Өнер • 01 Қазан, 2020

Сахнаның сәні кірді

11 рет көрсетілді

Карантиннен кейін қайта түлеген «Астана Опера» театры балет маусымын зор жетістікпен бастады. Балет труппасының көр­кемдік жетекшісі, Ре­сейдің Халық әртісі Ал­тынай Асылмұратова әр күндері елордалық кө­рер­мендер назарына труппа этуальдерінің қаты­суымен бірегей Гала-ба­лет бағдарламасы және Н.А.Римский-Корса­ков­тың музыкасына жа­зыл­ған М.Фокиннің «Ше­хе­разада» бір бөлімді бале­тін ұсынды.

 

«Астана Опера» балет мау­сымының ашылуы көрермен қауымды ғана емес, сонымен қатар қазақстандық же­тек­ші бұқаралақ ақпарат құ­рал­дары өкілдерінің де зор қы­зы­ғушылығын тудырды. Іс-шараның басталуына дейін жур­налистер Алтынай Асыл­мұратоваға өз сұрақтарын жау­дыртты. Әлбетте, «Карантин кезінде труппа қалайша жақсы жұмыс қалпын сақтай алды?» деген сауал басты назарда болды. Балет труппасы көркемдік жетекшісінің сөзінше, бұл оңай шаруа емес, карантин талаптарын жеңілдеткен соң ғана барлық санитарлық нормаларға сәйкес әртістер залда бар күші­мен дайындықтарын бастай алды.

– Керемет сахнамыз бен көрермен қауымды қалайша сағын­ғанымызды сөзбен айтып жеткізу қиын. Балет маусы­мы­ның ашылуы баршамыз үшін үлкен қуаныш. Маусым жарқын әрі мазмұнды, мәнді, ең бастысы жемісті болсын, – деп тілегін білдірді Алтынай Асылмұратова.

Шымылдық түрілді, шат­тан­ған көрермен тына қалды. Алдымен барлығы сахна жаб­дықтарына – атақты ита­лия­лық сценограф Эцио Фрид­жерионың декорацияларына тамсанды. Содан кейін кө­рер­мендер ауди­ториясының назары әлемдік хореография жауһарларын, атап айт­қан­да, П.Чайковскийдің «Ақ­­қу көлі», Р.Петидің хорео­гра­­­фия­­сындағы «Па­риж Құ­дай ана­­­сының соборы», М.Пе­ти­паның хореография­сын­дағы А.Аданның «Корсар» және т.б. балеттерден үзінділерді ұсынған балет труппасының әртістеріне ауды. К.Звереваның хореографиясындағы «За­ман тынысы» балетінен дуэт пен А.Садықованың хореогра­фия­сындағы Steppe Sons «Қорқыт» қойылымы кештің көркін одан сайын қыздыра түсті.

1

Бұл кеште Әйгерім Беке­таева, Бақтияр Адамжан, Әнел Рүс­темова, Гаухар Усина, Ол­жас Тарланов, Арман Оразов, Еркін Рахматуллаев, Ақарыс Бейбарыс, Серік Нақыспеков, Шұғыла Әдепхан, Сұлтанбек Ғұмар, Еркежан Жүнісова, Далер Запаров, Әсел Шәйкенова бастаған талантты әртістер ан­самблі жұртшылыққа өз өнерін паш етті.

Келесі күні «Астана Опера» Үлкен залының сахнасында Н.А.Римский-Корсаковтың му­зыкасына М.Фокиннің «Ше­хе­разада» бір бөлімді балеті ұсынылды.

«Шехеразада» спектаклі ХХ ғасырдың басында – балет өнерінің қарқынды даму ке­зеңінде қойылғаны белгілі. «Астана Опера» сахнасына бір бөлімді толыққанды балетті Ресейдің Халық әртісі Андрис Лиепа алып шықты. Балетке Шахрияр патша мен оның іні­сі туралы «Мың бір түн» ерте­гісінің желісі негіз болған.

Салтанатты шығыс нақыш­тары мен құштарлыққа толы махаббат оқиғасы залдағы бірде-бір көрерменді бейжай қалдырған жоқ. Лев Баксттың қалпына келтірілген декорациялары мен кос­тюмдеріне көрермен қауым таң­дай қақты. Алтын құлдың пар­­тиясын «Астана Опера» театрының жетекші солисі Бақ­тияр Адамжан, шығыс сұлуы Зобеиданың бейнесін театр со­лисі Анастасия Заклинская ұсын­­ды. Олар партияларын жай орындап қана қоймай, сахна төрінде өз кейіпкерлерінің өмі­рін бастан кешірді. Солис­тердің дарыны арқасында сахна нағыз таңғажайып ертегіге айналды.

Шахриардың партиясындағы Жәнібек Иманқұлов, Шахезман – Ильдар Шакирзянов, бас бел­сіз рөліндегі Олжас Махан­бе­тә­лиев, сонымен қатар балет труп­пасының барлық әртістері тал­ғамы биік көрерменнің жүрегін жаулап алды.

– Балеттен керемет әсерге бөлендім. Әртістердің тер тө­гіп еңбек еткені көрініп тұр. Бұл, ең алдымен, труппаның премьері Бақтияр Адамжан мен Анастасия Заклинскаяға қатыс­ты. Әртістер ертегіні сахна тө­рінде шындыққа айналдыра білді, – деп пікірімен бөлісті театр­дың тұрақты көрермені Данияр Оспанов.

Соңғы жаңалықтар

Амманға аттанды

Спорт • Кеше

Қадір түнінің қасиеті

Руханият • Кеше

Алматы қаласында жер сілкінді

Аймақтар • 06 Мамыр, 2021

Ұқсас жаңалықтар