Жапония еңбек министрлігі COVID-19 індетінің кесірінен 60 мыңнан аса жапондық жұмыссыз қалғанын мәлімдеді.
2020 жылы қаңтардың соңынан қазірге дейін 60 439 адам жұмыссыздар қатарын толықтырған. Министрлік бұл көрсеткіштің одан да жоғары болуы мүмкін екенін жоққа шығармапты.
Жұмыссыздықтың белең алуына қарсы іс-шаралар қарастырып жатқан елдің еңбек министрлігі пандемия кесірінен өндірісін тоқтатқан кәсіпорындарға мемлекеттен субсидия алу үшін өтініш беруге болатынын айтты.
* * *
COVID-19 індеті Паркинсон ауруына шалдығуды арттыруы мүмкін. Аустралиялық ғалымдар осындай болжам жасап отыр.
Мамандар бұл вирустың адам миын зақымдайтын патогендік қалыбы бар деп есептейді. Зерттеу авторларының бірі Кевин Барнхэм коронавирус инфекциясының миға әсерінің нейродегенерацияға әкелетіні пандемиядан кейін нақты белгілі болатынын, алайда Паркинсон ауруы көбейетіні анық екенін алға тартқан.
* * *
Канада премьер-министрі Джастин Трюдо коронавирус инфекциясының екінші толқыны келгенін мәлімдеді.
«Елдің төрт провинциясында екінші толқын өршіп тұр» деген ол қайта соққан дауылдан қатты қауіптеніп отыр. Сондықтан премьер-министр вирусты күшейтпеу канадалықтардың өзіне байланысты екенін айтып, маусымдық тұмауға қарсы екпе алып, ұдайы әлеуметтік қашықтықты сақтап, маска тағып жүруге шақырды.
* * *
Чилиде бір күнде 1372 адам індет жұқтырып, елде ауырғандар саны 449 903 болды.
Елдің денсаулық сақтау министрлігі 907 адам ауруханалардың жансақтау бөлімінде дәрігерлердің күні-түні қадағалауында екенін хабарлаған. Ал 680 пациент жасанды тыныс алу аппаратына қосылса, 121 науқастың халі өте ауыр. Осыған дейін індеттен 12 345 Чили азаматының өмірі қиылса, кеше тағы 24 пациенттің тынысы тоқтаған.
* * *
COVID-19 індетіне қарсы жаңа вакцина сынағына қатысуға 2 мың ұлыбританиялық ерікті келісімін берген.
Financial Times басылымы хабарлағандай, вакцинаны тәжірибеден өткізу барысында еріктілер ағзасына әдейі вирус жіберіліп, вакцинаның әсері тексеріледі. Сондай-ақ бір айдан соң тағы да вакцина егіледі деген шешім бар. Тәжірибе 2021 жылдың басында Лондон корольдік колледжі мен hVIVO зерттеу тобының қатысуымен жүргізіледі деп ұйғарылған. Алайда бұл Ұлыбритания билігі мен Этика жөніндегі тәуелсіз комитеттің рұқсатын алғанда ғана мүмкін болады.
* * *
Словения Үкіметі де вирустың қарқынды таралуын ескеріп, екінші толқын басталғанын хабарлады.
23 қыркүйекте Словенияда 2616 адамнан алынған тесттен жаңадан 136 ауру жұқтыру фактісі тіркелді. Ал бұдан бұрын 2335 тесттен 88 ғана вирус анықталған-ды. Үкіметтің баспасөз хатшысы Бояна Беович жаздағыдай емес, адамдардың жабық ғимараттардың ішінде көбірек болуы ауру таралуын жиілеткенін айтқан.
* * *
El Periodico газеті Каталонияда 6 адамнан артық жиналуға болмайтынын жазды.
Осыған дейін Каталонияда 10 адамға дейін топтасуға рұқсат берілсе, енді ол 4 адамға қысқарған. Сондай-ақ Баша-Серданья ауданы тұрғындарына аса бір мұқтаждық тумаса, үйлерінен шықпауға кеңес берілген. Бұдан бұрын ел астанасы Мадридтің тұрмысы төмен, негізінен мигранттар тұратын 6 ауданында карантин жарияланды.
