Бұған дейін жоғары сыныптардың оқушылары «Birgemiz: Bilim» жобасының аясында ауыл мектептерінің оқушыларына қосымша білім беруге кіріскен болатын. Онлайн білім беру қажетті пәндер бойынша тегін оқытылады екен. Қазір бұл іске Талдықорғандағы зияткерлік мектептің 100 оқушысы ерікті ретінде жұмылған. Олар 805 ауыл баласына түрлі пәннен сабақ беріп жүр. Қашықтан оқу кезінде қосымша білім алу әрі оған тегін қол жеткізу үлкен жетістік пен көмек екені анық.
– Мен замандастарыма ағылшын тілінен қосымша дәріс оқимын. Аптасына 3 рет 40 минуттан сабақ өтеміз. Тілді оңай меңгерудің бағдарламасы арқылы оқу, жазу, сөйлеуді үйретемін. Өзім қатарлы балаларға білгенімді айтып, әңгімелесу өте қызық, – дейді Назарбаев зияткерлік мектебнің 10-сынып оқушысы Әлішер Бекмұстафаев.
Сондай-ақ мектепте «Ұрпақтар сабақтастығы» жобасы аясында қайырымдылық шарасын ұйымдастыру жолға қойылған. Осы жолы Қарттар күніне орай оқушылар ата-аналарының қолдауымен жалғызілікті зейнеткерлерге азық-түлік себеттерін табыстады. Балалар бір күнде 65 қарияның үйін аралады. Олар қарттарға азық-түлік себетінен бөлек, «Жүрегімнің бір бөлігі» атты акция арнады. Мұнда оқушылар адамдарға өздері жасаған құттықтау хаттарын сыйлады. Ата-әжелермен сұхбаттасу да кездесудің маңызды бөлігіне айналды. Кездесуде оқушылар халықаралық мейрамның тарихы мен оны әр үйде өткізу дәстүрлері туралы және мемлекет тарапынан қарияларға көрсетілетін көмек туралы да айтып өтті. Сонымен қатар бүкіл әлемдегі адамдардың өмір сүру ұзақтығына қатысты қызықты деректерге, Гиннестің рекордтар кітабына енген көптеген егде жастағы адамдардың жетістіктеріне тоқталды.
– Қарттар бала сияқты сезімтал, аңғал және қарапайым. Олар – біздің қазынамыз, тарихымыз. Аға ұрпақпен кездесу арқылы жас буын өлшеусіз тәлім-тәрбие алары хақ. Адам бойындағы ең жақсы қасиеттерді дамыта отырып, біз өзімізді мейірімділік пен жанашырлыққа үйретеміз, – дейді өз ойымен бөліскен 12-сынып оқушысы Дарья Степанова.
Алматы облысы
