Аймақтар • 11 Тамыз, 2020

Семейге көмектесуден бас тартпаған жалғыз облыс - Алматы

Нұр-Сұлтан қаласы әкімдігі жалпы соммасы 400 миллион теңгеден астам қаражатқа Ертіс жағалауын жөндеуді мойнына алған екен.

Азамат ҚАСЫМ

Жыл басында Абай Құнанбайұлының 175 жылдығына орай еліміздің қалалары мен облыстары Семей қаласына тарту жасап, шаһарды абаттандыруға үлес қосатыны жайлы жар сала айтылған-ды. Бұған семейліктер ерекше қуанған. Алайда елдегі карантин бұл іске қолбайлау болған секілді. Осыдан екі-үш күн бұрын әлеуметтік желілерде Нұр-Сұлтан қаласы, Қарағанды, Ақмола, Қызылорда облыстары Семейге көмек көрсетуден бас тартқаны туралы ақпарат тарады. Мәселен, Нұр-Сұлтан қаласы әкімдігі жалпы соммасы 400 миллион теңгеден астам қаражатқа Ертіс жағалауын жөндеуді мойнына алған екен.

Әзірге уәдесінен таймаған жалғыз өңір – Алматы облысы. Алматы облысы Семейдегі Әуезов пен Селевин көшелерінің қиылысынан ет комбинатына дейінгі аумақта «Абай жолы» жаяу жүргіншілер аймағын салуды өз мойындарына алған екен. Семей ақпараттық орталығы таратқан мәліметтерге сүйенсек, Алматы облысы қазіргі таңда жұмыстың 80 пайызын аяқтаған. Жоспарға сәйкес нысанды тапсыру қыркүйек айына жоспарланған. «Алматы облысы жұмыстардан бас тартқан жоқ және барлығын мерзімінде орындайды. Біз «Абай Жолы» нысанын салып жатырмыз. Құжат бойынша жұмыстар 18 қыркүйекте аяқталуы тиіс. Осы уақытқа дейін бәрі дайын болады, үлгереміз» дейді жұмыс өндірісінің жетекшісі Рафаил Хазипов.

Айта кетейік, жалпы құны 600 миллион теңгеден асатын «Абай жолы» жобасы ұзындығы 2100 метрді құрайтын жаяу жүргіншілер көшесі мен ұзындығы 1600 метрлік веложолдан тұрады. Мұнда күзде мыңға жуық ағаш отырғызу жоспарланған. Сонымен қатар көше бойына Абайдың сөздері жазылған жеті стела орнатылмақ.

СЕМЕЙ

Күннің маңызды және өзекті жаңалықтарын «Егемен Қазақстан» телеграм каналынан оқыңыз