Қоғам • 21 Тамыз, 2020

Заңсыз құрылыс тоқтатылды

5 рет көрсетілді

Экология, геология және табиғи ресурстар министрлігі тұрғындардың шағымы бойынша Ақмола облысы Степногор қаласының іргесіндегі Бестөбе және Ақсу кеніштерінде алтын өндірумен айналысатын компаниялар тобын тексеріп, бірқатар заңбұзушылықты анықтады.

Бұған дейін ауыл тұрғындары лас ауамен тыныстап, шаңның ортасында қалып отырғанын айтып, Бестөбе және Ақсу кеніштерінің жұмысына шағымданған болатын. Тексеру барысында желді күн­дері Бестөбе, Ақсу және Заводское ауыл­дарын шынымен де шаң басатыны рас­талды. Сондай-ақ ауыл іргесінде мемле­кеттік эко­логиялық қорытындысыз қалдық­тарды сақтау орнының және фабрика құры­­лысының басталғаны анықталды. Тұрғын­­дардың сөзінше, «Алтын алмас» ком­па­ниялар тобына қарасты «Аqsu technology» компаниясы бұл екі нысанды тұрғын­дардың келісімінсіз салып алған. Ал алтын өндіруші компания өкілдері мұндай қадамға қалдықтарды сақтайтын орын қалма­ғандықтан барғандарын айтуда. Қазір минис­трлік өкілдері құрылыс жұмыстарын тоқтатып, кәсіпорынды жауапкершілікке тартты.

Экологиялық реттеу және қадағалау комитетінің өкілдері компания басшыларына шұғыл арада қоғамдық тыңдау өткізіп, халықтың келісімін алуды талап етті. Егер жергілікті тұрғындар кеніштің жұмыс істеуіне келісімін бермесе, мем­лекеттік эко­логиялық қорытындының оң нәтижесі берілмейтінін ескертті. Экологиялық реттеу және қадағалау коми­тетінің төрағасы Зұлфыхар Жол­дасов «компания қайтадан қоғамдық тыңдау өткізіп, халықтың келісімін алып, тиісті құжаттарын заңдастырғанда ғана құрылысын жалғастыра алады», деп мәлімдеді. Өз кезегінде алтын өндіруші компания өкілдері халықтың алдындағы әлеуметтік жауапкершіліктерін орындап, ескі қалдықтарды сақтау орындарын рекультивациялауға және бірінші кезекте осы ауылдың тұрғындарын жұмысқа қа­былдауға әзір екендіктерін мәлімдеп отыр.

 

 

 

Соңғы жаңалықтар

Үлгі болар игі іс

Қоғам • Кеше

Доллар бағамы арзандады

Экономика • Кеше

Ұқсас жаңалықтар