Сұхбат • 22 Қыркүйек, 2020

Әйгерім Берекешева: Бизнесті дамытуда біліммен қатар тәжірибе маңызды

32 рет көрсетілді

Әйгерім Берекешева Талдықорған қала­сында орта мектепті тәмамдағаннан кейін Алматыдағы Қазақ-Америка университетіне оқуға түседі. Білімін Колумбия универ­ситетінде жалғастырған жас түлек 2011 жылы оқуын аяқтап, Нью-Йорктегі Ernst Young’s офисінде тағылымдамадан өтеді. Шетелде алған білімі мен тәжірибесін Ота­нында жалғастыруды мақсат еткен Әй­герім өз компаниясының негізін қалап, бү­гінде көптеген шетелдік компаниялармен әріп­тестікте жұмыс істеп келеді. «Қазақстанның 100 жаңа есімі» жобасының жеңім­пазы, Нью-Йорк адвокаттар коллегиясының мүшесі, 2017 жылы Еуропа банктері бастамасымен құрылған әрі қазақстандық жобаларды қаржыландырумен айналысатын COCAD заңды тұлғалар қауымдастығы құрылтайшыларының бірі Әйгерім Берекешева заң компаниясының бағыт-бағдары туралы әңгімелеген еді.

– Әйгерім, көптеген жас мамандар білім алғаннан кейін шетелдерде қа­луға тырысатыны белгілі. Дегенмен, сіз елге оралып, жеке ком­панияңызды аш­уы­ңыздың өзі үл­кен жетістік.
Adilet & Alem компа­ния­сы туралы айтып өтсеңіз?

– Шетелде алған білімімді, тәжі­рибемді өз елімде жүзеге асыру азаматтық парызым деп білемін. Елге оралғаннан кейін «Розенблатт» халықаралық заң компаниясына жұмысқа тұрдым. Біраз уақыт өткеннен кейін серіктестерім мені адвокат ретінде емес, клиенттермен жұмыс істейтін бақылаушы ретінде көргісі келетінін айтты. Нәтижесінде, 2012 жылы 12 желтоқсанда Adilet & Alem  ком­паниясының негізі қаланды.

– Компания қандай бағытта жұмыс істейді?

– Компанияның негізгі мақсаты – халықаралық заңдар бойынша және корпоративтік кеңестер беру, инвестициялармен жұ­мыс істеу. Тікелей инвесторлар табуға қолдау көрсету, Еуропалық банктермен жұмыс істеу де компанияның не­гізігі бағыттарының бірі саналады. Бүгінде компания көптеген шетелдік әріптестермен жұмыс істеуді жолға қойған. Әрине, компанияны алғаш аш­қан кезде әріптестер іздеумен, әлеуетті клиент­терге коммерциялық ұсыныстар жіберуде көптеген жұмыс жолға қойылды. Нәтижесінде, «Арселор Мит­тал» металлургиялық компаниясы және «Промстрой келісімшарт» құрылыс тобы Adilet & Alem компаниясының алғашқы ірі клиенттерінің қатарына кірді. Бірте-бірте олардың қатары ұл­ғайып, компаниямыз туралы жағымды пікірлер қалыптаса бастады. Бүгінде Adilet & Alem компанияларының клиенттері арасында «Қазпошта», OTIS, Viled Group, PetroChina, Prada Group Kazakhstan, тағы басқа  компаниялар бар. Компания тек мүддені ғана емес, сонымен қатар ұзақ мерзімді ынтымақтастық туралы келісімшартқа жұмыс істеуді мақсат етеді. Adilet & Alem халықаралық жасыл технологиялар және инвестициялық жобалармен меморандумға қол қойған бірден-бір заң компаниясы. Компания ресми түрде Қазақстанда шетелдік инвесторлармен барлық жобаларды жүзеге асырады. 2014 жылдан бастап Италиямен жұмыстарымызды жолға қойып, Милан қаласында офисімізді аштық. Пандемияға байланысты бір­қатар жоспарларымыз кешеуілдеп қал­ды. Дегенмен, Мәскеуде, келесі жылы Қытайда офистерімізді ашуды жоспарлап отырмыз. Бүгінде Baker McKenzie сияқты халықаралық, сонымен қатар Грато, Калибри, Sayat Zholshy & Partners, тағы басқа қазақстандық компаниялармен де жұмыс істеп келеміз.

