Елорда тұрғындары мен қонақтары NUR ALEM-ге келгенде коронавирус инфекциясының таралуын болдырмау үшін санитарлық талаптарды ұстану қажет. Келушілер медициналық маска тағып, әлеуметтік қашықтықты сақтау керек. Мұражайға кірген кезде келушілердің дене қызуы арнайы құрылғымен өлшенеді, сонымен қатар объектіде антисептиктер мен санитайзерлер орнатылған.
Мұражайға келушілерді сфералық пішінді бірегей ғимараттың сегіз қабаты бойынша қызықты экскурсиялар күтеді. Бірінші деңгейде "Ұлттық павильон" орналасқан, онда Қазақстанның ландшафттары, мәдениеті, тарихы, бүгіні мен болашағы көрсетілген.
2-7 қабаттарда келушілер ғарыш, күн, жел, су, биомассалар мен кинетикалық энергияға арналған экспозициялармен таныса алады. Мұнда бөгеттің көркемдік қондырғылары, кинетикалық энергияға қатысты тарихи артефактілер ұсынылған.
Жел аллеясында келушілер желдің әртүрлі жылдамдығын сезіне алады. Ең жоғарғы қабатта туристердің назарына Қазақстан астанасының болашағын көрсететін экспозиция ұсынылады. Қаланың мүсіндік моделі тұрақты даму мен экологиялық тиімділікті сипаттайды. Сондай-ақ барлық қабаттарда робот-гидтер жұмыс істейді.
