Бұл жобаның басты ерекшелігі республикамыздың түкпір-түкпіріндегі еріктілерге өз еркімен жобаға қатысып, белсенділігін арттыруға мүмкіндік беруінде. Туған халқының тарихын зерттеу ортақ мақсатына айналған талантты жастар бір-бірінің шығармашылығын шыңдап, рухани кемелденуіне ықпал ете отыра, мәдени мұраның сақталуына ақпараттық ізденіс қоса алады. Сонымен бірге, ең бастысы, тарих, мәдениет ескерткіштерін және мемориалдық кешендерді қалпына келтіру және сақтау жөніндегі жобаларға қатысып, тарихымыздың ұрпақтан-ұрпаққа мұра болып қалуына қолғабыс етеді.
Жақында түркістандық волонтерлер Отырар, Күлтөбе, Сайрам, Исфиджап, Ордабасы, Ұзын ата, Үкаш ата, Сауран, Аппақ Ишан медресесі сынды тарихи орындарында, Ақсу-Жабағылы, Қаратау қорықтарында реставрациялық, қалпына келтіру бойынша жұмыстарын бастады. Қазіргі таңда осы жобаға қатысуға өтініш білдірген волонтерлер саны 300-ге жетті. Бұл – негізінен республика бойынша жоғары көрсеткіш. Аймақтағы жастардың тарихқа қызығушылығымен қатар, қасиетті жерлерді құрмет тұтып, қадірлеуінің нышаны іспеттес.
Түркістан облысы Қоғамдық даму басқармасы «Жастар ресурстық орталығының» басшысы Амалбек Өміртайдың айтуынша, мұндай жобалар жасөспірімдер мен жастардың назарын мәдени мұраларға аудару, ұлттық құндылық пен ұлттық код туралы жастардың түсініктерін жандандыруға айрықша әсер етеді.
«Жобаға ұсыныс білдірген волонтерлер санының көптігі де жастардың мәдениет пен тарихқа деген қызығушылығын аңғартса керек. Өзім де жас волонтерлермен бірге Сауран, Бәйдібек аудандарындағы шараларға қатысып, сондағы жұмыс барысымен таныстым. Өз үлесімді де қостым. Өйткені біз ұлттық мәдениетіміз арқылы ғана өзіміздің түп-тамырымызды сезініп, болашаққа бағдар аламыз», дейді орталық басшысы.
Осы кезге дейін «Birgemiz: Asyl mura» бағытының «Өз еліңді танып біл» жобасы аясында Бәйдібек ауданында орналасқан Аппақ Ишан мешіт-медресесіне, Бәйдібек би, Домалақ ана, Қос ана кесенелері, Боралдай петроглифтеріне волонтерлерге арналған экскурссия өтті. Оның аясында жастар бұл мекендерде тазалық жұмыстарын жүргізіп, қабырғаларды әрлеуге, қоршау аймағын сырлауға атсалысты.
«Әзірет-Сұлтан» республикалық қорық мұражайына қарасты Көне Сауран қаласында еріктілермен сенбілік жұмыстары жүргізіп, аталған музейге қарайтын «Күлтөбе» археологиялық қазба орны да волонтерлерге таныстырылды. Тек Түркістан облысының аймағы ғана емес, көршілес Жамбыл облысы Жуалы ауданындағы «Жылқышы төбе» қорымындағы археологиялық қазба жұмыстарына өңіріміздің волонтер жастары барып, ондағы жұмыстарға белсенді атсалысып, қазба жұмыстарына қатысып келді.
Түркістандық волонтерлер әлі де болса қарқынды жұмыс істеп, тарихи-мәдени орындарды гүлдендіре түспек ниетте. Тек тазалық пен ретке келтіру жұмыстарынан өзге алдағы уақытта тарихи аймақтарда ашық аспан астындағы театрландырылған қойылымдар даярлау да жоспарда бар. Оның дайындық жұмыстарына кірісіп, қазіргі уақытта Күлтөбе аумағындағы қойылым сценарийлері даярланып жатыр.
Бұл жұмыстардың бәрі жалпыұлттық жобаның аясында тарихи нысандарды сақтау мен қалпына келтіруге ықпал етіп қана қоймай, жастардың оларға деген қызығушылығын оятуға әсер етіп отыр деген сенімдеміз.
Рысгүл ДОСЖАНОВА,
Волонтер
