматыдағы эпидемиялық жағдайды тұрақтандыру үшін қабылданып жатқан шаралар легін егжей-тегжейлі баяндап, журналистердің сауалдарына жауап берді.
Қала әкімі онлайн-брифинг өткізіп жатқан кезде Алматыда індет жұқтырғандардың нақты саны 6202-ге жетіп, коронавирустың күн сайынғы өршуі 1,1 пайызды құрады. Бұл күндері инфекциялық стационарларда 1772 адам емделіп жатыр. Мегаполистегі науқастардың 349-ының жағдайы ауыр болса, 24-і хал үстінде. 1264 науқастың денсаулығы орташа деп бағаланса, 135 адам тәуір болып келеді. Дегенмен жағдайы қиын және ауыр пациенттердің саны артып барады. Өз кезегінде пневмония кеселіне шалдыққан алматылықтар қатары күрт көбейген. Өткен жылдың осы уағымен салыстырғанда тыныс жолы ауруларынан көз жұмғандар саны 68,6 пайызға өсіпті.
«Алматыдағы жұқпалы аурулар стационарларына күнделікті 100-ден астам адам келіп түседі. Инфекциялық ауруларды емдейтін мұндай мекемелердің жүктемесі 85% құрайды. Міндет – 1 қыркүйекке дейін жұқпалы және уақытша ауруханалардағы орынды 6 мың төсек-орынға дейін арттыру», деді Б.Сағынтаев.
Қала басшысы ең басты мақсат ауырған адамдардың барлығының емделуіне жағдай тудыру екенін атады. Бұл мәселеде Алматы билігі әрекетсіз отыр деп айтуға болмайды.
Б.Сағынтаев бірінші кезекте Мемлекет басшысының стационарлы көмек алуға қолжетімділікті арттыру жөніндегі тапсырмасы орындалатынына сендіріп, осы аптаның соңына дейін ауруханаларда қосымша 500 орын ашылатынын жеткізді.
Қалада коронавирус инфекциясының таралуын болдырмау бойынша барлық бағытта белсенді жұмыстар жүргізіліп, амбулаторлық деңгейде «виртуалды инфекциялық аурухана» ашылды.
Сонымен бірге COVID-19 жұқтырған дәрігерлік көмекке мұқтаж науқастарды тәулік бойғы режімде тәуекел тобындағы науқастардың асқынуларының дамуын амбулаторлық деңгейде бақылайтын Мониторинг орталығы жұмысын бастады. Аталған шаралар жағдайы ауыр науқастарды, әсіресе қарт адамдарды бақылауда ұстауға мүмкіндік береді.
«Эпидемиямен күресте түбегейлі мәселе – барлық ауырған адамдардың ем алуы үшін қосымша төсектік орын қорын құру. Бүгінде қалада коронавируспен күреске қуаты 3 340 төсектік орынға шақталған 19 стационар жұмылдырылып, ауруханалардағы орын 7 есеге көбейген. Психикалық денсаулық орталығының негізінде қосымша 150 орын, Урология ғылыми орталығының негізінде 150 орын ашып, Halyk Arena базасының негізінде 200 орынды кезеңімен 1000-ға дейін ұлғайту көзделіп отыр. Осылайша, осы аптаның соңына дейін қосымша 500 төсектік орын әзірленеді. Сонымен бірге Halyk Arena базасының негізінде жан сақтау бөлімі, тиісті құралдары бар толыққанды стационар ашылады, науқастарға оттегі орындары қолжетімді болады», деді қала басшысы.
Алғашқы медициналық санитарлық көмек нысандарының деңгейінде мобильді бригадалар күшейтілуде, олардың құрамына бөлім меңгерушілері, инфекционист дәрігерлер, эпидемиологтер, учаскелік дәрігерлер және мейірбикелер енген. Қазіргі уақытта 72 бригада мобилизацияланды және АМСК 297 қызметкері жұмылдырылды.
АЛМАТЫ
