Қоғам • 07 Қазан, 2020

Даярлық деңгейі жоғары

206 рет
көрсетілді
9 мин
оқу үшін

Ресейдің Қостанай облысымен іргелес аймақтарында эпидемиялық ахуал мәз емес. Жергілікті денсаулық сақтау министрлігінің мәліметінше, Челябі облысында 5 қазанда 94 адамнан короновирус анықталған. Оның жетеуі – мектеп жасындағы балалар. Дәл осы күні «Вечерний Челябинск» газетінің тілшісі, журналист Барлық Әлмағамбетов 55 жасқа қараған шағында COVID-19 індетінен көз жұмды. Қорған облысы да Қостанай өңірімен шекаралас жатыр. Бұл облыста кеше 55 адамнан COVID-19 анықталды.

Даярлық деңгейі жоғары

Қазір екі ел арасындағы жол қатынасы саябырсып, шекара жал­пыға жабық тұрғанымен, арғы-бергі бетте туысы барлар мен студенттерге, емделіп, ота жасатушылар мен жүк көліктеріне жол ашық. Қостанай облысынан Ресейге шығатын бас қақпа – «Қайрақ» шекара бекеті қыз­меткерлерінің мәліметінше, шекарадан күніне 1 мыңға жуық автокөлік, 1500-дей жолаушы өтеді. Ары-бері ағылып жатқан транспорт құралдарының 90%-ы – жүк көліктері. Бұл көліктердің басым бөлігі Қостанайға соқпай, айналма жол арқылы өткеннің өзінде, індеттің таралу қаупі бар екенін жоққа шығаруға болмайды.

Қостанай облысының әкімі Архимед Мұхамбетов кеше ғана індеттің таралуына жол бермеу жөніндегі жедел штаб отырысын өткізіп, облыста короновирусқа қарсы күрес шаралары жоспарлы түрде жүргізіліп жатқанын айтты. Алайда аймақта қабылданып жатқан сақтық шараларына қ­а­рамастан, тұрғындар мен бір­қатар мекемелер тәртіпке бой­сұнбай отыр. Полицияның мә­ліметінше, рейд шаралары барысында облыс­та 5 мыңнан астам санитарлық-эпидемиялық талаптарды бұзу дерегі тіркелген. Нәтижесінде, 1221 хаттама толтырылып, жалпы со­масы 61,5 млн теңге болатын 841 айыппұл салынған.

6-қазаннан бастап Жітіқара ауда­нындағы «Желқуар» ше­ка­ралық комендатурасында са­­нитарлық бекет қойылып, Ресей­ден бері өткендердің міндетті түр­де қызуын өлшеп, сауалдамадан өткізу шаралары қолға алынды. Сондай-ақ Жітіқарада осы күннен бастап 40 орындық карантиндік стационар жұмыс істей бастады. Бұл туралы аудан басшысы әлеуметтік желідегі жеке парақшасына жазды.

 

Жаңа инфекциялық орталық аурухананың құрылысы аяқталды

Қостанайда аз уақытта бой кө­терген инфекциялық аурухана 10 қазаннан бас­тап жұ­мыс істей бастайды. Ко­рона­вирус жұқтырған науқастар жата­тын бұл аурухананың заманауи емдеу құрылғыларымен қамтылған зертханасы, диагностика орталығы, хирургия бөлімі бар. Инфекциялық орталықтың басты ерекшелігі – мұндағы нау­қастарға арнайы қондырылған планшеттер арқылы қашықтан бақылау жасалады.

– Бұл COVID-19-ға қарсы кү­рес шаралары аясында салынған көпсалалы инфекциялық аурухана. Мұндағы әрбір төсекте оттегіге қосылу мүмкіндігі қарас­тырылған. Сондай-ақ біз мұнда BMS жүйесін енгіздік. Яғни дәрігерлер енді науқастың жай-күйін планшет арқылы қашықтан-ақ тексеріп, қорытынды шығара алады, – деді жоба жетекшісі Айдан Нарымбаев.

