Егер оқырман есінде болса, маусым айының соңындағы дәрі-дәрмектер тапшылығына байланысты Алматы әкімі Бақытжан Сағынтаевтың шешімімен індетке қарсы препараттарды көтере сатып алуды қаржыландыру үшін пайызсыз 5 млрд теңге бөлінген еді. Бұдан басқа, ковидті стационарларды дәрі-дәрмек препараттарымен қамтамасыз ету мақсатында резервтік қор құру үшін тағы 5 млрд теңге бөлінді. Қазіргі кезде препараттардың жартыжылдық қорын жасауда жанталас жұмыстар жүріп жатыр десек те болады.
Делиден жеткізілген дәрі-дәрмектерде легінде энаксопарин, гепарин, қабынуға, бактерияларға қарсы – офлоксацин, преднизалон, дексаметазон, цефтриаксон, меропенем, парацетамол, вирусқа қарсы – осельтамивир бар.
"Өткен жұмадан бастап дәрі-дәрмектерге деген сұраныстың төмендегені, ұзақ кезектің азайғаны байқалады. Жалпы, жағдай оңалып келеді. Тұрақтылық қоры арқылы дәріханаларға препараттарды жеткізумен қатар, біз ковидті госпитальдерді дәрі-дәрмектермен жедел қамтамасыз ету үшін резервтік қорды жасап жатырмыз. Дәрі-дәрмектердің жартыжылдық қоры фармацептикалық компаниялардың қоймаларында сақталады, қажет болған кезде бұл препараттар стационарларға бөлінеді", – дейді Алматы әкімдігінің қаланы дәрі-дәрмек препараттарымен қамтамасыз ету жөніндегі үйлестірушісі Заңғар Сәлімбаев.
Оның келтірген мәліметтері бойынша, Алматыға 23 шілдеде Түркиядан "Клексан" препараты жеткізіледі. Жеткізуші бұл препараттың шамамен 40 мың бірлігін әкелетін болады. 31 шілдеге дейін қосымша тағы 150 мың бірліктегі клексан жеткізу жоспарланған. Жалпы, алдағы аптада 300 мыңға жуық антикогулянт тасымалданады.
Бұл – қалаға 10 шілдеден бастап қажетті дәрі-дәрмектерді жеткізген жетінші рейс. Шілденің соңына дейін тағы екі рейс келеді деп күтілуде. Қалаға жеткізілген дәрі-дәрмектердің жалпы көлемі шамамен 7,5 млн қаптама. Кедендік рәсімдеуден соң препараттар қала дәріханаларына бөлінетін болады.
Қала әкімдігі тарапынан дәрі-дәрмек жүктерінің жедел рәсімделуі үшін пәрменді шаралар жүзеге асуда. МКД-нің Алматы қаласы бойынша "Жетісу" Кеден постысының басшысы Талғат Жаңбырбаев өзінің сөзінде елімізге келіп жеткен медициналық заттары бар гуманитарлық және коммерциялық жүктерді рәсімдеу уақытының едәуір қысқарғанын атап өтті.
"Гуманитарлық жүктер кедендік төлемдерсіз, тез арада рәсімделуде. Рәсімдеу уақыты 5-10 минут. Фармкомпаниялардың коммерциялық партияларын рәсімдеуге 10-20 минут кетеді. Айта кетерлігі, біз қазір тәуліктік жұмыс режиміне көштік. Бұрын түнде келген жүк таңертеңгісін рәсімделетін. Біз қазір келген жүкті дер кезінде рәсімдеп, күндіз де, түнде де дамыл таппай, жұмыс жасаудамыз. Біз үнемі байланыстамыз, өйткені өмірлік маңызы бар жүк бір минутқа да кешікпеуі тиіс", – дейді Талғат Жаңбырбаев.
АЛМАТЫ