– Жоғарыда инвестор тартуға қол­дау көрсету жайында айтып өт­тіңіз. Қазақстан жағдайында инвес­тор­­лар қандай салаларға көп көңіл бөледі?

– Бүгінде елімізде инвесторлар барлық салаларға қызығушылық танытуда деуге негіз бар. Бірақ барлық салаға бірден келе қояды деп айта алмаймыз. Себебі еліміз оған мәдени, географиялық тұрғыдан дайын емес. Сонымен бірге заңнамалық жүйесі әлі толық қалыптаспаған. Мысалы, Аме­рикада, Еуропаның сауда-эконо­микалық заңнамалық жүйесінің бес жүз жылдық тарихы бар десек, кеңестік жүйенің құрамынан шыққан жас мем­лекеттің заңнамалық тұрғыдан дамуы ұзақ жылдарды қажет етеді. Алдағы уақытта жа­ңа міндеттер мен талаптар қоя отырып, әртүрлі салада дамуды жүзеге асы­руға тиіспіз. Заңнамалық тұрғыда шетел­дік ком­па­ния­лармен жұмыс істеу қажеттілігі басым.

– Еліміздің заңнамалық жүйесінің әлі­ де дамытатын тұстары жеткілікті дей­­сіз. Ал саланы дамыту үшін маман мәсе­­лесі қаншалықты жолға қойыл­ған?

– Отандық компанияларды дамыту үшін міндетті түрде шетелдерде білім алу маңызды емес. Біздің компания өз елімізде бітірген түлектерді жұмысқа қабылдайды. Бүгінде шетелдердегі офистерімізде Қазақстанның жоғары оқу орындарын бітірген түлектер еңбек етуде. Әрине, білім сапасы аса жоғары деңгейде деп айта алмағаныммен, ең бас­тысы тәжірибеге назар аудару. Маман үшін жұмыс барысын игеруге кем дегенде жарты жылдан астам уақыт кетеді. Ал өз ісінің кәсіби шебері болғысы келетін маман үшін кез келген межеден өту қиындық туғызбайды.

– Adilet & Alem компаниясының бағалы қағаздар нарығында да жұмыс тәжірибесі бар екені белгілі. Әйтсе де Қазақстанда бағалы қағаздар нарығы әлі халық­аралық дәрежеге көтеріле қойма­ғаны белгілі.

– Әрине, компанияның бағалы қағаздар нарығында да жұмыс тәжірибесі бар. Дегенмен еліміздің бағалы қағаздар нарығының дами қоймағаны мәлім. Ал саланы дамыту үшін нарыққа тек қазақстандық емес, ТМД елдеріндегі барлық компаниялармен жұмыс істеу қажет. Осы орайда «Астана» халықаралық қаржы орталығының жұмысын дамытудың да маңызы зор.

– Ал шетелдік компаниялардың заң­намасында мемлекеттік басқару жүйесі қалай жолға қойылған?

– Біздің елімізде дәл шетелдегідей еркіндік жоқ. Мысалы, шетелдерде компаниялардың заңнамасында мем­лекеттік басқару жүйесі толыққанды жолға қойылған. Қарапайым мысал, электронды үкімет жүйесін Америка, Швейцариямен салыстыруға келмейді. Осы тұрғыдан алғанда бізге мықты сарапшылар, ісімен, тәжірибесімен үлгі болатын мамандар керек. Оларды даярлау үшін әрі жұмысты жақсарту үшін шетелдерден көшіру міндетті емес. Даму үшін еліміздің географиялық ерек­шеліктері мен менталитетін негізге ала отырып, бизнестің бағасын, басқару құрылымын өзгертетін мүмкіндіктер керек.

– Әңгімеңізге рахмет.

 

Әңгімелескен

Эльвира Серікқызы,

«Egemen Qazaqstan»

Соңғы жаңалықтар

Ұқсас жаңалықтар