Инфекциялық орталық 200 нау­қасқа шақталған. 20 орындық жан сақтау бөлімі, эндоскопиялық және ультрадыбыспен емдеу бөлімі тағы бар.

– Мұнда бір орындық және екі, үш орындық палаталар бар. Облыстық аурухана дәрігерлер мен мед­бикелерді дайындап жатыр. Инженерлік құрам жасақ­талуда, – деді денсаулық сақтау бас­қармасының басшысы Вячес­лав Дудник.

Жаңа аурухананы таза және лас аймаққа бөліп тұратын 8 модуль қарастырылған. Орта­лық ғимараттарының қос қап­талында бір-біріне қарама-қар­сы орналасқан екі есік бар. Коронавирус жұқ­ты­рып, ауру­ханаға жеткізілген науқастар бірінші есіктен кіреді. Ал дертінен айыққан адамдар ғимараттың екінші жағындағы басқа есіктен шығады.

Бір қабатты аурухана ғима­ратының жалпы ауданы 6800 шаршы метр болады. Айдан На­рым­баевтың айтуынша, мұн­да ауаны тазартып отыратын кері желдеткіш орнатылған. Яғ­ни па­латадағы лас ауа дәлізге шық­пайды. Ауруханадағы барлық ауа арнайы зарарсыздандыру құ­рылғысы арқылы сүзгіден өтіп, тазартылған күйде далаға бөлініп шығады.

 

Айына 5 млн маска тігетін жаңа кәсіпорын ашылады

Қостанайда біртағар бетпер­де шығаратын өндіріс орны іске қосылады. «Вадиса М» серік­тестігіндегі екі бірдей жаңа желі минутына 160 медмаска тіге алады. Айына 5 млн қорғаныш құралын шығаруды көздейтін кәсіпорын таяуда ғана алғашқы өнімін шығарды. Серіктестіктің бас есепшісі Валентина Гаври­ленконың айтуынша, әр масканың бағасы 40 теңгенің төңірегінде. Қазір кәсіпорын өндірісті қосуға рұқ­сат беретін құжаттарын рет­тес­тіріп жатыр. Сертификатқа қол жет­кізген соң, бірден іске кіріс­пек.

Әсіресе облыс тұрғындарын дәрі-дәрмекпен қамтамасыз ету аса маңызды. Жедел штаб жанынан құрылған мониторинг тобы дәріханаларға препараттардың келіп түсуін күн сайын қадағалап, дәрі бағасының қымбаттамауын қатаң бақылауға алған. Облыста тұрақтандыру қоры құрылып, дәрі-дәрмек жеткізушілермен жұмыс жанданды. Сондай-ақ фармацевтикалық мекемелерге 300 млн теңге көлемінде қай­тарымды қаржылай көмек көр­сетілуде. Қазір облыста COVID-19-дан емдеу хаттамасына енетін бактерияға қарсы препараттар мен антикоагулянт, кортикостероид сияқты дәрі-дәрмектің екі айлық қоры бар. Пандемияның екінші толқыны бұрқ ете қалған жағдайда пайдаланылатын жеке қорғаныш құралдары да жеткілікті.

– Негізгі дәрі-дәрмек қоры үне­мі еселеніп отырады. Дәрі­ханаларды қажетті дәрілік препараттармен және жеке қорғаныш құрал­дарымен толықтыру жұмыс­тары жалғасатын болады, – деді А.Мұхамбетов.

 

7 млрд теңге бөлінді

Өңір басшысының айтуынша, облыстағы COVID-19-ға қарсы күрес шаралары аясында биыл медициналық жабдықтар мен санитарлық автокөліктер сатып алуға шамамен 7 млрд теңге бөлінген. Мұның сыртында, 79 жасанды тыныс алу құрылғысы сатып алынған, таяуда Қазақстанда шыққан тағы 85 ЖТА аппаратын жеткізу жоспарланып отыр. Бүгінде облыстағы емдеу мекемелерінде өкпеге жасанды жолмен ауа жіберетін жалпы саны 267 аппарат бар.

