Аймақтар • 17 Қыркүйек, 2020

Қарағанды облысында 15 ірі спорт нысаны ашылады

178 рет көрсетілді

Қарағанды облыстық дене шынықтыру және спорт басқармасының басшысы Темірхан Абылаев тікелей эфирде өткен брифинг барысында алдағы екі жылда Қарағанды облысында 15 ірі спорт нысанының ашылатынын, сонымен қатар көшелердегі спорт алаңдарын жөндеу және орнату бойынша кең ауқымда жұмыстар жүргізілетінін мәлімдеді, деп хабарлайды Egemen.kz.

Басқарма басшысы бұқаралық спортты дамытудың мемлекет алдында тұрған басым бағыттағы міндеттерінің бірі екенін атап өтті.

"Біздің міндетіміз – әр қалада, әр ауылда жастар, балалар мен үлкендердің белсенді өмір салтын ұстануына, жаттығуына жағдай жасау, мүмкіндік тудыру. Облыста дене шынықтырумен айналысуға тұрғындарды тарту бойынша жұмыстарды ұйымдастыру мақсатында 262 спорт нұсқаушысы, оның ішінде ауылдық жерлерде 76 маман жұмыс істейді", деп атап өтті Темірхан Абылаев.

Қарағанды облысында тұрғындарды саламатты өмір салтына барынша көп тарту үшін дене шынықтыру-сауықтыру кешендері, спорт залдары және ашық спорт алаңдары салынуда.

"Өңірде алдағы екі жылда 15 ірі спорт нысаны ашылады. Олардың қатарында Теміртаудағы дене шынықтыру-сауықтыру кешені (ДСК), Қарағандыдағы үлкен және үстел теннисі орталықтары, Жезқазған, Шахтинск қалаларындағы және басқа да елді мекендердегі спорт кешендері бар. Сондай-ақ, ауылдарда "Ауыл – ел бесігі" бағдарламасы бойынша спорт нысандарының құрылысы жүргізілуде. Атасу кентінде бассейн, Ақтас пен Ботақарда ДСК ашу жоспарда бар", деді Темірхан Абылаев.

Жаңа нысандар салумен қатар, өңірде бұрыннан бар нысандарды ауқымды жөндеу жұмыстары жүргізілуде. Мысалы, Ақсу-Аюлы кентінде спорт мектебі ретке келтірілді, кеншілер астанасында "Қарағанды-Арена" мұз сарайы жөндеуден өткен. Мұнда шатыр, жүгіру жолдары ауыстырылып, шешінетін бөлмелер мен басқа да орындар ретке келтірілді. Жол картасы бойынша жөндеу жұмыстары 11 нысанды қамтыған. Олардың қатарында Нұркен Әбдіров атындағы спорт сарайы, жеңіл атлетикадан олимпиялық резервтің мамандандырылған балалар мен жасөспірімдер мектебі және басқалары бар. Биыл өңірдегі 10 спорт мектебінде жалпы сомасы 210,9 млн теңге болатын жөндеу жұмыстары жүргізілуде. Жалпы, облыста "Жұмыспен қамтудың жол картасы" бағдарламасы аясында спорт саласындағы 14 жобаға 1 миллиард теңгеге жуық қомақты қаражат бөлінген.

Темірхан Абылаев карантинге қарамастан, қарағандылық спортшылардың өз жаттығуларын жалғастырғанын, ал облыстың көптеген тұрғындарының  онлайн-жарыстардың жаңа форматын қолданғанын атап өтті. Пандемия кезінде спорт басқармасы спорттың 24 түрі бойынша 142 онлайн-жарыс өткізген. Облыстың жүзге тарта тұрғындары доппен жонглерлік ету, жеңіл атлетикалық кросс, күш  гимнастикасы және дойбыдан өткен төрт онлайн-турнирге және спорт күнінің құрметіне барлық санаттағы тұрғындар үшін ұйымдастырылған сурет конкурстарына қатысты. Қарағанды спорт мектептерінің жаттықтырушылары AulaFit республикалық челлендждің белсенді қатысушылары болды. Олар қаланың әртүрлі аудандарында тұрғын үйлер мен мектептердің аулаларында балаларға арналған екі мыңға жуық адам қатысқан 70 жаттығу өткізді. Бір сөзбен айтқанда, басқарма жаңа жағдайда спортты және саламатты өмір салтын насихаттау бойынша белсенді жұмыс атқарды және оны алдағы уақытта да жалғастыратын болады.

1

Қазіргі таңда спортшылардың жаттығуына рұқсат берілді: спорт кешендері мен бассейндер жұмыс істей бастады. "Әрине, мұның бәрі қажетті санитарлық нормаларды сақтай отырып іске асуда. Жарыстарды өткізуге әлі рұқсат берілген жоқ, дегенмен олар онлайн режимінде міндетті түрде жалғасын табады", дейді басқарма басшысы. 

Сонымен қатар брифингте Темірхан Абылаев облыс басшылығының қарағандылық спортшыларды қолдау мақсатында мүмкін болған барлық жағдайды жасап отырғанын жеткізді. Мысалы, таяуда ғана ел намысын қорғап жүрген жетекші спортшылардың шәкіртақысын көбейту жөнінде шешім қабылданыпты. Бұған қоса, шәкіртақы алушылардың саны өсіп, ол 104-тен 165 спортшыға жеткен.

Брифингтің соңында Темірхан Абылаев облыс тұрғындарын саламатты өмір салтын ұстанып, спортпен және дене шынықтырумен тұрақты түрде айналысуға шақырды.

Қарағанды облысы

Соңғы жаңалықтар

Ұлттық үрдістер үзілмейді

Қазақстан • Бүгін, 21:52

Ұлы даланы жаңғыртқан ұлағат

Аймақтар • Бүгін, 21:27

Мерейімізді өсірген мегажоба

Руханият • Бүгін, 21:14

Алакөлге ғарышкер келгенде...

Қазақстан • Бүгін, 21:01

«Киік жаппай қырылып жатыр»..

Аймақтар • Бүгін, 14:15

Пневмониядан 5 адам қайтыс болды

Коронавирус • Бүгін, 10:00

Ұқсас жаңалықтар