Бұдан бөлек, жеке инвестициялардың есебінен санитарлық-гигиеналық торабы бар 128 жанармай құю бекетін салу жоспарланып отыр. Мемлекет басшысы Жолдауда коронавирус індетіне қарсы күреске барлық күш-жігерді жұмылдыру қажеттігін айтқан болатын. Сонымен қатар «Жол бойындағы сервисті дамыту мәселесіне» ерекше тоқталып, Үкіметке тиісті тапсырмалар жүктегені белгілі. 5 жыл ішінде атқарылатын жоғарыда айтылған жұмыстар Жолдау жүктеген міндеттердің үдесінен шығуға бағытталған.
«ҚазАвтоЖол» ҰК» АҚ баспасөз қызметі:
– Биыл қайта жаңарту жұмыстарының аясында Шортаңды – Зеренді, Қарағанды қаласының айналма жолы, Нұр-Сұлтан – Павлодар, Жетібай – Жаңаөзен, «Нұр-Сұлтан қаласының айналма жолы, Ұзынағаш – Отар, Өскемен – Рахман қайнары мен Петропавл – Қорған автожолдарында 22 санитарлық торап қойылады. 2021 жылы 40 санитарлық-гигиеналық торап, 2022 жылы – 50, 2023 жылы – 55, 2024 жылы – 65, 2025 жылы 87 санитарлық-гигиеналық торап орнатылады, – деп хабарлады.
Сонымен қатар 2025 жылдың соңына дейін халықаралық және республикалық маңызы бар жолдардың бойында жеке инвестициялардың есебінен санитарлық-гигиеналық торабы бар Compass, ҚазМұнайГаз, Helios, Sinooil және Kaztransgas сияқты компаниялардың 128 жанармай құю бекеті бой көтереді.
Бүгінгі таңда Алматы – Қорғас, Алматы – Ташкент, Самара – Шымкент, Ақтөбе – Мартық, Нұр-Сұлтан – Теміртау, Алматы – Өскемен, Екатеринбург – Алматы мен Доссор – Ақтау теңіз порты автомобиль жолдарында 18 жанармай құю бекеті салынуда. Жол бойындағы сервисті дамыту мәселесі Индустрия және инфрақұрылымдық даму министрлігі Автомобиль жолдары комитетінің басты назарында.