Денсаулық сақтау басқар­масының мәліметінше, қазан айының соңына дейін облысқа 15 цифрлы рентген жүйесі жет­кізіледі. Оның 10-ы Қазақ­станда жасалған. Сондай-ақ 4 ком­пьютерлік томограф, 1 МРТ, су тазартатын 7 гемодиализ аппараты әкелінеді.

– Мұның сыртында, 10 қа­занға дейін 360 перфузор мен ин­фузоматтар, басқа да меди­циналық жабдықтар мен қанды гемосүзгіден өткізетін 3 құрылғы келеді, – деді басқарма басшысы В.Дудник.

Ай­мақтағы 856 орынға ар­налған 4 ірі стационарда оттегі желілерін монтаждау жоспарланып отыр. Бүгінде медициналық мекемелердің балансында 600 оттегі концентраторы бар.

 

Жылжымалы диагностикалық кешенмен қамтамасыз етіледі

Диагностикалық медициналық кешенмен қамтылған арнайы көліктер Қостанай машина жасау зауытында құрастырылады. Алғашқы екі көліктің кілті Қос­танай және Федоров аудандарына табыс етілді. Зауыт мұндай медициналық құрылғылармен жабдықталған жүздеген автобус­ты еліміздің өзге аймақтарына да жөнелтпек. Денсаулық сақтау басқармасының баспасөз хатшысы Ксения Жылқыбаеваның сөзінше, мұндай автобустар Қара­ғанды облысынан өзге өңір­лерде жоқ екен.

Зауыттың арнайы коммер­циялық техника жобасының жетекшісі Алексей Левашкин жыл­жымалы диагностика кешен­деріне таяуда ғана тапсырыс түскенін айтады.

– Тамыз айында біз Денсаулық сақтау министрлігінен заманауи жылжымалы медициналық кешеннің жобасын әзірлеуге тапсырыс алдық. Міне, көп кешікпей «Yutong» серіктесімен туристік автобус базасында заманауи жылжымалы кешенді ұсынып отырмыз. Медициналық кешен «Yutong» маркалы қа­лааралық автобусының негізін­де құрастырылды. Автономды жылыту жүйесі, кондиционері бар. Автобуста жеті кабинет жұ­мыс істейді. Оның ішінде тера­пиялық және акушерлік-гине­кологиялық кабинеттер арнайы құрылғылармен жабдықталған. Қосымша зертхана орталығы да бар, – деді А.Левашкин.

Жылжымалы кешенде қан сараптамасын сақтауға арналған тоңазытқыш, созылмалы жұқпалы емес ауруларды ерте анықтайтын кешенді құрылғы орналасқан. Ем-дом жасауға қажетті мүмкіндіктің бәрі қарастырылған.

– Бүгінде Қостанай ауданында 70 мыңнан астам халық тұрады. Біз баратын ең шалғай ауыл Тобыл қаласынан 120 шақырым қашықтықта орналасқан. Бұрын біз шалғай ауылдарға жүк көлігі­мен баратынбыз. Қыста тоңып жетеміз және науқастарды тексе­ретін құрылғылар саны да шек­теулі болатын. Ал бұл көлік­тің басты ерекшелігі, мұнда тұр­ғындарға көптеген зертха­налық тексерулер жүргізуге болады. Рентген мен флюорографиядан өткізуге де мүмкіндік бар. Оған ЭКГ мен УДЗ-ны қосыңыз, – деді аудандық аурухананың бас дәрігері Сарлыбек Мещанов.

Заманауи жылжымалы диаг­ностикалық кешеннің ұзын­дығы – 12 метр. Медавтобустың мүм­кіндігі шектеулілерге арналған жылжымалы сатысы бар.

Таяу күндері мұндай кешендер тағы 10 ауданға жөнелтілмек.

 

Қостанай облысы