Аймақтар • 16 Шілде, 2020

Екі ел дәрігерлері тәжірибе алмасуда

20 рет көрсетілді

Шекара, кеден короновируске кедергі емес. Сондықтан қостанайлық дәрігерлер Ресейдің шекаралас аймақтарының білікті мамандарымен ақылдаса-кеңесе отырып індетке қарсы күрестікүшейтуді жөн көріп отыр.

Бұл мәселе аймақ басшысының бастамасымен қолға алынғанын айта кеткен абзал. Архимед Мұхамбетов әлеуметтік желідегі жеке парақшасына «Свердлов және Челябі облыстарының губернаторларымен келісім бойынша біздің облыстың дәрігерлеріне вирустық инфекциямен ауыратын науқастарды емдеу бойынша тәжірибелік көмек көрсетіле бастады.
Біздің көршілеріміздің жетекші дәрігерлері ауыр пациенттерді емдеу әдісі бойынша тұрақты кеңес беріп отыратын болады. Сондай-ақ, коронавирустық инфекцияны емдеудің өзекті мәселелері бойынша теледәрістер арқылы облыс дәрігерлерінің біліктілігін арттырады. Алғашқы телекөпір 15 шілде күні сағат 10.00-де басталды» - деп жазды.  

Қазір ресейлік мамандар облыс дәрігерлері үшін онлайн режімде дәріс оқып жатыр. Біліктілік арттыру мақсатындағы бейнеконференциялар екі аптаға созылмақ.

- Пандемияға қарсы күресте пайдасы зор тәжірибе алмасу дәрістеріне аймақтың мыңнан астам дәрігері өздері қызмет етіп жатқан қалалар мен аудандарда отырып-ақ бейнеконференция режімінде қатысатын болады. Келісім бойынша осы аптаның аяғына дейін Челябі облысының дәрігерлері дәріс оқиды. Келесі аптада Свердлов облысының мамандары семинар өткізеді. Онлайн конференцияларға облыс дәрігерлері өз жұмыс орындарында отырып-ақ бірден 75 байланыс нүктесі арқылы қосылады, - деді денсаулық сақтау басқармасының басшысы Вячеслав Дудник.

Осы апта ішінде Челябі қаласының 6 профессоры семинар өткізеді. Бір семинардың өзі,кем дегенде, 1 жарым сағатқа дейін созылады. Кеше медицина ғылымының докторы, инфекциялық аурулар кафедрасының профессоры Людмила Ратникова ресейлік дәрігерлердің  індеттің алдын алу, ем жүргізу және аса күрделі жағдайдағы науқастарға көмек көрсету әдістерімен бөлісті. Маманның пікірінше, пандемия кезеңінде телемедицинаның маңызы зор. Сондықтан, ресейлік профессорлар ауыр науқастарды емдеу кезінде аймақтың жетекші дәрігерлеріне онлайн байланыс арқылы көмек көрсетуге ынталы екендіктерін білдіріп отыр.

Соңғы жаңалықтар

Ұқсас жаңалықтар