Есіркі қылмысын жасады деген күдікке Петропавл қаласында тұратын 18 жастағы бойжеткен ілікті. Полицейлер қала тұрғынынан 40 грамға жуық мефедрон синтетикалық есірткісін алды.
Әсері күшті әрі аса қауіпті дизайнерлік есірткілердің бірі Солтүстік Қазақстан облысында алғаш рет анықталып отыр. – Сотқа дейінгі тергеп-тексеру шеңберінде жедел іс-шаралар, оның ішінде күдіктінің тұрғылықты жері бойынша тінту жүргізілді. Пәтерде есірткіге ұқсас зат салынған түйіншек табылды.
Жүргізілген сот-химиялық сараптама заттың мефедрон екенін растады, – деді СҚО Полиция департаменті Есірткі қылмысына қарсы іс-қимыл басқармасының бастығы Жандос Басыбаев. Сондай-ақ, полицейлер буып-түйетін материалдар, ноутбуктар, таразы және басқа да есірткі кәсібін растайтын заттарды анықтады.
Сотқа дейінгі тергеу материалдарынан күдіктінің бірнеше ай бойы интернет-дүкен арқылы есірткі сатып алып, аса қауіпті затты "жасыру" байланыссыз тәсілі арқылы саудалағаны белгілі болды. Қазіргі уақытта сотқа дейінгі тергеп-тексеру жүргізілуде, сот сараптамасы тағайындалды.
