Әлем • 31 Шілде, 2020

Алаш үні – Аргентина төрінде

Аргентиналықтар бүгінде Димашты тәулік бойы тынбай тыңдап жатыр. Бұл туралы dimashnews.com сайты хабарлады. «Аргентинада Димаш Құдайберген мен оның фанаттарына арналған «La Era Dimash» радиостанциясы ашылды. Аталған толқында күні-түні қазақстандық орындаушының әндері қосылады. Аргентинадағы жанкүйерлер үшін 2020 жылдың басты оқиғасы осы болды», деп жазды аталған сайт.

Мирас АСАН

Тек Димаштың әндері қосылатын радиостанция ашу туралы ой жерлесіміздің Аргентинадағы тыңдарманы Паола Роминаға 2019 жылдың тамызында келген екен. Бойжеткеннің бастамасын тек Латын Америкасындағы емес, жер жүзіндегі фанаттар да қолдаған.

Аталған сайт жазғандай, «Dimash´s Dears Argentina» фан-клубы әкімшілерінің бірі Флавия Альтамирано Паоламен аргентиналық фанаттардың Росариодағы кездесуінде танысқан екен. Қыздар тез тіл табысып, аз уақыттан кейін Паола «The Dimash Era» деген атпен мәдени алмасуға арналған парақша ашқан. Бұл парақшада Паола Қазақстан мәдениетін өзге елдердің мәдениетімен салыстыра отырып, ұқсастығы және айырмашылығы туралы жариялайды екен.

Фанаттар тарапынан оң баға алған Паола дүние жүзіндегі фанаттарға тарту жасағысы келген. Ойлана жүріп соңында жеке радио станция ашуға бел буыпты. Жаңа идеясы туралы Паола аргентиналық Dears-қа хабарлайды, ал олар өз кезегінде қуана-қуана қолдау танытқан.

Айта кетуіміз керек, радиостанцияның негізгі мақсаты – әлемде болып жатқан жағдайға байланысты қиналған, мұқтаж жандарға, фанаттарға бақыт сыйлау. Радионы WiFi желісі жоқ орындарда да мобильді траффик жұмсамай-ақ тыңдай беруге болады. Ол үшін «ZenoRadio» мобильді қосымшасын «App Store» және «Google Play-ден» жүктеп алуға болады.

Димаш бүгінде әлемге танымал тұлға. Қаршадай ұлдың қазақ сахарасында туып, аз ғана жылдың ішінде аты әлемге мәшһүр болуы, Атлант мұхитын асып Аргентина төрінде тәуліктер бойы әні шырқалып жатуы – ұлтымызға теңдессіз мерей.

Қазақтың әні мен сәнін, өнері мен тілін насихаттап жүрген құбылысты ел ішінде бұдан да үлкен құрметпен насихаттауымыз керек қой.

Күннің маңызды және өзекті жаңалықтарын «Егемен Қазақстан» телеграм каналынан оқыңыз